2 Timoti 3

1Me bu Timoti, tↄↄse nyi tɛɛle kei da benaa kↄ ↄto nɛ kayeyɛɛ gyae kekↄŋ. 2Nawolo nyi balaŋ baa gyae baŋ baageŋ wui bo na kↄba kegyae, na baa gyina ba wose adido na baa wola ba wose na baa tee balaŋ yakaa yakaa. Baa yɛɛ deŋele doŋ ba lolala dↄↄ te baa yɛɛ boniayɛtena te bↄↄ gyae baa gyeŋ Wurubuarɛ ya. 3Balaŋ kegyae be gyae ke doo be man ya, te bↄↄ gyae baa mo nombia kyɛɛ ya. Baa tao balaŋ kelabere te bↄↄ gyae baa tale di ba wose dↄↄ ya. Baa yɛɛ akpanyaŋnyaŋ te bↄↄ gyae baa gyae kolo kpaakpaa mↄ ya. 4Baa lese dↄŋa fa na baa barase yɛɛ abↄↄ. Baa gyina ba wose adido beiŋ na baa gyae tɛɛle kei dↄↄ gyoŋ kedi kela Wurubuarɛ. 5Baa gyae Wurubuarɛ ↄsom keŋ nombia na be sia, mↄna be konↄↄse man na bↄↄ ne lɛɛ Wurubuarɛ doŋ keŋ di ya. Mena dↄↄ lese n wose lee mena balaŋ benaŋ man. 6Mena balaŋ benaŋ baale dↄŋɛɛ la na akpaŋalaŋ akpaŋalaŋ bɛɛ beo ala baŋ bↄↄ ne tale kyaŋ ba wose ya te nombiakumɛɛ be wulu wↄ, te lookum dↄↄ bee sila gbɛɛ kum kamasɛ nɛ. 7Debaŋ kamasɛ na mena balaŋ kɛwↄ ne kasee nombia, mↄna bↄↄ gyae baa gyeŋ anokoare keŋ ya. 8Mena keŋ Gyanese na Gyamberese ba seŋ tia Mosesi nɛ, mena ke yaa balaŋ kɛwↄ mↄ na sem tia anokoare nombia ŋan. Be yɛɛ balaŋ baŋ ba nyeeya man nombia be wↄlɛɛ te bↄↄ dana daseŋae kelɛɛdi keŋ man ya. 9Mↄna bↄↄ gyae baa lii lem ya te be diyiŋ nombia ŋan gyae ka lee debↄↄ, na walaŋ kamasɛ kena ŋgba mena keŋ be yɛɛ Gyanese na Gyamberese nɛ. 10Mↄna nyaŋ dↄↄ n gyeŋ me kawola na me dinↄↄ na nombia ŋan dↄↄ ma seŋɛɛ nɛ, na ma kelɛɛdi na me konↄↄ kenyiŋ na me balaŋ kegyae na me kakyeŋ keŋ me dana, 11na mena keŋ bↄↄ naase maŋ diyem, na diyem keŋ mↄↄ naa Antiↄke na Ikonium na Listra donↄↄse man, na mena keŋ mↄↄ yɛɛ kakyeŋ seŋ keŋkeŋ diyem keŋ bↄↄ naase maŋ nɛ man. Mↄna de Gbeŋgyoo lese maŋ lee nombia kɛŋa pou man. 12Ampaŋ yaa mɛɛ yako neŋ n ke nyii nyiaa, walaŋ kamasɛ ŋon ↄ ne gyae nyi waa yɛɛ Wurubuarɛ kegyaebii lee de Gbeŋgyoo Yesu Kristo yele man nɛ, balaŋ baa naase e diyem. 13Te balaŋ kumɛɛ na baŋ bɛɛ beo balaŋ nɛ, baa bese yɛɛ nombiakumɛɛ kpu. Baa beo balaŋ na balaŋ mↄ ka beo wↄ. 14Mↄna nyaŋ dↄↄ kyaŋ kpene keŋ n be kasee te n be lɛɛdi nɛ man nideli, nawolo nyi n gyeŋ balaŋ baŋ gyaŋ n be kasee mena nombia ŋenaŋ lee. 15Nawolo nyi leenaŋ n biatɛɛ te n wulaa kasee Wurubuarɛ nombia aŋmaraseŋ see ŋan gyae ke yela n ka gyeŋ nyansa na n ke nyiŋ nyeedoŋ lee Yesu Kristo kelɛɛdi man nɛ. 16Wurubuarɛ nombia aŋmaraseŋ see ŋan pou lee Wurubuarɛ gyaŋ, te ŋe dei fa nombia kawola na nombia kalese si walaŋ, na nombia kedesina na mena keŋ n ka wola walaŋ kolo lee Wurubuarɛ kegyaebii man. 17Kei gyae ke yela Wurubuarɛ walaŋ ŋon ke desina ↄ wose nideli, na waa tale yɛɛ tom kpaakpaate kamasɛ keŋ Wurubuarɛ ne gyae nyi waa yɛɛ nɛ.

will be added

X\