Kpilala 12

1Debaŋ kenaŋ man te gyoo Herode fiasɛɛ ↄ ne naase Kristotena baŋ baale diyem. 2Ↄ yela ba moo sila ko Gyↄn ↄ kegyia Gyemisi. 3Ↄ kena nyi kpene keŋ ↄ be yɛɛ nɛ dana Gyudatena baŋ gyoŋ nɛ, te ↄ yela be kyaŋa Pita mↄ. Na ke yɛɛ Gyudatena wee dinaa keŋ bee di bodobodo keŋ tee keŋ ne yeli bodobodo na koro nɛ be doo ke man ya nɛ. 4Ↄ ke kyaŋ Pita do deni man wↄle nɛ, ↄ moo e do yoonↄↄtena akpeŋ anaara nyiŋmaa man nyi baa gyee e. Yoonↄↄtena banaara doo la dekpeŋ kamasɛ man. Herode yɛɛ ke nyi akpaa be di ba nyeekelɛɛwee dinaa keŋ taŋ nɛ, na waa di ↄ nombia balaŋ nsana. 5Mena dↄↄ ↄ yela Pita doowↄ deni man botↄↄ, mↄna Kristotena dikpii keŋ ne fane nideli fa Wurubuarɛ ↄ dↄↄ. 6Nelim keŋ pɛ tɛɛ kena, na gyoo Herode ka lese Pita lee deni man na baa di ↄ nombia nɛ, na ↄ doo yoonↄↄtena bala nsana keŋ bↄↄ do e agbaraagbaraase ala. Debaŋ kenaŋ na yoonↄↄtena baŋ bee gyee denanↄↄ keŋ mↄ seŋɛɛ be daseŋae man. 7Karatetee dokoloŋ na te de Gbeŋgyoo Wurubuarɛ kpilale ŋolo bɛɛwↄ lee botↄↄ te deni keŋ man ŋmaŋeewↄ. Te ↄ kyaŋa Pita ↄ degbaŋgbaŋ dↄↄ wosi e te ↄ gyuusu e yako e nyi, "Koro bileŋ." Debokenaŋ man te agbaraagbaraase ŋan leewↄ ↄ nyiŋmaase man yala. 8Botↄↄ te Wurubuarɛ kpilale ŋon yako e nyiaa, "Mo nya abↄↄ do na n ka do nyaŋ nkyokotase." Te Pita mↄ yɛɛwↄ mena te kpilale ŋon yako e bela nyi, mo n kegba wurikyim keŋ do na n ke sila maŋ. 9Te Pita sila e lee debↄↄ man. Mↄna ↄ ta gyem nyi kpene keŋ Wurubuarɛ kpilale ŋon ne yɛɛ nɛ yɛɛ ampaŋ ya. Nawolo nyi ŋon gyaŋ na, yɛɛ e bo ŋgba dosɛɛ nɛ. 10Be tɛɛwↄ gbaa balaŋ gyaŋgba nyibaŋ baŋ bee gyee botↄↄ nɛ, na baŋ be gyakaa be dↄↄ nɛ, kaboena be ke lii nyeele denanↄↄ keŋ na mo lee donↄↄ keŋ man nɛ gyaŋ. Be kelii botↄↄ na, te nyeele denanↄↄ keŋ torowↄ fa wↄ ka wose dↄↄ, te ba leewↄ laŋ. Ba ke ta bee gyuu na, te kpilale ŋon ŋaalaawↄ yela Pita karatetee dokoloŋ. 11Botↄↄ te Pita sia ŋmaŋee e te ↄ yakowↄ nyiaa, "Nɛnɛɛ, me ta gyem nyi de Gbeŋgyoo Wurubuarɛ kpila na ↄ kpilale nyi ↄ kaa lese maŋ lee gyoo Herode nyiŋmaa man, na ŋan pou nafↄ Gyudatena be bake see nyi baa yɛɛ maŋ nɛ." 12Pita kena mena nombia kɛŋa nɛ, te ↄ gyuu Gyↄn Maake ↄ naa Mɛɛre dɛɛ. Debaŋ kenaŋ na balaŋ burum te yilaa botↄↄ bɛɛ fane. 13Pita ke gyↄ be disim keŋ te alebu ŋolo ŋon bɛɛ baake e nyi Roda nɛ, gyuuwↄ ke kɛɛ nyi amↄte ne gyↄↄ laa. 14Ↄ ke gyu kenyii woya ŋan te ↄ ba gyem nyi Pita woya ŋenaŋ nɛ, yɛɛ e gyoŋ nideli te ↄ woleewↄ nyi waa toro e denanↄↄ keŋ. Mena dↄↄ ↄ yeuwↄ keyako wↄ nyiaa, "Pita te kↄŋ ↄ seŋɛɛ denanↄↄ man!" 15Te be bↄↄse e nyiaa, "Yaa n na gyoo diteŋ bo?" Mↄna ↄ yase ↄ sia yako wↄ nyi yɛɛ ampaŋ. Keŋte be yakowↄ nyi gyae ke yɛɛ ↄ woo bo. 16Na Pita gyakaa bo ↄ ne gyↄ denanↄↄ keŋ. Nɛnɛɛ be ka toro denanↄↄ keŋ na Pita seŋɛɛ laa, mena dↄↄ ba wose gbirisi wↄ. 17Te Pita gyina ↄ nyiŋmaa adido mo yako wↄ nyi baa wu be nↄↄ. Te ↄ yako wↄ mena keŋ de Gbeŋgyoo Wurubuarɛ ba lese e lee deni keŋ man. Te ↄ yako wↄ nyi, "Ɛ yako Gyemisi na Kristotena akaŋ baŋ mena nombia kɛŋa." Te ↄ korowↄ laŋ yenaŋ wↄle. 18Tɛɛ kena keŋ nɛ, te aŋmaareŋ dinaa daale gyoowↄ yoonↄↄtena baŋ nsana. Be bↄↄse dↄŋa nyi, "Aleŋ yaa Pita moowↄ baa?" 19Gyoo Herode yela be kɛo Pita nideli, mↄna ba te naa e ya. Mena dↄↄ ↄ baake yoonↄↄtena baŋ bↄↄ gyee e nɛ, nyii be nↄↄman nombia, te ↄ yela ba koo wↄ pou. Kenaŋ wↄle nɛ, gyoo Herode leewↄ Gyudia tɛɛle man gyu kekyaa Kaesaria donↄↄ man kyomii. 20Gyoo Herode gyeŋa baŋ Taetena na Sidↄntena dↄↄ. Mena dↄↄ balaŋ benaŋ yɛɛ nↄↄ te be gyuuwↄ kena e. Be taŋgbɛɛwↄ mo nombia ŋenaŋ do Bilasituse nↄↄman nyi waa doo e teree fa wↄ, nawolo nyi donↄↄse ala ŋenaŋ pou ne nyiŋ be weenɛɛ bo lee gyoo ŋonaŋ tɛɛle man. Bilasituse yɛna gyoo ŋon dekpaŋalaŋ keŋ pou kegyia. 21Wee keŋ bↄↄ see kelii nɛ, te gyoo Herode moo ↄ gyooro abↄↄ do, te ↄ gyuuwↄ ka gyeŋ gyakaa ↄ gyooro gbeli keŋ dↄↄ te ↄ kolosiwↄ fa balaŋ baŋ pou. 22Te balaŋ baŋ pou fae yeesa yako nyi, "Kei dↄↄ te yɛɛ deniwalaŋ ne kolosi la ya, yɛɛ bane ŋolo e." 23Debokenaŋ man te de Gbeŋgyoo Wurubuarɛ kpilale kↄŋawↄ kaa gyↄ e do kawee, nawolo nyi ↄ ta lese Wurubuarɛ yele ya. Te gyoo ŋon wose pou gyoo feelɛɛ te ↄ yeŋawↄ. 24Kɛŋa pou man na, Wurubuarɛ nombia ŋan sɛɛ ŋɛɛ yaasee na balaŋ burum mↄ ne lɛɛ ŋa di. 25Debaŋ keŋ Banabase na Sↄↄl be taŋ ba tom keŋ nɛ, ba besewↄ lee Gyerusalɛm gyu Antiↄke. Be kee gyu keŋ nɛ, te ba moo Gyↄn Maake sila ba wose.

will be added

X\