2 Pita 3

1Me gyoona kpaakpaa, kei yɛna me tↄne alate keŋ mɛɛ ŋmarase ŋon. Me ŋmarase tↄna ala kɛŋa pou bo na maa mo tↄↄse ŋon nombia ŋan ɛ wulaa ɛ gyeŋ nɛ na maa do ŋon kakyeŋ, na ɛ ke nyiŋ mo agyueŋ kpaakpaa lee nombia ŋenaŋ man. 2Mɛɛ gyae nyi ɛ ke tↄↄse nombia ŋan Wurubuarɛ akpeŋkpeŋgyↄↄra baŋ be yako see leenaŋ beneŋ keŋ nɛ. Na ɛ ka bese tↄↄse nombia ŋan de Gbeŋgyoo Yesu Kristo ŋon ↄ yɛɛ da nyeelɛɛre e nɛ be tɛɛ daa ↄ kpilala baŋ de kyaa ɛ man nɛ dↄↄ yako nyi yaa yɛɛ nɛ. 3Nombii keŋ mɛɛ gyae ɛ ka gyeŋ nideli yɛna nyiaa, weeya ↄtoman nyiŋan pɛte Yesu ke kↄŋ na, balaŋ baale baa kↄŋ kaa yɛɛ nombia nkaraŋkaraŋ ŋan baŋ gbagba ne gyae. Baa kulu ŋon gbɛɛ kamasɛ man lee ɛ kelɛɛdi dↄↄ. 4Baa bↄↄse ŋon nyiaa, "Ŋgba ↄ yakowↄ see nyi waa bese kↄŋ, ↄ kyaa aleŋ? Woromↄ yaa waa kↄŋ? De bɛɛ lɛɛ nombia kɛŋa di ya, nawolo nyi de naanaↄ te wulaa yekee kaalaŋ, mↄna kpene kamasɛ sɛɛ doo ŋgba mena keŋ ŋe doo leenaŋ kewalaŋ keŋ Wurubuarɛ be yɛɛ adido na ateta nɛ. Kolo na kolo te kyɛɛkee ta ya." 5Akpaa be yako mena na be karae. Nawolo nyi ba te wolee nyi lee gyaŋgba gyaŋgba keŋ na, nombii yakaa te Wurubuarɛ kolosiwↄ te adido na ateta bɛɛwↄ lee. Wurubuarɛ yela tɛɛle leewↄ loŋ man kↄŋ, te loŋ kenaŋ dↄↄ te ↄ tɛɛwↄ yɛɛ tɛɛle kei. 6Ba te wolee mↄ nyi loŋ kenaŋ te Wurubuarɛ yela ke kaa waalewↄ wↄlɛɛ gyaŋgbatena baŋ bↄↄ kyaa debaŋ kenaŋ man nɛ. 7Wurubuarɛ nombii kenaŋ te ↄ moowↄ ↄ dana adido na tɛɛle keŋ dↄↄ ɛ kyaa nɛ. Ŋe doo ŋɛɛ daa debaŋ keŋ Wurubuarɛ waa mo boalaŋ wↄlɛɛ ŋa nɛ. Ŋe doo menɛɛ kelii nombia kedi wee dinaa keŋ Wurubuarɛ waa wↄlɛɛ balaŋ baŋ pou be te nyii ↄ dei ya nɛ. 8Me gyoona kpaakpaa, ɛ na wolee nombii dokoloŋ kei ya. Nombii kenaŋ yɛna nyiaa, Wurubuarɛ siaman na wee dokoloŋ yɛɛ ŋgba kulutooneŋ kakpoŋ (1,000) nɛ, te kulutooneŋ kakpoŋ (1,000) mↄ yɛɛ ŋgba wee dokoloŋ nɛ. 9Baale na gyueŋ nyi Wurubuarɛ de yako nyi waa yɛɛ kolo na ↄ bɛɛ yɛɛ ke bileŋ ya. Na mena te doo ya, mↄna ↄ ne nyiŋ konↄↄ bo fa ŋon, nawolo nyi ka te yɛɛ ↄ kegyaebii ke nyi ɛ man ŋolo waa yeŋ leki ya. Ↄ ne gyae bo nyi walaŋ kamasɛ waa kyɛɛkee wa agyueŋ lee ↄ gbɛɛneŋ kumɛɛ man na waa kↄŋ ↄ gyaŋ. 10Wee keŋ de Gbeŋgyoo Yesu waa kↄŋ nɛ, waa kaa futaa daa bo ŋgba mena keŋ ŋmɛɛlate ne kↄŋ nɛ. Mena wee kenaŋ na adido gyae ka mo yeesa ŋaalaa. Boalaŋ gyae ke kpa kpene kamasɛ keŋ doo adido na ateta nɛ pou dugudugudugu. 11Nyi akpaa mena te abↄↄ pou gyae ke wↄlɛɛ na, kenaŋ na sena te kaboena nyi ɛ dinↄↄ dɛɛ yɛɛ? Ɛ ke kyaa ɛ ne daa Wurubuarɛ wee kei te ɛ sia be yɛɛ nyi ke dɛɛ kↄŋ bileŋ nɛ, kaboena nyi yaa kyaa Wurubuarɛ kegyaebii man, keŋ dukum kamasɛ be doo ɛ man ya. Mena wee kenaŋ na boalaŋ gyae ke wↄlɛɛ adido pou te boalaŋ kenaŋ ogyefeliŋ keŋ gyae ke yalakee kpene kamasɛ keŋ doo adido botↄↄ nɛ. 13Mↄna daa dↄↄ de kyaa dɛɛ daa adido wↄle, na tɛɛle wↄle keŋ Wurubuarɛ be yako see nyi waa yɛɛ nɛ. Botↄↄ te balaŋ baŋ pou be gbɛɛneŋ tenɛɛ nɛ baa kyaa. 14Mena dↄↄ me gyoona kpaakpaa debaŋ keŋ ɛ sia gyakaa mena abↄↄ kɛŋa pou dↄↄ nɛ, ɛ yase ɛ sia na ɛ ke yɛɛ abↄↄ kpaakpaa ŋan gyae ke yela ɛ ke tale kaa seŋ Wurubuarɛ siaman, keŋ nyi ayimɛɛ yaa nombiikum daale be doo ɛ wose man ya, na ɛmɛɛ na Wurubuarɛ nsana ke yɛɛ gyoŋ. 15Ɛ tↄↄse nyi de Gbeŋgyoo Wurubuarɛ konↄↄ keŋ ↄ be nyim nɛ, ke yɛɛ kpene keŋ ne fa deniwalaŋ gbɛɛ na waa nyiŋ nyiŋ nyeekelɛɛ pɛna ↄ wee keŋ kelii. Mena nombia ŋenaŋ ke, te de dↄↄ gyaagyi Pↄↄl mↄ moo nyansa keŋ Wurubuarɛ be fa e nɛ ŋmarase ↄ tↄna pou man yelee ŋon. 16Mena ke te ↄ ŋmarasewↄ yako mena nombia kɛŋa ↄ tↄna pou man. Ↄ nombia ŋaale doo ↄ tↄna ŋenaŋ man keŋ ŋe man kenyii dana baŋ. Balaŋ baale baŋ bↄↄ gyeŋ nombia ya te bↄↄ seŋɛɛ kelɛɛdi keŋ man keŋkeŋ ya nɛ, ne tulii ↄ nombia ŋenaŋ bo. Mena ke mↄ te bee tulii Wurubuarɛ nombia aŋmaraseŋ akaŋ ŋan mↄ. Bɛɛ yɛɛ mena nɛ, na Wurubuarɛ kefaala yaa bɛɛ gyae baa fa ba wose nɛ. 17Me gyoona kpaakpaa, ɛ wulaa ɛ gyeŋ mena nombia kɛŋa. Mena dↄↄ ɛ doo ɛ wose dↄↄ nideli, na balaŋ baŋ bↄↄ ne di Wurubuarɛ nombia ŋan dↄↄ ya nɛ, be nyiŋ mo ba akɛrɛɛ nombia ŋan wↄŋee ŋon lee ɛ daseŋae kpaakpaate keŋ man ya. 18Mↄna ɛ yela de Gbeŋgyoo Yesu Kristo ŋon ↄ yɛɛ da nyeelɛɛre e nɛ, ka mo ↄ bɛrɛɛ boele ŋon na waa yela ɛ ka gyeŋ e nideli. Ŋon te gyoorobiiri kaboena gyɛŋ kei na weeya pou kekpaakekpaa. Amɛn.

will be added

X\