Kpilala 10

1Balee ŋolo kyaawↄ Kaesaria donↄↄ man na ↄ yele yɛna Kↄnelio. Ↄ yɛɛ Itali tɛɛle yoonↄↄtena dikpii siamante e. Na yoonↄↄtena sↄŋonoŋ doo la ↄ tɛɛ. 2Ↄ yɛɛ walaŋ ŋon ↄ ba mo ↄ wose fa Wurubuarɛ, te ŋon na ↄ dekpaŋalaŋmantena pou ne yee Wurubuarɛ nideli. Ↄ dana wↄe fa Gyudatena ayematena te ↄ ne fane fa Wurubuarɛ debaŋ kamasɛ. 3Wee daale balinↄↄ weese debaŋ atoorote nɛ, ↄ naa kolo na ↄ sia ŋgba dosɛɛ man nɛ. Ↄ naa Wurubuarɛ kpilale ŋolo ta lee adido kↄŋ ↄ gyaŋ te ↄ baake e nyi, "Kↄnelio." 4Te Kↄnelio kɛɛ e yididi gyakoloŋ man te ↄ bↄↄse e nyi, "Me Gbeŋgyoo weera?" Keŋte Wurubuarɛ kpilale ŋon yako e nyiaa, "Wurubuarɛ te lɛɛ n kefane. Ↄ te naa mena keŋ n ne yɛɛ wↄe fa ayematena baŋ, te ŋe ta gyoo ↄ sia. 5Mena dↄↄ kpila balaŋ gyu Gyopa donↄↄ keŋ man, be kaa baake walaŋ ŋon bɛɛ baake e nyi Simↄn yaa Pita nɛ. 6Ↄ kyaa Simↄn ŋon ↄ ne yɛɛ wonembia tↄna wose man tom nɛ dɛɛ. Ↄ dɛɛ kyaa ɛpo nↄↄman." 7Wurubuarɛ kpilale ŋon kekↄŋ kaa kolosi fa e taŋ te ↄ be lam nɛ, Kↄnelio baake ↄ dekpaŋalaŋ man tewulɛɛ bala, na yoonↄↄtena baŋ bee gyee e nɛ man ŋolo, ŋon ↄ benaa na e te ↄ ne yee Wurubuarɛ nɛ. 8Te ↄ yako wↄ kpene keŋ pou be kↄŋ nɛ, te ↄ kpila wↄ Gyopa donↄↄ man. 9Tɛɛ kena weeseteŋteŋ keŋ be dↄŋ bee gyuu te be ka benaa Gyopa donↄↄ keŋ nɛ, debaŋ kenaŋ te Pita mↄ gyeŋawↄ laŋ abansoro dↄↄ ↄ kaa fane. 10Tanam kyaŋa e te ↄ gyae kolo waa di, mↄna debaŋ keŋ bɛɛ saa weenɛɛ ŋan nɛ, ↄ naa kolo na ↄ sia ŋgba dosɛɛ man nɛ. 11Ↄ naawↄ ŋgba adido ba toro na, te ↄ naa kolo ŋgba kanyaŋ dinaa daale nɛ, na be dana ke nↄↄsebia anaara ŋan man lee adido, te be tisinaa ke kaa see tɛɛle man. 12Na wonembia kpookpoo doo ke man. Baŋ be dana nawↄↄ anaara, na baŋ bee tuu be tↄↄse dↄↄ, na baŋ bee furufu nɛ doo ke man. 13Keŋte ↄ nyii nↄↄwoya ŋaale nyi, "Pita, koro na n ka ko di." 14Te Pita yakowↄ nyi, "Koa, dee gyu lem me Gbeŋgyoo, nawolo nyi me te dii ta kolo kum yaa kpene keŋ dɛɛ kↄle nɛ see ya." 15Te nↄↄwoya ŋan besewↄ yako e bela nyi, "Kpene keŋ Wurubuarɛ be lɛɛ do nyi ke dei nɛ, na baake ke nyi kolo anekↄlaŋ bela ya." 16Kei yɛɛwↄ mena betabotooro. Te debokenaŋ man ba moo kanyaŋ keŋ laŋ adido bela. 17Pita kekyaa ↄ na gyueŋ nombia ŋan ↄ be naa nɛ wose man nɛ, na Kↄnelio kpilala baŋ mↄ te bↄↄse gyu kena dekpaŋalaŋ keŋ man Simↄn kyaa, te be gyuuwↄ ka seŋ ka denanↄↄ man. 18Keŋte be baake ŋolo dekpaŋalaŋ keŋ man bↄↄse e nyiaa, "Kɛbo te balee ŋon bɛɛ baake e nyi Simↄn Pita nɛ kyaa?" 19Na Pita sɛɛ ↄ na gyueŋ nombia ŋan ↄ be naa nɛ wose man, te Wurubuarɛ feliŋ yako e nyiaa, "Simↄn, nyii kɛbo, tewulɛɛ batooro baale ne gyae neŋ. 20Mena dↄↄ desina n wose na n ke tisi gyu be gyaŋ. Sila wↄ ta, na lɛɛ n wose aŋmaareŋ ya nawolo nyi maŋ kpila na wↄ." 21Mena dↄↄ Pita tisiwↄ gyu balaŋ baŋ gyaŋ te ↄ ke yako wↄ nyiaa, "Maŋ yɛna walaŋ ŋon ɛ ne kɛo nɛ. Ɛ keta gyakoloŋ?" 22Keŋte balaŋ baŋ tiranↄↄ nyiaa, "De gbeŋgyoo yoonↄↄtena dikpii siamante ŋon bɛɛ baake e nyi Konelio nɛ kpila na daa n gyaŋ. Ↄ yɛɛ walaŋ ŋon ↄ ne yee Wurubuarɛ, te ŋon na e mↄ nsana dei, te Gyudatena pou ne bu e. Wurubuarɛ kpilale ŋolo kↄŋala kaa yako e nyi, waa kpila kaa mo neŋ kↄŋ ↄ gyaŋ, na waa nyii kpene keŋ n dana fa e." 23Te Pita moo balaŋ baŋ gyu ↄ dɛɛ, te ↄ yela be doowↄ ↄ gyaŋ. Tɛɛ kena keŋ nɛ, Pita desina ↄ wose te ŋon na wↄ pou laŋawↄ. Ↄ tebia Kristotena baale mↄ leewↄ Gyopa sila wↄ gyu. 24Tɛɛ kena te ba gyoo Kaesaria, na Kↄnelio ne kɛɛ be gbɛɛ mena dↄↄ ↄ yilaa ↄ loŋtona na ↄ gyoona kpaakpaa nyibaŋ. 25Pita ka gyoo dekpaŋalaŋ keŋ man nɛ, Kↄnelio kaa gyaŋeewↄ na e te ↄ tisiwↄ buŋ ↄ nawↄↄtɛɛ obuo man. 26Keŋte Pita yako e nyi "Koro, na yɛɛ mena ya. Nawolo nyi maŋ mↄ yɛɛ deniwalaŋ e ŋgba nyaŋ nɛ." 27Te ŋon na Pita moo afa keyↄↄ mo gyoo dekpaŋalaŋ keŋ man, te Pita ke naa balaŋ burum baŋ pou bↄↄ yilaa botↄↄ nɛ. 28Te ↄ yako wↄ nyi, "Ɛmɛɛ gbagba ɛ gyeŋ nideli nyi nafↄ daa Gyudatena ↄsom kɛɛ wolo man na, gbɛɛ be doo keŋ nyi Gyuda baale ka mo ↄ wose do na walaŋ ŋon ↄ te yɛɛ Gyuda baale e ya, yaa waa gyu ↄ gyaŋ ya. Mↄna Wurubuarɛ ta lese wola maŋ nyi, me na kɛɛ walaŋ ŋolo nyi ↄ yɛɛ walaŋ yakaate e ya. 29Lee mena dↄↄ n ke kpila baake maŋ na, ma te bɛɛ nyi mↄↄ kↄŋ ya. Mɛɛ gyae maa nyii kpene keŋ dↄↄ n be kpili baake maŋ." 30Botↄↄ te Kↄnelio tiranↄↄ nyiaa, "Weeya anaara yaa ŋgba me kyaa me dɛɛ mɛɛ fane balinↄↄ weese ŋgba debaŋ atoorote man nɛ, debokenaŋ man te baale ŋolo kaa bɛɛwↄ lee me dↄↄ. Na ↄ doona abↄↄ ŋan ne ŋalakee nɛ, te ↄ kaa seŋawↄ me siaman. 31Te ↄ yako maŋ nyi, 'Kↄnelio, Wurubuarɛ te nyii n kefane te ↄ ne tↄↄse n wↄe keŋ n dana fa ayematena nɛ, mena dↄↄ 32kpila gyu Gyopa donↄↄ man ke baake Simↄn Pita, ↄ kyaa Simↄn ŋon ↄ ne yɛɛ wonembia tↄna wose man tom te ↄ dekpaŋalaŋ kyaa ɛpo nↄↄman nɛ gyaŋ.' 33Mena dↄↄ te me kpila balaŋ n gyaŋ debokenaŋ man. N yɛɛ ke nideli ŋgba n be kↄŋ nɛ. Nɛnɛɛ de popou te kaa gyaŋee kɛbo Wurubuarɛ siaman dɛɛ daa neŋ, na dee nyii nↄↄwoya ŋan de Gbeŋgyoo Wurubuarɛ kpa nya yako daa nɛ." 34Botↄↄ te Pita gyinaa ↄ nↄↄwoya nyi, "Nɛnɛɛ dↄↄ ma te naa ampaŋ nyi balaŋ pou yɛɛ kyɛɛkyɛɛ Wurubuarɛ siaman, te ↄ bɛɛ kɛɛ ŋolo siaman ya. 35Mↄna walaŋ kamasɛ ŋon ↄ ne yee e te ↄ ne yɛɛ abↄↄ ŋan doo na ŋe gbɛɛ na, ↄ ne lɛɛ e do. Ↄ be famenɛ na ↄtenate dalee ya. 36Ɛmɛɛ gbagba gyeŋ nↄↄwoya kpaakpaa ŋan Wurubuarɛ ba mo fa Iseraetena nɛ. Ↄ yako wↄ nyi baa sila Kristo ŋon ↄ yɛɛ walaŋ kamasɛ Gbeŋgyoo e nɛ, na baŋ na ŋon Wurubuarɛ nsana ke de na baa nyiŋ wosefɛɛreŋ. 37Ɛ gyeŋ nombii dinaa keŋ be kↄŋ Iserae tɛɛle dↄↄ, keŋ be fiasɛɛ lee Galelia tɛɛle man debaŋ keŋ Gyↄn be kolosi lee Wurubuarɛ loŋkesↄ keŋ wose man nombia ŋan wↄle nɛ. 38Ɛ gyeŋ mena keŋ Wurubuarɛ ba mo ↄ feliŋ na ↄ doŋ keŋ do Yesu Nasarɛte baale ŋon man, mena dↄↄ Yesu tɛɛwↄ yɛɛ deeli te ↄ kyↄↄ baŋ pou ↄbↄnsam be di be dↄↄ nɛ kaweese. Ↄ yɛɛ kɛŋa pou nawolo nyi Wurubuarɛ kpuɛ na e. 39Te dee di adansɛɛ lee kpene kamasɛ keŋ ↄ be yɛɛ Gyudatena tɛɛle man na Gyerusalɛm donↄↄ man nɛ. Be gyↄↄ e sakaa ↄpaŋdaŋ dↄↄ ko. 40Mↄna weeya atoorote keŋ man nɛ, Wurubuarɛ gyuusu e lee yeŋ man, te ↄ yela ↄ lese ↄ wose wola balaŋ. 41Na balaŋ pou naa na e ya, mↄna daa baŋ Wurubuarɛ be wulaa lese nyi dɛɛ yɛɛ wa adansɛɛtena nɛ, daa daageŋ naa na e. Wurubuarɛ ke gyuusu e lee yeŋ man mↄ nɛ, daa na e diiwↄ te de nyↄↄwↄ. 42Te ↄ yako daa nyi dee kolosi ↄ nombia fa balaŋ na dee di adansɛɛ lee ↄ wose man nyi, ŋon yɛna walaŋ ŋon Wurubuarɛ ba lese nyi, waa di balaŋ baŋ bↄↄ yekee na baŋ be kyaa na be sia nɛ pou nombia. 43Wurubuarɛ akpeŋkpeŋgyↄↄra baŋ pou kolosiwↄ lee ↄ wose man nyi, walaŋ kamasɛ ŋon waa lɛɛ e di na, Wurubuarɛ waa mo ↄ nombiakumɛɛ kyɛɛ e lee Yesu yele man." 44Pita kegyakaa ↄ ne kolosi nɛ, te Wurubuarɛ feliŋ ŋon kaa gyoo baŋ pou bee tei e nɛ man. 45Te Gyudatena baŋ bↄↄ lɛɛ Yesu di te bↄↄ sila Pita kↄŋ nɛ, wose gbirisi wↄ ŋgba Wurubuarɛ ba mo ↄ feliŋ ŋon do balaŋ baŋ ba te yɛɛ Gyudatenawↄ ya mↄ man nɛ. 46Nawolo nyi be nyiiwↄ bee kolosi deise kpookpoo, na bɛɛ lese Wurubuarɛ yele. Keŋte Pita yako wↄ nyiaa, 47"Wurubuarɛ ta mo ↄ feliŋ ŋon do balaŋ kɛwↄ mↄ man, ŋgba mena keŋ keŋ ↄ ba mo do de man nɛ. Ŋolo waa tale tↄ wↄ gbɛɛ nyi be na sↄ wↄ Wurubuarɛ loŋ yee?" 48Mena dↄↄ ↄ yela be sↄↄ wↄ Wurubuarɛ loŋ lee Yesu Kristo yele man. Te ba sola e nyi, waa kyaa be gyaŋ weeya ala.

will be added

X\