Kpilala 14

1Pↄↄl na Banabase ka gyoo Ikonium donↄↄ keŋ man nɛ, be gyuu Gyudatena ↄsom deni keŋ man ŋgba mena keŋ bɛɛ taŋ yɛɛ nɛ. Be kolosi Wurubuarɛ nombia ŋan nideli, te Gyudatena na baŋ ba te yɛɛ Gyudatenawↄ ya nɛ burum lɛɛ Yesu di. 2Mↄna Gyudatena baŋ bↄↄ bɛɛ nyi bↄↄ lɛɛ Yesu di ya nɛ, feefuwↄ do baŋ ba te yɛɛ Gyudatenawↄ ya nɛ te ba korowↄ seŋ tia Pↄↄl na Banabase. 3Pↄↄl na Banabase kyaawↄ botↄↄ weeya akalansɛɛ ŋaale, te be gyↄↄ be konↄↄ kolosi de Gbeŋgyoo Yesu nombia ŋan. Ŋon mↄ seŋawↄ be wↄle te ↄ moo ↄ bɛrɛɛ boele wↄ, te be yɛɛ nombia dinaana na gyakoloŋ nombia botↄↄ wola nyi ↄ nombia ŋan bee kolosi nɛ doo na ŋe gbɛɛ. 4Mena dↄↄ donↄↄ keŋ man balaŋ kpasewↄ akpeŋ ala. Dekpeŋ daale seŋawↄ Gyudatena baŋ wↄle, te daale mↄ seŋawↄ Kristo kpilala baŋ wↄle. 5Keŋte Gyudatena na baŋ ba te yɛɛ Gyudatenawↄ ya nɛ, man baale na be siamantena yɛɛ nↄↄdokoloŋ nyi, baa naase Pↄↄl na Banabase diyem na baa fuŋii wↄ boya. 6Pↄↄl na Banabase ke nyii mena nombia kɛŋa nɛ, be yeuwↄ lee donↄↄ kenaŋ man gyu Listra na Dɛbi donↄↄse ŋan kyaa Likonia tɛɛle man nɛ, na donↄↄse ŋan benaa na botↄↄ nɛ pou kekolosi Wurubuarɛ nombia kpaakpaa ŋan. 8Be ke gyu kelii Listra donↄↄ keŋ man nɛ, na ↄtakase ŋolo kyaa botↄↄ keŋ nyi leenaŋ bↄↄ lola e na, ↄ te tale ta koro ta ya. 9Ↄ ke kyaa botↄↄ ↄ ne tei Pↄↄl kekolosi nɛ, Pↄↄl kɛɛ e yididi te ↄ naawↄ nyi ↄ kelɛɛdi gyae ke tale yela waa nyiŋ kawee kekyↄ, 10keŋte Pↄↄl yako e keŋkeŋ nyi "Koro seŋ n nawↄↄ dↄↄ." Botↄↄ te ↄtakase ŋon toŋawↄ seŋ ↄ nawↄↄ dↄↄ te ↄ fiasɛɛ ↄ ne tɛɛ. 11Balaŋ baŋ kena kpene keŋ Pↄↄl be yɛɛ nɛ, be fae yeesa be dɛɛ Likonia dei man nyi, "Bɛɛneŋ besena na ba wose yɛɛ denibalaŋ kaa seŋ de gyaŋ yaa?" 12Mena dↄↄ ba moo be bɛɛneŋ yela do Banabase na Pↄↄl. Ba doo Banabase nyi Sewuse, te ba doo Pↄↄl mↄ nyi Hemise nawolo nyi ŋon yɛna be kolosire. 13Na be bane ŋon bɛɛ baake e nyi Sewuse nɛ deni seŋɛɛ donↄↄ keŋ nↄↄman. Te bane Sewuse sae ŋon moo nunkyuese na kyeŋkyeŋkↄↄse kaa seŋ donↄↄ keŋ nↄↄman, nawolo nyi ŋon na balaŋ dikpii keŋ ne gyae baa fa Pↄↄl na Banabase kedi ŋgba bɛɛneŋ nɛ. 14Mↄna Banabase na Pↄↄl ke nyii nombia kɛŋa nɛ, be kyaŋa ba kegbase tirii na kawola nyi nombia ŋan te takaa wↄ, te ba moo yeesa yeu karatetee dokoloŋ kagyoo balaŋ dikpii burum baŋ nsana nyi, 15"De tebia, woŋ nombia yaa kɛŋa, weera ɛ ne yɛɛ mena? Daa mↄ yɛɛ denibalaŋwↄ ŋgba ɛmɛɛ nɛ. De kↄŋae de kaa yako Kristo nombia kpaakpaa ŋan fa ŋon, na ɛ ke tina ɛ nombia kɛŋa ŋan be taŋ tↄnↄↄ ya nɛ keyɛɛ yela, na ɛ ke kↄŋ Wurubuarɛ ŋon ↄ bɛɛ yem ya nɛ gyaŋ. Ŋon yɛɛna adido na ateta na ɛpo, na kpene kamasɛ keŋ doo ŋe man nɛ. 16Gyaŋgba keŋ na, ↄ yela balaŋ yɛɛ kpene keŋ baŋ gbagba ne gyae. 17Mↄna ↄ na lese ↄ wose wola nyi ↄ kyaa ampaŋ, lee deeli keŋ ↄ ne yɛɛ nɛ dↄↄ, te ↄ ne fa ŋon ↄga na ɛ wↄↄse man weenɛɛ debaŋ kpaakpaate man. Ↄ ne fa ŋon weenɛɛ te ↄ ne yeli ɛ sia na gye." 18Kristo kpilala baŋ ke yako kɛŋa koraŋ na, yɛɛ wↄ doŋ pɛte be talewↄ tↄ balaŋ baŋ gbɛɛ nyi be na fa wↄ kedi ya. 19Gyudatena baale lee Antiↄke keŋ kyaa Pisidia tɛɛle man nɛ, na Ikonium kↄŋ botↄↄ kaa wↄlɛɛ balaŋ baŋ agyueŋ te ba seŋawↄ be wↄle. Keŋte be fuŋii Pↄↄl boya, te be tuu e na tɛɛle lee donↄↄ keŋ man kelↄ donↄↄ nↄↄman. Na baŋ gyeŋ nyi ↄ ta yem. 20Mↄna Yesu silala baŋ kekↄŋ kaa yilaa ↄ gyaŋ nɛ, ↄ korowↄ bese gyu donↄↄ keŋ man. Ke tɛɛ kena na te ŋon na Banabase laŋa Dɛbi donↄↄ man. 21Pↄↄl na Banabase kekolosi Kristo nombia kpaakpaa ŋan Dɛbi donↄↄ man nɛ, balaŋ burum kↄŋawↄ kaa lɛɛ Yesu di te ba bese ↄ silala, Keŋte ba besewↄ gyu Listra na Ikonium na Antiↄke keŋ kyaa Pisidia nɛ. 22Be kolosiwↄ fa Kristotena baŋ te ba doo wↄ kakyeŋ nyi Kristo nombia ŋan bↄↄ lɛɛ di nɛ, baa kyaŋ ŋa keŋkeŋ. Ba besewↄ do wↄ kakyeŋ nyi, "Kaboena nyi dɛɛ naa diyem nideli pɛna dɛɛ tale gyoo Wurubuarɛ gyoori keŋ man." 23Kristotena dikpii kamasɛ man na, Pↄↄl na Banabase na lese siamantena fa wↄ. Ba lese wↄ taŋ na, bɛɛ bake be nↄↄ fane fa wↄ, na be ta mo be popou do de Gbeŋgyoo Kristo ŋon bↄↄ lɛɛ e di nɛ nyiŋmaa man. 24Ba ke ta kila Pisidia tɛɛle dↄↄ taŋ nɛ, be gyuu Pamfilia tɛɛle man. 25Be kolosi Kristo nombia ŋan Pɛga donↄↄ man. Be ka lee botↄↄ na, te be gyuuwↄ Atalia donↄↄ man. 26Be ka lee botↄↄ mↄ nɛ, ba moowↄ loŋ dↄↄ bese kↄŋ Antiↄke. Antiↄke botↄↄ te Kristotena baŋ fanewↄ mo wↄ do Wurubuarɛ nyiŋmaa man nyi, waa mo ↄ bɛrɛɛ boele wↄ na baa gyu ke yɛɛ tom keŋ bↄↄ yɛɛ taŋ nɛ. 27Ba ke kↄŋ kaa gyoo botↄↄ nɛ, be yilaa Kristotena dikpii keŋ pou te be yako wↄ tom keŋ pou Wurubuarɛ be tɛɛ be dↄↄ yɛɛ, na mena keŋ ↄ ba toro gbɛɛ fa balaŋ baŋ ba te yɛɛ Gyudatenawↄ ya, te baŋ mↄ be lɛɛ Kristo nombia ŋan di nɛ. 28Lee kenaŋ wↄle na, be kyaawↄ be tebia Kristotena baŋ gyaŋ weeya burum.

will be added

X\