2 Pita 2

1Mena keŋ gyaŋgba baale ba beo mo ba wose nyi be yɛɛ Wurubuarɛ akpeŋkpeŋgyↄↄrawↄ Iseraetena man nɛ, mena mↄ te akɛrɛɛ wolala baa kyaa ɛ man. Baa mo nyansa wola nombia ŋan te yɛɛ anokoare ya. Baa ta wola balaŋ nombia ŋan gyae ke yela baa yo nɛ. Baa bɛɛ nyi bↄↄ gyeŋ de Gbeŋgyoo Yesu Kristo ŋon ↄ ba yem lɛɛ daa gba nɛ ya. Mena dↄↄ be gyae ke kyare ya, kayeyɛɛ dinaa daale gyae ke kↄŋ be dↄↄ. 2Balaŋ burum baa sila wↄ yɛɛ ba desɛŋ nombia ŋan bɛɛ yɛɛ nɛ. Te be nombia ŋan bɛɛ yɛɛ nɛ dↄↄ, balaŋ baa kolosi nombiakumɛɛ tia Kristo anokoare gbɛɛneŋ ŋan. 3Lee sibii dↄↄ mena akɛrɛɛ wolala kɛwↄ baa mo akɛrɛɛ nombia beo ŋon, na baa mo nyansa gbɛɛ mo ŋon gyae kↄba. Mena dↄↄ leenaŋ beneŋ beneŋ keŋ Wurubuarɛ yakowↄ see nyi waa wↄŋ ba deŋele, te waa taŋ wↄlɛɛ wↄ bo. 4Ɛ tↄↄse nyi debaŋ keŋ Wurubuarɛ kpilala baŋ be kyaa adido be yɛɛ nombiakumɛɛ nɛ, Wurubuarɛ te tina wↄ yela ya. Mↄna ↄ moo wↄ do kayeyɛɛ kekpaakekpaa man. Ↄ doo wↄ agbaraagbaraase man te ↄ moo wↄ ka do ditiŋtɛɛ man, na baa doo botↄↄ kelii ↄ nombia kedi wee keŋ. 5Wurubuarɛ te tina beneŋtena baŋ be te nyii ↄ dei ya nɛ yela ya. Nowa yako wↄ mena keŋ baa yɛɛ na be gbɛɛneŋ ka tenee Wurubuarɛ siaman, mↄna ba te kyɛɛkee ba agyueŋ ya. Mena dↄↄ Wurubuarɛ yela loŋ waalewↄ wↄlɛɛ tɛɛle keŋ na ke balaŋ baŋ pou be te nyii ↄ dei ya nɛ. Mↄna balaŋ baŋ Wurubuarɛ be lɛɛ ba nyee yɛna Nowa ŋon ↄ gbɛɛneŋ tenɛɛ Wurubuarɛ siaman nɛ na ↄ dekpaŋalaŋmantena balaŋ nyetooro. 6Ɛ tↄↄse nyi Wurubuarɛ buu Sodom na Gomoratena fↄↄ. Ↄ yela boalaŋ kpaa be popou bese tↄŋ. Ↄ yɛe mena na ka wola nyi nnɛ ne gyae la ke kↄŋ balaŋ baŋ bↄↄ ne nyii ↄ dei ya nɛ dↄↄ. 7Mↄna Wurubuarɛ lese Lↄↄte lee mena deŋele kewↄŋ kei man. Nawolo nyi Lↄↄte yɛɛ walaŋ ŋon ↄ gbɛɛneŋ tenɛɛ ŋon Wurubuarɛ siaman, mena dↄↄ balaŋ baŋ nombia nkaraŋkaraŋ ŋan bɛɛ yɛɛ nɛ takaa e nideli. 8Lↄↄte kekyaa balaŋ kumɛɛ kɛwↄ man na ↄ kena be nombia nkaraŋkaraŋ ŋan bɛɛ yɛɛ, na be nↄↄwoya kumɛɛ ŋan bee kolosi nɛ takaa e nideli. Nawolo nyi ↄ yɛɛ walaŋ ŋon ↄ gbɛɛneŋ tenɛɛ Wurubuarɛ siaman. 9Nombia kɛŋa pou nawolo baa nyi, Wurubuarɛ gyeŋ mena keŋ waa lese ↄ balaŋ lee be kaale man. Te ↄ gyeŋ mena keŋ waa yɛɛ, na waa wↄŋ balaŋ kumɛɛ deŋele kelii wee keŋ waa di walaŋ kamasɛ nombia nɛ. 10Kɛŋa pou wↄle na, balaŋ baŋ bɛɛ yɛɛ nombia nkaraŋkaraŋ ŋan baŋ gbagba ne gyae te ŋɛɛ wↄlɛɛ wↄ te bↄↄ na mo Wurubuarɛ yɛɛ kolo ya nɛ, Wurubuarɛ waa wↄŋ ba deŋele nideli. Mena akɛrɛɛ wolala kɛwↄ dana konↄↄyuŋ te bɛɛ wola ba wose, te bɛɛ tale gyↄ konↄↄ kolosi nombiakumɛɛ tia baŋ be kyaa adido te be dana gyoorobiiri nɛ. 11Mↄna Wurubuarɛ kpilala baŋ gba koraŋ be dana doŋ kela akɛrɛɛ wolala kɛwↄ nɛ, ta tee balaŋ baŋ be dana gyoorobiiri adido nɛ yaa baa mo nombiakumɛɛ gyakaa be dↄↄ de Gbeŋgyoo Wurubuarɛ siaman ya. 12Mↄna mena balaŋ kɛwↄ baŋ be dana konↄↄyuŋ nɛ dↄↄ, nombia ŋan bↄↄ ne nyii ŋe man ya na mmusuo nombiikum kamasɛ keŋ be gyae na te bee kolosi lee ka wose man. Be dinↄↄ yɛɛ ŋgba ŋale man wonembia baŋ balaŋ na koe nɛ. Kpene kamasɛ keŋ de kↄŋ ba nyee man na, keŋ te bɛɛ yɛɛ. Mena dↄↄ baa yeŋ leki ŋgba ŋale man wonembia nɛ. 13Wurubuarɛ waa naase wↄ diyem nideli ŋgba mena keŋ baŋ mↄ be naase baale diyem nɛ. Baŋ gyaŋ na nombia nkaraŋkaraŋ keyɛɛ balaŋ man yɛna gyoŋ kedi. Mena dↄↄ ɛ gyaŋee ɛ ne di ɛ nↄↄ te be kaa kyaa bom na ŋan na, be dana wↄ desɛŋ gba nyi baa yɛɛ be nombia nkaraŋkaraŋ ŋan ɛ man ya. Kei ne yeli bɛɛ wↄlɛɛ ɛ yele do ŋon desɛŋ. 14Bↄↄ ne gyↄ sibii naa alo laŋ ya, te nombiakumɛɛ keyɛɛ yɛna be wui. Bɛɛ beo balaŋ baŋ bↄↄ dana doŋ ba kelɛɛdi man ya nɛ, te bee yeli balaŋ benaŋ ne yɛɛ dukum. Be dana sibii nideli. Mena abↄↄ kumɛɛ kɛŋa pou dↄↄ Wurubuarɛ te falaa wↄ. 15Be te tina Kristo gbɛɛ kpaakpaa keŋ yela gyu ka mo baŋ gbagba be gbɛɛ keŋ be yeli bↄↄ yoo nɛ. Be silana Beeyↄ bu Baalam nawↄↄ. Na Baalam kei yɛɛ Wurubuarɛ dekpeŋkpeŋgyↄↄre e, te ↄ be famenɛ na nombiakumɛɛ keyɛɛ lee kↄba keŋ waa nyiŋ lee ke man dↄↄ ya. 16Mena dↄↄ Wurubuarɛ yela ŋon Baalam afurum kolosiwↄ na e lee ↄ nombiakumɛɛ ŋan ↄ ne yɛɛ nɛ dↄↄ. Wonembu bɛɛ tale kolosi ya mↄna afurum ŋon kolosiwↄ na e ŋgba deniwalaŋ nɛ, te ↄ yela ↄ tinaa diteŋ nombia ŋan nafↄ ↄ ne gyae waa yɛɛ nɛ yela. 17Mena akɛrɛɛ wolala kɛwↄ be dana tↄnↄↄ ya ŋgba atiribuŋse ŋan ŋↄↄ dana loŋ ya nɛ, te ba bese yaa be yɛɛ ŋgba ŋↄma ŋan feliŋ ne gyↄ ŋa laŋ nɛ. Botↄↄ keŋ Wurubuarɛ be desina see wↄ nyi ke dɛɛ yɛɛ ba dekyae kekpaakekpaa yɛna ditiŋtɛɛ tuum keŋ man. 18Be yɛɛ nↄↄman bo mↄna nombii kpaakpaa kamasɛ be doo ba kekolosi man ya. Bɛɛ yɛɛ kewↄlɛɛ nombia te bɛɛ wola balaŋ nyi baa tale yɛɛ kpene kamasɛ keŋ baŋ gbagba ne gyae nyi baa yɛɛ. Mena nombia kɛŋa te bɛɛ mo beo balaŋ baŋ bↄↄ lɛɛdi kewalaŋ te bↄↄ lese ba wose lee mena dinↄↄ kumɛɛ ŋenaŋ man nɛ, na be ta bese ke yala ŋe man bela. 19Mena balaŋ kumɛɛ benaŋ na beo balaŋ kɛwↄ nyi baa yela na baa nyiŋ ba wose, na baa tale yɛɛ kpene kamasɛ keŋ baŋ gbagba ne gyae keŋ Wurubuarɛ mmaraa kamasɛ be bake wↄ ya. Mↄna baŋ gbagba koraŋ sɛɛ be yɛɛ gbeŋawↄ fa nombia nkaraŋkaraŋ keyɛɛ. Nawolo nyi deniwalaŋ kamasɛ yɛɛ gbeŋi e fa kpene kamasɛ keŋ ne di ↄ dↄↄ nɛ. 20Nyi walaŋ da gyeŋ de Gbeŋgyoo Yesu Kristo ŋon ↄ yɛɛ da nyeelɛɛre e nɛ te ↄ lese ↄ wose lee tɛɛle kei dↄↄ abↄↄ nkaraŋkaraŋ ŋan ŋɛɛ wↄlɛɛ walaŋ nɛ keyɛɛ man, te ↄ bese gyu ↄ ne yɛɛ ŋa bela na ŋe gyae ke di doŋ ↄ dↄↄ. Dekↄŋ mena na ↄ dinↄↄ gyae ka bese wↄlɛɛ kela mena keŋ nafↄ ↄ doo pɛte ↄ be kaa lɛɛ Kristo di nɛ. 21Nyi nafↄ ↄtenate deŋ ta gyeŋ gbɛɛ keŋ waa mo na ↄ nombia ka tenɛɛ Wurubuarɛ siaman ya na, nafↄ dei fa e kela keŋ ↄ ba gyeŋ ke te ↄ ba besena ↄ wↄle tee Wurubuarɛ nombia ŋan bↄↄ wola e nɛ. 22Ba te gyↄ aduya ŋaale see nyiaa, "Babaa ne tↄe na ↄ ta bese ka mo ↄ tↄↄla di" te "N sↄ kekuirii na, ↄ na bese bo ka gyoo depate man." Mena balaŋ kɛwↄ dinↄↄ nawolo nyi aduya kɛŋa yɛɛ ampaŋ.

will be added

X\