Kpilala 17

1Pↄↄl na Silase moowↄ Anfipolise na Apolonia donↄↄse man te be gyuu Tesalonika donↄↄ man, na Gyudatena ↄsom deni kyaa botↄↄ. 2Pↄↄl gyuu Gyudatena ↄsom deni keŋ man, ŋgba mena keŋ ↄ ne taŋ yɛɛ nɛ. Pↄↄl na balaŋ benaŋ moo Gyudatena kefɛɛfoweeya atooro sↄↄŋ gyoo Wurubuarɛ nombia aŋmaraseŋ see ŋan man. 3Na ↄ na lese nombia ŋan man wola wↄ nyi, "Kaboena nyi Kristo ŋon Wurubuarɛ be yako see nyi waa kↄŋ nɛ waa naa diyem na waa foŋ lee yeŋ man. Te ↄ besewↄ yako nyi, Yesu ŋon nombia mɛɛ yako ŋon nɛ, ŋon yɛna Kristo nyeelɛɛre ŋon." 4Te Gyudatena baale agyueŋ kyɛɛkeewↄ te be lɛɛ Yesu di, te be sila Pↄↄl na Silase. Girikitena baŋ bee yee Wurubuarɛ na ala burum baale, baŋ ba wose man dana obuo nɛ mↄ lɛɛ nombia ŋan do. 5Mↄna Gyudatena baŋ ba te lɛɛ Yesu di ya nɛ, man baale sia yɛɛwↄ Pↄↄl na Silase dↄↄ, te ba korowↄ yilaa donↄↄ keŋ man aboŋtena, te be wosi donↄↄ keŋ ampaŋ ampaŋ. Mena dↄↄ be gyuu balee ŋon bɛɛ baake e nyi Gyasↄn nɛ dɛɛ bɛɛ kɛo Pↄↄl na Silase baa lese wↄ fa balaŋ dikpii keŋ. 6Keŋ ba te naa wↄ dↄↄ ya nɛ, be wↄŋee Gyasↄn na Kristotena baale gyu donↄↄ keŋ kegyiise gyaŋ na yeesa nyi, "Balaŋ kɛwↄ yɛɛ tɛɛleyɛlɛɛlawↄ. Ba de laŋae kamasɛ na bee loo nombia do, te nɛnɛɛ ba te kaa lii de gyaŋ kɛbo, 7te Gyasↄn dↄↄ ŋon lɛɛ wↄ see ↄ dɛɛ. Bɛɛ wↄlɛɛ gyoo dinaa Kaesa mmaraase ŋan, te bɛɛ yako nyi gyoo ŋolo kyaa bela ŋon bɛɛ baake e nyi Yesu." 8Donↄↄ keŋ mantena na kegyiise baŋ kenyii nombia kɛŋa nɛ, ba nyonowↄ nideli. 9Mena dↄↄ be yela Gyasↄn na balaŋ akaŋ baŋ tↄↄ kↄba daale mo seŋ be wↄle nyi, bↄↄ tekaa yɛɛ mena bela ya te be tina wↄ yela. 10Tɛɛ ke yu pɛ te Kristotena baŋ moo Pↄↄl na Silase lee donↄↄ keŋ man, te be gyuu Beria donↄↄ man. Be ke gyu ka gyoo botↄↄ nɛ, be gyuuwↄ Gyudatena ↄsom deni keŋ man. 11Balaŋ baŋ be kyaa Beria nɛ, gyeŋ nombia kela Tesalonikatena, nawolo nyi ba moo be konↄↄse pou lɛɛ Wurubuarɛ nombia ŋan. Te bɛɛ gyoo Wurubuarɛ nombia aŋmaraseŋ see ŋan man wee kamasɛ, na bɛɛ kɛɛ nyi nombia ŋan Pↄↄl na wola wↄ nɛ yɛɛ ampaŋ? 12Mena dↄↄ Gyudatena balaŋ burum lɛɛ Kristo nombia ŋan di. Te Girikitena ala baŋ ba wose man dana obuo na Girikitena baala burum mↄ lɛɛ Kristo nombia ŋan di. 13Gyudatena baŋ be kyaa Tesalonika kenyii nyi Pↄↄl ne yako Wurubuarɛ nombia ŋan Beria mↄ nɛ, be kↄŋawↄ kaa wosi botↄↄ wↄlɛɛ Pↄↄl na ↄ tebia fa wↄ. 14Debokenaŋ man te Kristotena baŋ lↄↄ Pↄↄl gbɛɛ te ↄ laŋa ɛpo nↄↄman. Mↄna Silase na Timoti dↄↄ baŋ dↄↄwↄ Beria botↄↄ. 15Balaŋ baŋ bↄↄ moo Pↄↄl ka tee nɛ, moo e kelii na Atɛnse donↄↄ man. Be ka bese bɛɛ kↄŋ Beria nɛ, Pↄↄl doo wↄ tiila nyi baa yako Silase na Timoti nyi be kaa tuŋ e bileŋ. 16Pↄↄl kɛɛ gyeki Silase na Timoti Atɛnse donↄↄ man nɛ, ↄ naawↄ nyi bɛɛneŋ te wulu donↄↄ keŋ man mena dↄↄ takaa e nideli. 17Mena dↄↄ ↄ gyuu Gyudatena ↄsom deni keŋ man, na ŋon na Gyudatena na balaŋ baŋ ba te yɛɛ Gyudatenawↄ ya te bee yee Wurubuarɛ nɛ, na gyoo Wurubuarɛ nombia ŋan man nideli. Mena te wee kamasɛ mↄ, ↄ ne kolosi fa balaŋ baŋ bɛɛ kↄŋ botↄↄ keŋ balaŋ ne gyaŋee nɛ. 18Botↄↄ te wolala baale baŋ bɛɛ baake wↄ nyi Epikuritena na Setↄyikitena nɛ, na ŋon Pↄↄl wↄŋee nombia ŋaale. Pↄↄl kekolosi lee Yesu kabese foŋ lee yeŋ man nombia nɛ, balaŋ baale bↄↄsewↄ nyi "Na woŋ yaa nkpee kei ne yako baa? Te baale mↄ kpa, mberem ↄ ne kolosi bɛɛneŋ wↄlɛɛ baale nombia bo." 19Mena dↄↄ ba moo Pↄↄl gyu be dɛɛgyaŋee keŋ bɛɛ baake ke nyi Areopaguse nɛ, kegyiise siaman. Te be bↄↄse Pↄↄl nyi, "Nyaŋ ke tale lese n kawola wↄle kei man wola daa? 20Nawolo nyi n nombia ŋan n na wolo nɛ, ta bese nombia wↄlɛɛ da deŋela man. Mena dↄↄ dɛɛ gyae nyi n ka lese ŋe man wola daa." 21Balaŋ baŋ be kyaa Atɛnse donↄↄ keŋ man na ŋↄↄla baŋ be kyaa botↄↄ nɛ, bɛɛ yɛɛ kolo kpu na nombia wↄlɛɛ kenyii na ŋa keyako ya. 22Keŋte Pↄↄl korowↄ seŋ kegyiise baŋ be kyaa Areopaguse dɛɛgyaŋee keŋ siaman te ↄ yako wↄ nyiaa, "Atɛnsetena, ma te naa nyi gbɛɛ kamasɛ man na, ɛ dana yↄ ↄsom keŋ man nideli. 23Nawolo nyi ma keta mee kila donↄↄ keŋ na, me naa abↄↄ ŋan ɛ na som nɛ, te me naawↄ nyi ɛ te ŋmarase gyakaa ɛ kedeesa boe daale dↄↄ nyi, 'Wurubuarɛ ŋon dↄↄ gyeŋ e ya nɛ kedeesa boe.' Mena Wurubuarɛ ŋon ɛ ba gyeŋ e ya te ɛ na som e nɛ, ↄ nombia yaa mɛɛ gyae maa yako ŋon nɛ. 24Wurubuarɛ ŋon ↄ be yɛɛ tɛɛle kei na kpene kamasɛ keŋ doo ke man nɛ, ŋon yɛna adido na ateta Gbeŋgyoo. Ↄ bɛɛ kyaa denɛɛ ŋan denibalaŋ be bam te bɛɛ som ŋe man nɛ man ya. 25Te yɛɛ mↄ nyi kolo ne hia na e, te ↄ ne gyae nyi denibalaŋ baa yɛɛ fa e ya. Nawolo nyi ŋon ne faa na balaŋ pou nyeedoŋ na weesɛɛ na kpene kamasɛ. 26Walaŋ dokoloŋ dↄↄ, te ↄ tɛɛwↄ yela debiise balaŋ pou kↄŋawↄ tɛɛle kei dↄↄ. Ŋon see na debaŋ, na botↄↄ keŋ walaŋ kamasɛ waa kyaa tɛɛle kei dↄↄ. 27Wurubuarɛ yɛɛ kɛŋa pou see na balaŋ kenyiŋ kɛo e na baa naa e. Mↄna ↄ be dana lem lee de man ŋolo gyaŋ ya. 28Ŋgba mena keŋ ŋolo be yako see nyi, ŋon dↄↄ te de dana nyeedoŋ te dɛɛ tale wosi da wose te de kyaa nɛ. Ɛmɛɛ gbagba ɛ nↄↄneŋ kpeere ŋolo yako nombii kei nyi, daa mↄ de yɛɛ ↄ biawↄ. 29Mena dↄↄ keŋ de yɛɛ ↄ biawↄ dↄↄ, de na kɛɛ nyi Wurubuarɛ yɛɛ ŋgba kↄba yayam, yaa nyeele wolom, yaa boe keŋ balaŋ ba mo ba agyueŋ na ba adao mo ke yɛɛ bane see nɛ ya. 30Gyaŋgba keŋ na Wurubuarɛ lese ↄ sia lee nombia ŋan balaŋ ba gyeŋ ya te bɛɛ yɛɛ nɛ dↄↄ. Mↄna nɛnɛɛ dↄↄ ↄ ne faree balaŋ pou yenaŋ kamasɛ nyi, baa kyɛɛkee lee be gbɛɛneŋ kumɛɛ man na baa kↄŋ ↄ gyaŋ. 31Nawolo nyi ↄ ta lese wee daale see, keŋ waa ta walaŋ ŋon ↄ ba lese see nɛ dↄↄ, na waa di walaŋ kamasɛ nombia gbɛɛ kpaakpaate man. Mena keŋ balaŋ kenyiŋ gyeŋ nyi mena nombia kɛŋa yɛɛ ampaŋ dↄↄ, te ↄ gyuusu walaŋ ŋonaŋ lee yeŋ man." 32Balaŋ baŋ kenyii mena keŋ Pↄↄl ne kolosi lee yeŋ wↄle kefoŋ wose man nombia nɛ, be man baale kulu e te baale mↄ yako e nyi, "Dɛɛ gyae n ka bese yako daa mena nombia kɛŋa bela." 33Mena dↄↄ Pↄↄl korowↄ lee balaŋ baŋ degyaŋee keŋ man. 34Balaŋ baŋ baale seŋawↄ Pↄↄl wↄle te be lɛɛ Yesu di. Be man baale yɛna Dinisuse ŋon ↄ yɛɛ botↄↄ keŋ bɛɛ gyaŋee nɛ kegyia ŋolo e, na alo ŋon bɛɛ baake e Damarise nɛ, na be man balaŋ burum baale.

will be added

X\