2 Tesalonikatena 2

1Me tebia, lee de Gbeŋgyoo Yesu Kristo kabese kↄŋ na mena keŋ waa yilaa de popou mena wee kenaŋ nɛ man nombia yaa mɛɛ gyae maa lese wola ŋon nideli nɛ. 2Balaŋ baale dↄŋ bɛɛ yako nyiaa, de Gbeŋgyoo Yesu taŋ ke kↄŋ. Mena dↄↄ dɛɛ sola ŋon bo nyi, ɛ na yele mena nombia kɛŋa ke yela ɛ wↄe kelↄ ŋon ya. Nnɛ balaŋ baale te di dekara nyi daa kpa Wurubuarɛ feliŋ ŋon yako na daa nombia kɛŋa te daa mↄ kaa yako ŋon yaa daa gbagba yako na ŋon nombia kɛŋa yaa daa gbagba ŋmarase na tↄne yelee ŋon nyi Yesu taŋ ke kↄŋ. 3Ɛ na yeli ŋolo ka beo ŋon lee gbɛɛ kamasɛ man ya. Nawolo nyi pɛna wee dinaa kenaŋ kekↄŋ na, balaŋ baa koro seŋ tia Wurubuarɛ. Mena ke te baa lese walaŋ ŋon ↄ bee di mmaraase dↄↄ ya nɛ debↄↄ pɛna wee kenaŋ kelii. Ŋon yɛna walaŋkum ŋon boalaŋ man te waa doo kekpaakekpaa nɛ. 4Waa gyina ↄ wose adido, na waa koro seŋ tia Wurubuarɛ na kpene kamasɛ keŋ balaŋ na som nɛ. Waa kaa kyaa Wurubuarɛ ↄsom deni dinaa keŋ man, na waa yako nyi ŋon yɛna Wurubuarɛ. 5Ɛ bɛɛ tↄↄse nyi debaŋ keŋ me kyaa ɛ gyaŋ na, mɛɛ kyaa yako ŋon mena nombia kɛŋa yee? 6Mↄna nɛnɛɛ ɛ gyeŋ kpene keŋ be kyaŋ e dↄↄse dↄↄ te ↄ te kↄŋa ta ya. Debaŋ keŋ Wurubuarɛ ba see e nyi waa kↄŋ nɛ de lii na, waa kↄŋ. 7Balaŋ taŋ ke fiasɛɛ bɛɛ lee Wurubuarɛ wↄle yɛɛ nombiakumɛɛ weese. Mↄna pɛna nombii keŋ mↄↄ yako ŋon nyi gyae kekↄŋ nɛ ke kↄŋ na, kaboena nyi Wurubuarɛ waa lese walaŋ ŋon ↄ ne tↄ ke gbɛɛ nɛ. 8Kenaŋ wↄle na te baa lese walaŋ ŋon ↄ bee di mmaraase dↄↄ ya nɛ debↄↄ. De Gbeŋgyoo Yesu nↄↄman weesɛɛ te waa mo feefu e ko, na waa mo ↄ gyoorobiiri keŋalakee keŋ wↄlɛɛ e kekpaakekpaa. 9Walaŋ ŋon ↄ bee di mmaraase dↄↄ ya na, waa mo ↄbↄnsam doŋ bo kↄŋ. Waa kaa beo yɛɛ gyakoloŋ nombia na nombia dinaana burum. 10Waa mo nombiakumɛɛ kamasɛ beo baŋ pou baa yeŋ leki nɛ. Baa yeŋ leki kekpaa nawolo nyi ba te bɛɛ nyi bↄↄ lɛɛ nombia ŋan ŋe doo na ŋe gbɛɛ, ŋan gyae ke yela Wurubuarɛ ke lɛɛ ba nyee nɛ do ya. 11Lee mena dↄↄ Wurubuarɛ te yeli akɛrɛɛ nombia te kaa gyoo be man, te akɛrɛɛ nombia ŋaageŋ te bɛɛ lɛɛ di. 12Mena dↄↄ Wurubuarɛ waa bu balaŋ baŋ pou ba te lɛɛ anokoare nombia ŋan di ya, te bɛɛ gyae akɛrɛɛ nombia bo nɛ fↄↄ. 13Mↄna ɛmɛɛ de tebia baŋ de Gbeŋgyoo Yesu ne gyae ŋon nɛ dↄↄ, kaboena nyi debaŋ kamasɛ na dɛɛ fane fa Wurubuarɛ karaŋ lee ɛ dↄↄ. Nawolo nyi Wurubuarɛ wulaa lese ŋon see leenaŋ kewalaŋ keŋ nyi waa lɛɛ ɛ nyee. Wurubuarɛ tɛɛwↄ ↄ feliŋ ŋon doŋ man te ↄ desina ŋon see, nawolo nyi ɛ lɛɛ nombia ŋan ŋe doo na ŋe gbɛɛ nɛ di. 14Ŋon Wurubuarɛ tɛɛ la nyeedoŋ nombia ŋan dɛɛ yako nɛ dↄↄ baake ŋon kↄŋ nyeedoŋ kei man, na ɛ ke nyiŋ gbɛɛ gyoo de Gbeŋgyoo Yesu Kristo gyoori keŋ man. 15De tebia, lee mena dↄↄ ɛ seŋ keŋkeŋ na ɛ ke kyaŋ de nombia ŋan dɛɛ wola ŋon nɛ, na ŋan dee kolosi fa ŋon nɛ, na ŋan dↄↄ ŋmarase yelee ŋon nɛ man nideli. 16De kya Wurubuarɛ ne gyae daa, te ↄ tɛɛwↄ ↄ bɛrɛɛ keŋ dↄↄ do daa kakyeŋ kekpaakekpaa, te ↄ faa daa loo kegyakaa kpaakpaate. Dɛɛ solo nyi de Gbeŋgyoo Yesu Kristo gbagba na de kya Wurubuarɛ, 17baa do ŋon kakyeŋ na baa fa ŋon doŋ na ɛ ke tale yɛɛ abↄↄ kpaakpaa lee ɛ kekolosi na ya abↄↄ ayɛɛsa pou man.

will be added

X\