Kpilala 16

1Pↄↄl gyuu Dɛbi donↄↄ man, te ↄ gyuu Listra donↄↄ man mↄ. Botↄↄ te ↄ ke naa Kristo baale ŋolo ŋon bɛɛ baake e nyi Timoti nɛ. Ↄ naa yɛɛ Gyuda alo ŋon ↄ be lɛɛ Yesu di, mↄna ↄ kya yɛɛ Giriki baale e. 2Kristotena baŋ pou be kyaa Listra na Ikonium donↄↄse man nɛ dii adansɛɛ kpaakpaate lee ↄ wose man. 3Na Pↄↄl ne gyae waa mo Timoti sila ↄ wose dↄↄ, ↄ yela be kara ↄ baala wose, nawolo nyi Gyudatena baŋ pou be kyaa botↄↄ nɛ gyeŋ nyi Timoti ↄ kya yɛɛ Giriki baale e. 4Ba ke ta bɛɛ lam donↄↄse ŋan man nɛ, be yako wↄ nombia ŋan Kristo kpilala na kegyiise baŋ be kyaa Gyerusalɛm be yako see nyi baa di ŋe dↄↄ nɛ. 5Mena dↄↄ Kristotena baŋ seŋawↄ keŋkeŋ ba kelɛɛdi keŋ man nideli, na wee kamasɛ na balaŋ ne kaa kpuu na wↄ. 6Pↄↄl na ↄ tebia tɛɛwↄ ka mo na Firigia na Galatia tɛɛlese ŋan man, nawolo nyi Wurubuarɛ feliŋ ŋon te fa wↄ gbɛɛ nyi baa gyu kekolosi nombia ŋan Esia tɛɛle man ya. 7Be ke gyu kelii Misia tɛɛle wulu man nɛ, be yɛɛ kakyeŋ nyi baa gbaa gyoo Bitinia tɛɛle man, mↄna Yesu feliŋ ŋon te fa wↄ gbɛɛ ya. 8Mena dↄↄ be gbaa Misia tɛɛle man tisi laŋ Torase donↄↄ man. 9Ke nelim na, te Pↄↄl naa kolo na ↄ sia ŋgba dosɛɛ man nɛ nyi, ↄ te naa balee ŋolo ta lee Masedonia tɛɛle man kↄŋ ↄ na sola e nyi, "Gbaa kↄŋ de gyaŋ Masedonia na n kaa kyↄ daa." 10Pↄↄl kena ke pɛ, te da korowↄ desina da wose bileŋ na dee gyu Masedonia nawolo nyi, de lɛɛwↄ di nyi Wurubuarɛ baake na daa nyi dee gyu ke yako Kristo nombia kpaakpaa ŋan fa balaŋ botↄↄ mↄ. 11Da moo degbele dinaa lee Torase teeŋ gyu Samoterase. Tɛɛ naawↄ na te de gyuu Neyapolise donↄↄ man. 12De ka lee botↄↄ na, te de gyuuwↄ Filipi donↄↄ man. Filipi donↄↄ kenaŋ yɛɛ Masedonia tɛɛle yenaŋ daale donↄↄ dinaa ke. Na Romantena kyaa donↄↄ kenaŋ man burum, te de kyaawↄ botↄↄ weeya akalansɛɛ ŋaale. 13Gyudatena kefɛɛfowee kelii nɛ, te da leewↄ donↄↄ keŋ man gyu boo daale nↄↄman. Na da gyeŋ nyi dɛɛ naa Gyudatena dɛɛgyaŋee fane botↄↄ. De lii botↄↄ na te de tisiwↄ kyaa. Na ala baale te yilaa botↄↄ, te de fiasɛɛ dee kolosi Wurubuarɛ nombia fa wↄ. 14Ala baŋ bↄↄ tei de nombia nɛ, man ŋolo yele yɛna Lidia. Ↄ lee Tiatira donↄↄ keŋ man te ↄ ne yↄↄ agoo kanyaŋse ŋaale, na ↄ yɛɛ walaŋ ŋon mↄ ↄ na som Wurubuarɛ nideli. Mena dↄↄ de Gbeŋgyoo toro wa agyueŋ, te ↄ lɛɛ nombia ŋan Pↄↄl ne yako nɛ do nideli. 15Mena dↄↄ be sↄↄ ŋon na ↄ dekpaŋalaŋmantena pou Wurubuarɛ loŋ. Te ↄ yako wↄ nyi, "Akpaa ɛ te lɛɛ maŋ do nyi ampaŋ ma te lɛɛ de Gbeŋgyoo Yesu di na, kenaŋ na mɛɛ sola ŋon nyi ɛ kↄŋ kaa kyaa me dɛɛ." Te ↄ waase daa nideli mo daa gyu ↄ dɛɛ. 16Wee daale nɛ da korowↄ dee gyu botↄↄ keŋ bɛɛ fane nɛ, te de gyaŋee na alebubii ŋolo na ↄ yɛɛ balaŋ baale alebu e. Feliŋkum daale doo ↄ man, keŋ ne yeli ↄ ne tale gbala. Lee ↄ kegbala dↄↄ ↄ gbeŋgyoona baŋ nyiŋa kↄba nideli. 17Botↄↄ te alebu kei sila daa na Pↄↄl na ↄ ne fae yeesa nyi, "Balaŋ kɛwↄ yɛna Wurubuarɛ adidote ŋon tewulɛɛ. Mena keŋ ɛ ke yɛɛ na Wurubuarɛ ke lɛɛ ɛ nyee nɛ yaa bɛɛ wola ŋon nɛ." 18Ↄ yɛɛwↄ mena weeya burum te yɛɛ Pↄↄl ahiŋ te ↄ gɛɛsewↄ kɛɛ e, te ↄ faree e yako nyiaa, "Lee Yesu Kristo yele man, mɛɛ yako nyaŋ feliŋkum keŋ doo ↄ man nyi, lee ↄ man!" Debokenaŋ man te feliŋkum keŋ leewↄ ↄ man laŋ. 19Debaŋ keŋ alebu ŋon gbeŋgyoona be naa nyi be kↄba kenyiŋ gbɛɛ te tↄↄ nɛ, te ba ke kyaŋa Pↄↄl na Silase te be wↄŋee wↄ gyu kegyiise dɛɛgyaŋee man balaŋ nsana. 20Ba moo wↄ gyu Roman kegyiise gyaŋ te ba ke yako wↄ nyi, "Balaŋ kɛwↄ yɛɛ Gyudatenawↄ, te ba te kↄŋ bɛɛ wↄlɛɛ donↄↄ keŋ. 21Bɛɛ wola abↄↄ ŋan na seŋ tia da mmaraase. Daa yɛɛ Romantenawↄ, dↄↄ gyae dɛɛ tale di ŋe dↄↄ ya." 22Mena dↄↄ balaŋ dikpii keŋ pou kaa kyↄↄ wↄ te ba seŋawↄ tia wↄ. Kegyiise baŋ yela ba kpee Pↄↄl na Silase kegbase te be yela dambiise yee wↄ nideli. 23Be ke tuku wↄ nideli taŋ nɛ ba moo wↄ do deni man, te be faree deni keŋ dↄↄ kɛɛre ŋon nyi waa tↄ deni keŋ nideli na bↄↄ nyiŋ lee ya. 24Deni keŋ dↄↄ kɛɛre ŋon kenyii nombia kɛŋa dↄↄ, ↄ moo wↄ do deni tↄↄmante keŋ man te ↄ gyↄↄ wↄ ↄpaŋ be nawↄↄ man. 25Kelii tɛɛ nsana nɛ, Pↄↄl na Silase korowↄ bɛɛ fane na bee kpee nↄↄneŋ lese Wurubuarɛ yele. Na balaŋ akaŋ baŋ mↄ be doo deni man nɛ ne tei wↄ. 26Debokenaŋ man te tɛɛle wosiwↄ keŋkeŋ, te deni keŋ mokↄↄ wosiwↄ. Denɛɛ ŋan anaanↄↄse pou torowↄ, te be nawↄↄ leewↄ ↄpaŋ keŋ man. 27Deni keŋ dↄↄ kɛɛre ŋon kefoŋ nɛ, ↄ naawↄ nyi denɛɛ ŋan ta toro te ↄ wↄŋa ↄ sila lese nyi waa ko ↄ wose. Nawolo nyi ŋon gyeŋ nyi balaŋ baŋ pou be doo deni keŋ man nɛ ta lee yeu. 28Keŋte Pↄↄl fae yeesa keŋkeŋ yako e nyi, "Na gooli n wose ya, de popou kyaa kɛbo!" 29Mena dↄↄ deni keŋ dↄↄ kɛɛre ŋon yela ba moo kanea kↄna e, te ↄ yeuwↄ gyoo deni keŋ man te ↄ ke ŋmiŋawↄ Pↄↄl na Silase nawↄↄ tɛɛ. Na ↄ ne seree kpakpakpakpa. 30Te ↄ moo wↄ lee te ↄ bↄↄse wↄ nyi, "Ɛ waase da, woŋ te maa yɛɛ na Wurubuarɛ ke lɛɛ ma nyee?" 31Botↄↄ te be tiranↄↄ yako e nyi, "Lɛɛ de Gbeŋgyoo Yesu di, na Wurubuarɛ ke lɛɛ ɛmɛɛ na n dekpaŋalaŋmantena pou nyee." 32Te be kolosi de Gbeŋgyoo Wurubuarɛ nombia ŋan fa deni keŋ dↄↄ kɛɛre ŋon na ↄ dekpaŋalaŋmantena pou. 33Botↄↄ te deni keŋ dↄↄ kɛɛre ŋon moo Pↄↄl na Silase gyu ka nyekee be gyamɛɛ, te baŋ mↄ sↄↄ ŋon na ↄ dekpaŋalaŋmantena pou Wurubuarɛ loŋ. 34Ↄ moo wↄ gyu ↄ dɛɛ ke fa wↄ weenɛɛ. Yɛɛ ŋon na ↄ dekpaŋalaŋmantena pou gyoŋ, nawolo nyi ba te kaa lɛɛ de Gbeŋgyoo Wurubuarɛ di. 35Tɛɛ kena te Romantena kegyiise baŋ kpila kotↄtↄↄtena kegyiise nyi, baa gyu keyako deni keŋ dↄↄ kɛɛre ŋon nyi, "Waa lese Pↄↄl na Silase na baa ta." 36Mena dↄↄ deni keŋ dↄↄ kɛɛre ŋon yako Pↄↄl nyi, "Kegyiise baŋ te kpila balaŋ kↄŋ nyi maa tina ŋon yela na ɛ ke ta, mena dↄↄ ɛ ke tale ta wosefɛɛreŋ man." 37Mↄna Pↄↄl yako kotↄtↄↄtena kegyiise baŋ nyi, "Be te di de nombia ya te be tuku daa balaŋ nsana te be kyaŋa daa ke tↄ deni, keŋ de yɛɛ Romantena gbagbawↄ. Te nɛnɛɛ bɛɛ gyae baa yo tina daa yela nyi dɛɛ ta. Koa, dↄↄ gyu ya, kegyiise baŋ gbagba baa kↄŋ na be kaa lese daa." 38Mena dↄↄ kotↄtↄↄtena kegyiise baŋ besewↄ gyu ke yako nombia kɛŋa fa Romantena kegyiise baŋ. Te be kenyii nyi Pↄↄl na Silase yɛɛ Romantenawↄ nɛ, gyakoloŋ gyoo wↄ. 39Mena dↄↄ be kↄŋawↄ be gyaŋ kaa doo wↄ teree, te ba lese wↄ lee deni keŋ man, te be waase wↄ nyi baa lee be donↄↄ keŋ man. 40Pↄↄl na Silase ka lee deni keŋ man nɛ, be gyuu alo ŋon bɛɛ baake e nyi Lidia nɛ dɛɛ. Te ba ke naa Kristotena baŋ botↄↄ te be kolosiwↄ fa wↄ do wↄ kakyeŋ te be laŋawↄ.

will be added

X\