2 Timoti 4

1Timoti, tↄↄse nyi de Gbeŋgyoo Yesu Kristo waa bese kↄŋ ↄ gyoorobiiri man na ↄ kaa di balaŋ baŋ be kyaa na be sia, na baŋ bↄↄ yekee nɛ pou nombia. Mena dↄↄ mɛɛ faree neŋ nideli lee Wurubuarɛ na de Gbeŋgyoo Yesu Kristo siaman nyiaa, 2kolosi Wurubuarɛ nombia ŋan fa balaŋ. Yɛɛ kakyeŋ kolosi ŋa debaŋ kamasɛ. Kolosi fa wↄ na n ka wola wↄ gbɛɛ keŋ kaboena nyi baa mo, na n ka lese nombiakumɛɛ ŋan balaŋ ne yɛɛ nɛ si wↄ, na n ka do wↄ kakyeŋ na n ke nyiŋ konↄↄ fa wↄ lee n kawola keŋ man. 3Nawolo nyi debaŋ daale gyae kekↄŋ keŋ balaŋ baa bɛɛ nyi bↄↄ tei nombia kpaakpaa ŋan ya. Te lee mena keŋ ba deŋela man na toree wↄ dↄↄ nɛ, baa ta yilaa akɛrɛɛ wolala na be kaa kolosi nombia ŋan baŋ gbagba ne gyae nyi baa nyii nɛ fa wↄ. 4Baa bɛɛ anokoare keŋ kenyii, na baa tei ŋↄla nombia. 5Mↄna nyaŋ Timoti dↄↄ, yela n sia ke doo tɛɛle man na n ke yɛɛ kakyeŋ seŋ keŋkeŋ diyem kamasɛ man. Yɛɛ tom keŋ Wurubuarɛ nombia kolosire ne yɛɛ nɛ, na n ke yɛɛ Wurubuarɛ ↄsom tom keŋ nideli kelii ↄto. 6Nawolo nyi maŋ Pↄↄl dↄↄ, ma debaŋ te lii nyi baa kyɛɛkee me fatabo leki ŋgba mena keŋ bee deesi te bɛɛ toosi soloŋ woli nɛ. Ma debaŋ te lii nyi maa lee tɛɛle kei dↄↄ. 7Ma te yoo yoo kpaakpaa keŋ taŋ, te ma te yeu keyeu keŋ mↄ kelii ↄto. Ma te kyaŋ ma kelɛɛdi keŋ man mↄ kelii ↄto. 8Mena dↄↄ de Gbeŋgyoo Yesu Kristo ŋon ↄ ne di nombia na ŋe gbɛɛ nɛ, te desina gyooro kotↄtↄↄ keŋ nawolo nyi me gbɛɛneŋ tenɛɛ nɛ see na waa mo tↄ maŋ kom. Na maageŋ te waa yɛɛ mena fa ya, mↄna baŋ pou bee gyeki ↄ kabese kↄŋ nɛ mↄ kpuɛ. 9Timoti, yɛɛ kakyeŋ na n kekↄŋ me gyaŋ bileŋ, 10nawolo nyi keŋ tɛɛle kei dↄↄ abↄↄ kegyae loo doo Demase man dↄↄ nɛ, ↄ te tina maŋ yela laŋ Tesalonika donↄↄ man. Kiresɛnse te lam Galatia donↄↄ man, te Tituse mↄ te lam Dalematia donↄↄ man. 11Luka waageŋ kyaa la me gyaŋ. N ne kↄŋ na mo Maake kpu na n wose kↄŋ, nawolo nyi ↄ ne kyↄ maŋ ma Wurubuarɛ tom keyɛɛ man. 12Me te kpila Tikikuse nyi waa gyu Efeso donↄↄ man. 13Akpaa n ne kↄŋ na, mo ma kegba wurikyim keŋ mↄↄ tina yela Kapuse gyaŋ Torase donↄↄ man nɛ na me tↄna ŋan kↄna maŋ. Tuturu na mo tↄna ŋan bↄↄ mo wonembu tↄne yɛɛ ŋa nɛ kↄna maŋ. 14Alɛkesanda ŋon ↄ yɛɛ luure e nɛ, te yɛɛ maŋ nombiikum daale. De Gbeŋgyoo waa tↄ e kom lee nombiikum keŋ ↄ be yɛɛ maŋ nɛ dↄↄ. 15Mena dↄↄ kɛɛ n wose man nideli na e, nawolo nyi ↄ bɛɛ gyae de nombia kpaakpaa ŋan dɛɛ yako nɛ korakora ya. 16Me nombia kedi gyaŋgbate keŋ man nɛ walaŋ na walaŋ ta sem me wↄle ya, be popou bɛɛ maŋ bo. Mɛɛ sola Wurubuarɛ nyi ↄ na mo mena nombia kɛŋa tↄ wↄ kom ya. 17Mↄna de Gbeŋgyoo Yesu seŋawↄ me wↄle, te ↄ doo maŋ kakyeŋ te me kolosi ↄ nyeedoŋ nombia ŋan fa baŋ pou ba te yɛɛ Gyudatenawↄ ya nɛ, te be nyiiwↄ te Wurubuarɛ lese maŋ lee yeŋ man. 18Mena dↄↄ de Gbeŋgyoo waa lese maŋ lee dukum kamasɛ man, na waa mo maŋ gyu ↄ gyoori keŋ man adido wosefɛɛreŋ man. Ŋon te kaboena nyi baa lese ↄ yele kekpaakekpaa. Amɛn. 19Mɛɛ do Pirisila na Akuila na Onesiforuse na ↄ dekpaŋalaŋmantena pou nↄↄ. 20Erasituse kyaa Korinto donↄↄ man, te me te tina Tirofimuse ŋon ↄ na wee nɛ yela Miletuse donↄↄ man. 21Yɛɛ kakyeŋ na n kekↄŋ pɛna waare debaŋ keŋ kelii. Ubuluse na Pudense na Linuse na Klↄↄdia na de tebia Kristotena baŋ pou na do neŋ nↄↄ. 22De Gbeŋgyoo Yesu Kristo waa kpu na neŋ, na Wurubuarɛ ka mo ↄ bɛrɛɛ keŋ boele ŋon.

will be added

X\