2 Timoti 2

1Mena dↄↄ me bu Timoti, sola Wurubuarɛ na waa ta Yesu Kristo bɛrɛɛ keŋ dↄↄ yela n ka seŋ keŋkeŋ. 2Nombia ŋan mↄↄ wola neŋ balaŋ burum siaman nɛ, mo ŋa do balaŋ baŋ n ne lɛɛ wↄ di nɛ nyiŋmaa man, na baŋ mↄ ke tale mo wola balaŋ wↄlɛɛ. 3N nyiŋa n yɛɛ Yesu Kristo yoonↄↄte kpaakpaate e nɛ, yɛɛ kakyeŋ na n kena diyem ŋgba daa nɛ. 4Yoonↄↄte ŋolo be kyaa keŋ nyi akpaa ↄ kyaa ↄ tom man na, ↄ na bese mo ↄ nↄↄ ka do balaŋ yakaa nyibaŋ nombia man ya. Mↄna ↄ ne yɛɛ kpene keŋ gyae ka gyoo ↄ kegyia ŋon sia bo. 5Mena mↄ te akpaa ŋolo ne yeu te ↄ te di keyeu keŋ mmaraase ŋan dↄↄ ya na, ↄ be gyae waa nyiŋ yele keyeu keŋ man ya. 6Wↄↄfarale ŋon ↄ yɛɛ ↄ tom nideli na, ŋon te kaboena nyi waa taŋgbɛɛ di ↄ wↄↄ keŋ man weenɛɛ. 7Gyueŋ nombia ŋan mɛɛ yako neŋ nɛ man, nawolo nyi de Gbeŋgyoo waa yela n ke nyii nombia ŋenaŋ pou man nideli. 8Na wolee Yesu Kristo ŋon ↄ ba lee gyoo Defidi loŋtoro man, te Wurubuarɛ be gyuusu e lee yeŋ man nɛ nombia ya. Kei yɛna Wurubuarɛ nombii kpaakpaa keŋ me dↄŋ mee kolosi nɛ. 9Keŋ mↄ dↄↄ te mɛɛ naa diyem, te be kyaŋa maŋ ketↄ deni te ba doo maŋ agbaraagbaraase ŋgba nombiakumɛɛyɛɛre nɛ. Mↄna Wurubuarɛ nombia ŋan dↄↄ, ŋolo be tale do ŋa agbaraagbaraase ya. 10Kei dↄↄ te mɛɛ yɛɛ kakyeŋ seŋ keŋkeŋ me diyem kena man lee balaŋ baŋ Wurubuarɛ be wulaa lese wↄ see nɛ dↄↄ. Na Wurubuarɛ keta Yesu Kristo dↄↄ lɛɛ ba nyee na baŋ mↄ kenyiŋ ↄ gyoorobiiri keŋ ke kyaa kekpaakekpaa nɛ. 11Nombia ŋan bↄↄ yako see nɛ yɛɛ ampaŋ. Be yakowↄ nyi, "Akpaa daa na Kristo ta yem na, daa na e dɛɛ kyaa bela. 12Akpaa de yɛɛ kakyeŋ seŋ keŋkeŋ da diyem kena man na, dee kpu na e di gyoori. Te akpaa de bɛɛ e na, ŋon mↄ waa bɛɛ daa. 13Akpaa daa bɛɛ lɛɛ di ya na, ŋon dↄↄ waa di ↄ nombia dↄↄ nawolo nyi ↄ bɛɛ yako nombii bese lee ke wↄle ya." 14Debaŋ kamasɛ na tↄↄse Kristotena baŋ nombia kɛŋa na n ke faree wↄ Wurubuarɛ siaman nyiaa, baa tina nombia kewↄŋee yela nawolo nyi ŋↄↄ taŋ tↄnↄↄ ya. Mↄna ŋɛɛ wↄlɛɛ balaŋ baŋ bee tei wↄ nɛ bo. 15Yɛɛ kakyeŋ na n ke nyiŋ yele Wurubuarɛ siaman, ŋgba tomyɛɛre kpaakpaate ŋon ↄ bee di desɛŋ ↄ tom keyɛɛ man ya nɛ. Kaboena nyi nya tale wola nyeedoŋ nombia ŋan ŋe yɛɛ anokoare nombia ŋa nɛ man nideli. 16Lese n wose lee nombia ŋan ŋa te yɛɛ Wurubuarɛ kegyaebii ya nɛ afa keyↄↄ man. Nawolo nyi ŋɛɛ desina bo wↄlɛɛ walaŋ na Wurubuarɛ nsana. 17Ba afa ŋan bɛɛ yↄↄ nɛ, ne yaasee bo ŋgba kawee kum nɛ. Balaŋ benaŋ man baale yɛna Hameneyose na Filetuse. 18Mena balaŋ kɛwↄ ta yoo lee anokoare gbɛɛ keŋ man. Bɛɛ wola balaŋ nyi debaŋ keŋ balaŋ baa foŋ lee yeŋ man nɛ taŋ ke kↄŋ laŋ, mena dↄↄ ba te yeli baale ta lee wↄle ba kelɛɛdi man wↄlɛɛ. 19Mↄna Wurubuarɛ anokoare keŋ seŋɛɛ keŋkeŋ keŋ nyi kolo be tale wosi ke ya. Nombia kɛŋa te ba moowↄ tↄ ke nↄↄ. Nombia ŋenaŋ yɛna nyiaa, "Wurubuarɛ gyeŋ balaŋ baŋ be yɛɛ ↄ wui." "Walaŋ kamasɛ ŋon ↄ be lɛɛ de Gbeŋgyoo Yesu di na, kaboena nyi waa lese ↄ wose lee nombiakumɛɛ keyɛɛ man." 20Dekpaŋalaŋ dinaa kamasɛ man na, be dana kuruwaase kpookpoo. Kↄba yayam na kↄba wolom wui doo, te ŋan bↄↄ mo tɛɛle na daase yɛɛ ŋa mↄ nɛ doo. Bɛɛ mo ŋaale do weenɛɛ debaŋ kamasɛ, te bɛɛ mo ŋaale bo see daa wee dinaa. 21Mena mↄ te nyaŋ walaŋ ŋon n lese n wose lee nombiakumɛɛ keyɛɛ man na, Wurubuarɛ waa mo neŋ yɛɛ kolo kpaakpaa. Nawolo nyi nyaŋ walaŋ ŋonaŋ wose taŋ ayimɛɛ ya. N wose dana tↄnↄↄ fa n Gbeŋgyoo te n te desina n wose fa tom kpaakpaa kamasɛ keyɛɛ. 22Mena dↄↄ lese n wose lee lookum keŋ ne yele alebia na tewulɛɛ ne wↄlɛɛ nɛ man. Ɛmɛɛ na baŋ bɛɛ mo konↄↄ kpaakpaate som Wurubuarɛ nɛ ɛ mo ɛ loo gyakaa nombia ŋan tenɛɛ nɛ dↄↄ, na ɛ ka seŋ nombia ŋan ɛ be lɛɛ di nɛ dↄↄ nideli na ɛ ke gyae dↄŋa na ɛ ke yɛɛ nↄↄdokoloŋ. 23Lese n wose lee aŋmaareŋ ŋan ŋↄↄ taŋ tↄnↄↄ ya nɛ man, nawolo nyi n gyeŋ nyi ŋɛɛ mo kale bo kↄŋ. 24Tekaboena nyi de Gbeŋgyoo tobaale waa mo ↄ wose do kale nombia man korakora ya. Mↄna kaboena bo nyi waa yɛɛ deeli fa walaŋ kamasɛ, na waa yɛɛ walaŋ ŋon ↄ gyeŋ Wurubuarɛ nombia kawola, te ↄ ne nyiŋ konↄↄ fa walaŋ kamasɛ. 25Kaboena nyi waa nyiŋ konↄↄ na waa kolosi fa balaŋ baŋ bɛɛ lɛɛ e aŋmaareŋ nɛ. Na waa gyakaa loo nyi mberem Wurubuarɛ waa yela baa kyɛɛkee be konↄↄse, na baa gyeŋ anokoare keŋ. 26Kei gyae ke yela be sia ke ŋmaŋee wↄ, na baa yeu lee ↄbↄnsam ŋon ↄ be di be dↄↄ te ↄ ne yeli bɛɛ yɛɛ ↄ kegyaebii nɛ kↄta man.

will be added

X\