Kpilala 15

1Balaŋ baale leewↄ Gyudia tɛɛle man kↄŋ Antiↄke donↄↄ man bɛɛ wola Kristotena baŋ nyi, "Nyi akpaa ɛ te kara ɛ baala wose ŋgba mena keŋ Wurubuarɛ mmaraase ŋan ↄ be yela Mosesi be ŋmarase see nɛ nawolo ya na, Wurubuarɛ be gyae waa tale lɛɛ ɛ nyee ya." 2Mena dↄↄ aŋmaareŋ dinaa daale gyoo balaŋ benaŋ na Pↄↄl na Banabase nsana. Keŋte Kristotena baŋ lese Pↄↄl na Banabase na Antiↄke Kristotena baŋ baale te be kpila wↄ Gyerusalɛm na be kaa naa Kristo kpilala baŋ na ↄsom kegyiise baŋ lee nombii kei dↄↄ. 3Kristotena baŋ ke lↄ wↄ gbɛɛ taŋ nɛ, ba moowↄ Fonisia na Samaria tɛɛlese man. Te be yako be tebia Kristotena baŋ be kyaa botↄↄ nɛ, mena keŋ balaŋ baŋ ba te yɛɛ Gyudatenawↄ ya nɛ ke lɛɛ Yesu nombia ŋan di. Kristotena baŋ nyii nombia kɛŋa na, yɛɛ wↄ gyoŋ nideli. 4Be ke gyu ka gyoo Gyerusalɛm nɛ, Kristo kpilala baŋ na ↄsom kegyiise na Kristotena dikpii keŋ pou lɛɛ wↄ nideli, te baŋ mↄ yako wↄ kpene kamasɛ keŋ Wurubuarɛ be tɛɛ be dↄↄ yɛɛ nɛ. 5Te balaŋ baŋ nafↄ be doo Farasiitena dikpii keŋ man te nɛnɛɛ bↄↄ lɛɛ Yesu di nɛ, man baale korowↄ seŋ te be yako wↄ nyi "Kaboena nyi baa yela baŋ ba te yɛɛ Gyudatenawↄ ya nɛ, ke kara be baala wose na baa di Wurubuarɛ mmaraase ŋan ↄ be yeli Mosesi be ŋmarase see nɛ dↄↄ." 6Mena dↄↄ Kristo kpilala baŋ, na ↄsom kegyiise baŋ gyaŋeewↄ na baa gyoo nombia ŋenaŋ man. 7Ba ke kyↄↄle dↄŋa gyu siaman nɛ, Pita korowↄ seŋ te ↄ yako wↄ nyi, "Me tebia, ɛmɛɛ gbagba ɛ gyeŋ nyi leenaŋ kewalaŋ keŋ, te Wurubuarɛ lese maŋ nyi maa kolosi Kristo nombia kpaakpaa ŋan fa balaŋ baŋ ba te yɛɛ Gyudatenawↄ ya nɛ, na baa nyiŋ nyii na baa lɛɛ Yesu di. 8Wurubuarɛ ŋon ↄ gyeŋ walaŋ kamasɛ konↄↄ man nombia nɛ, lesewↄ wola nyi ↄ te lɛɛ wↄ do lee ↄ feliŋ ŋon ↄ ba mo do be man, ŋgba mena keŋ ↄ ba mo do daa mↄ man nɛ dↄↄ. 9Wurubuarɛ te kɛɛ wↄ nyi be yɛɛ balaŋ kpoo lee de man ya, mↄna ↄ moo be nombiakumɛɛ kyɛɛ wↄ lee keŋ bↄↄ lɛɛ Kristo di dↄↄ. 10Nɛnɛɛ weera te ɛ ne gyae ɛ ke kɛɛse Wurubuarɛ kɛɛ, keŋ ɛ ne gyae ɛ ka mo kasolↄ keŋ daa na de naanaↄ te tale seele ya nɛ, seele baŋ bↄↄ lɛɛ Yesu di nɛ? 11Ɛ na yeli ke kↄŋ mena ya! Dɛɛ lɛɛ di nyi de Gbeŋgyoo Yesu bɛrɛɛ keŋ dↄↄ te Wurubuarɛ lɛɛ da nyee, ŋgba mena keŋ ↄ be lɛɛ baŋ mↄ nɛ." 12Balaŋ baŋ pou bↄↄ gyaŋee nɛ, kyaawↄ yididi debaŋ keŋ bee tei Banabase na Pↄↄl ne yako wↄ mena keŋ Wurubuarɛ be tɛɛ be dↄↄ yɛɛ gyakoloŋ nombia na nombia dinaana balaŋ baŋ ba te yɛɛ Gyudatenawↄ ya man nɛ. 13Ba kekolosi taŋ nɛ, te Gyemisi mↄ gyinaa ↄ nↄↄ nyi, "Ɛ tei me gyaŋ, me tebia. 14Debokeiman te Simↄn Pita yako daa mena keŋ Wurubuarɛ be taŋgbɛɛ yɛɛ wola daa nyi ↄ ne gyae balaŋ baŋ ba te yɛɛ Gyudatenawↄ ya nɛ, te ↄ lese be man baale mo yɛɛ ↄ wui. 15Nombia kɛŋa na Wurubuarɛ akpeŋkpeŋgyↄↄra nombia ŋan te yɛɛ dokoloŋ. Nawolo nyi be ŋmarasewↄ see nyi Wurubuarɛ kpa nyi, 16'Kei wↄle na, maa bese kↄŋ na maa bese ma Defidi dekpaŋalaŋ keŋ be yɛlɛɛ nɛ, na maa desina ka abↄↄ ŋan be wↄlɛɛ nɛ, na ke ka seŋ nideli. 17Denibalaŋ akaŋ baŋ na balaŋ baŋ pou ba te yɛɛ Gyudatenawↄ ya te mↄↄ lese wↄ yɛɛ me wui nɛ, baa kɛo maŋ be Gbeŋgyoo Wurubuarɛ ŋon. 18Nnɛ yaa maŋ ɛ Gbeŋgyoo Wurubuarɛ ŋon, mↄↄ wulaa lese kɛŋa wola lee gyaŋgba nɛ ne yako!' " 19Gyemisi besewↄ gyina ↄ nↄↄwoya ŋan dↄↄ nyi, "Ma agyueŋ man na, ɛ na yeli dɛɛ mo nombia ŋaale ŋere balaŋ baŋ ba te yɛɛ Gyudatenawↄ ya, te bɛɛ mo ba wose fa Wurubuarɛ nɛ ya. 20Mↄna ɛ yela dɛɛ ŋmarase wↄ tↄne nyi, be na di bane dɛɛ weenɛɛ ya, na baa lese ba wose lee kafoŋ nombia man. Be na di wonembu ŋon ba te kara ↄ nyee ya te ↄ ba yem nɛ na wonembu fatabo ya. 21Nawolo nyi be wula bɛɛ kala Wurubuarɛ mmaraase ŋan ↄ ba mo fa Mosesi nɛ Gyudatena ↄsom deni man kefɛɛfowee kamasɛ, te bee kolosi ↄ nombia ŋenaŋ donↄↄ kamasɛ mↄ man." 22Keŋte Kristo kpilala baŋ na ↄsom kegyiise baŋ na Kristotena dikpii keŋ mantena akaŋ pou yɛɛ nↄↄ nyi baa lese be man balaŋ baale na baa kpu na Pↄↄl na Banabase, na baa kpila wↄ Antiↄke. Mena dↄↄ ba lese Gyuda ŋon bɛɛ baake e nyi Basabase nɛ, na Silase baŋ ba wose man dana obuo be man nɛ. 23Nↄↄwoya ŋan doo tↄne keŋ man yɛna nyi. "Daa Kristo kpilala na ↄsom kegyiise na ɛ tebia baŋ be kyaa Gyerusalɛm donↄↄ man nɛ, ne ŋmarasena tↄne kei dee yelee ɛmɛɛ Kristotena baŋ ɛ te yɛɛ Gyudatenawↄ ya, te ɛ kyaa Antiↄke na Siria na Silisia tɛɛlese man nɛ. Dɛɛ do ŋon nↄↄ. 24De te nyii nyi balaŋ baale ta lee de man kↄŋ ɛ gyaŋ, kaa mo nↄↄwoya ŋaale bɛɛ ŋere ŋon te bɛɛ do ŋon kaale, keŋ nyi na daa faa na wↄ gbɛɛ ya. 25Mena dↄↄ de gyaŋeewↄ kolosi see nyi, dɛɛ lese balaŋ baale kpu na de gyoona kpaakpaa Banabase na Pↄↄl, na dee kpila wↄ ɛ gyaŋ. 26Be yɛɛ balaŋ baŋ lee de Gbeŋgyoo Yesu Kristo yele man dↄↄ, te ba moo ba wose fa yeŋ. 27Keŋ dↄↄ te dee kpila Gyudase na Silase mↄ, na baa mo be nↄↄ yako ŋon nombia ŋan dↄↄ ŋmarase do tↄne keŋ man nɛ. 28Daa na Wurubuarɛ feliŋ ŋon te sɛɛ nyi dↄↄ gyae dɛɛ mo nombia ŋaale ŋere ŋon ya. Mↄna ŋan dɛɛ gyae ɛ ke yɛɛ yɛna nyi, 29ɛ na di bane dɛɛ weenɛɛ, yaa wonembu fatabo yaa wonembu ŋon ba te kara ↄ nyee te ↄ ba yem nɛ ya. Nɛnɛɛ mↄ ɛ lese ɛ wose lee kafoŋ nombia man. Akpaa ɛ lese ɛ wose lee kɛŋa pou man na, kpene kamasɛ gyae ke de fa ŋon. De nↄↄwoya ↄto yaa. Ɛ kyaa nideli." 30Be lↄↄ balaŋ baŋ bↄↄ kpili nɛ gbɛɛ, te be laŋa Antiↄke. Be ke gyu ka gyoo botↄↄ nɛ, be yilaa Kristotena dikpii keŋ pou te ba moo tↄne keŋ fa wↄ. 31Balaŋ baŋ ke kala tↄne keŋ nɛ, yɛɛ wↄ gyoŋ lee mena keŋ bↄↄ do wↄ kakyeŋ nɛ dↄↄ. 32Gyudase na Silase baŋ mↄ be yɛɛ Wurubuarɛ akpeŋkpeŋgyↄↄrawↄ nɛ kolosiwↄ nideli do wↄ kakyeŋ na doŋ. 33Be ke di weeya akalansɛɛ ŋaale nɛ, Kristotena baŋ be kyaa botↄↄ nɛ lↄↄ wↄ gbɛɛ wosefɛɛreŋ man te ba besewↄ laŋ balaŋ baŋ bↄↄ kpila wↄ nɛ gyaŋ. 34Mↄna Silase yɛɛ wa agyueŋ nyi waa dↄↄ botↄↄ. 35Pↄↄl na Banabase kyaawↄ Antiↄke kyare kyomii, te baŋ na balaŋ burum baale kolosi de Gbeŋgyoo Wurubuarɛ nombia ŋan fa balaŋ te ba wola wↄ mↄ. 36Debaŋ daale wↄle nɛ, Pↄↄl yako Banabase nyi, "Yela dɛɛ bese gyu donↄↄ kamasɛ keŋ man dↄↄ gyu kekolosi de Gbeŋgyoo Yesu nombia ŋan nɛ, na de kaa kɛɛ balaŋ baŋ bↄↄ lɛɛ Kristo nombia ŋan di nɛ kekyaabii man." 37Nafↄ Banabase gyaewↄ nyi waa mo Gyↄn Maake kpu na ba wose. 38Mↄna Pↄↄl kɛɛ ke nyi tekaboena nyi waa sila wↄ ya. Nawolo nyi ba ke kyaa Pamfilia nɛ, ↄ te yɛɛ tom na wↄ kelii ↄto ya, mↄna ↄ tinaa wↄ yela botↄↄ. 39Mena dↄↄ kewↄŋee dinaa daale gyoo ba nsana te be tira dↄŋa. Banabase moo Maake te ba moowↄ loŋ dↄↄ laŋ Saiporↄse. 40Te Pↄↄl mↄ moo Silase, te Kristotena baŋ fanewↄ nyi de Gbeŋgyoo Wurubuarɛ waa mo ↄ bɛrɛɛ boele wↄ te be lↄↄ wↄ gbɛɛ. 41Pↄↄl tɛɛwↄ Siria na Silisia tɛɛlese man do Kristotena baŋ kakyeŋ.

will be added

X\