2 Pita 1

1Tↄne kei lee maŋ Simↄn Pita ŋon me yɛɛ Yesu Kristo tobaale na ↄ kpilale e nɛ gyaŋ. Mɛɛ ŋmarase ke mee yelee ɛmɛɛ baŋ pou ɛ ne lɛɛ Yesu Kristo di nideli ŋgba mena keŋ daa mↄ ne lɛɛ e di nɛ. Mena kelɛɛdi kpaakpaa kei lee Wurubuarɛ ŋon ↄ gbɛɛneŋ tenɛɛ nɛ, na da nyeelɛɛre Yesu Kristo gyaŋ. 2Wurubuarɛ waa yela ɛ ka gyeŋ ŋon Wurubuarɛ na de Gbeŋgyoo Yesu nideli, na ke yela waa mo ↄ bɛrɛɛ boele ŋon nideli na waa fa ŋon wosefɛɛreŋ keŋ ka dokoso be kyaa ya nɛ. 3Lee de Wurubuarɛ kagyeŋ dↄↄ Yesu Kristo te tɛɛ ↄ doŋ keŋ ka dokoso be kyaa ya nɛ dↄↄ fa daa kpene kamasɛ keŋ ne hia daa, na dɛɛ tale yɛɛ ↄ kegyaebii tɛɛle kei dↄↄ. Lee ŋon Wurubuarɛ gbagba dinↄↄ kpaakpaa na ↄ wↄe dↄↄ te ↄ baake daa nyi de kaa bese ↄ balaŋ. 4Lee mena dinↄↄ kei dↄↄ te ↄ faa daa ↄ nombia kpaakpaa ŋan ↄ be yako see nyi waa fa daa nɛ. Ↄ moo ↄ nombia kɛŋa fa daa na ke yela ɛ ke nyiŋ lese ɛ wose lee abↄↄ kumɛɛ ŋan ɛmɛɛ gbagba ne gyae tɛɛle kei dↄↄ te ne yeli walaŋ ne wↄlɛɛ nɛ man, na ɛ ke nyiŋ Wurubuarɛ dinↄↄ keŋ. 5Lee mena nombia kɛŋa dↄↄ ɛ yɛɛ kakyeŋ na ɛ ka mo deeli keyɛɛ kpu na ɛ Yesu Kristo kelɛɛdi keŋ. Kenaŋ wↄle na ɛ mo nombia kagyeŋ kpu na ɛ deeli keyɛɛ keŋ. 6Nombia kagyeŋ wↄle na, ɛ mo wose kekyaŋ kpu, te wose kekyaŋ wↄle na ɛ yɛɛ kakyeŋ seŋ keŋkeŋ. Kakyeŋ wↄle na ɛ mo Wurubuarɛ ↄsom kpaakpaate mↄ kpu. 7Wurubuarɛ ↄsom kpaakpaate wↄle na ɛ mo dↄŋa kegyae kpu, te dↄŋa kegyae wↄle na ɛ mo balaŋ kegyae kpu. 8Nawolo nyi akpaa ɛ kyaŋ nombia kɛŋa man nideli na, gyae ke yela ɛ ka gyeŋ de Gbeŋgyoo Yesu Kristo na ke yela ɛ ke yɛɛ balaŋ baŋ ɛ kelɛɛdi dana tↄnↄↄ. 9Mↄna walaŋ ŋon ↄ be dana mena dinↄↄ kpaakpaa kei ya na, kenaŋ na walaŋ ŋonaŋ sia te wↄlɛɛ keŋ nyi ↄ bɛɛ naa gyu lem ya. Ↄ taŋ ke wolee nyi be ta lese e lee ↄ nombiakumɛɛ benɛɛ ŋan man. 10Me tebia mena dↄↄ ɛ yɛɛ kakyeŋ na ɛ ke kyaa dinↄↄ kpaakpaate man, na ɛ dinↄↄ kenaŋ ka wola nyi Wurubuarɛ baake na ŋon te ↄ lese ŋon. Akpaa ɛ yɛɛ mena na ɛ be gyae ɛ ka lee wↄle ɛ kelɛɛdi man ya. 11Kɛŋa keyɛɛ ne gyae la ke yela Wurubuarɛ ke fa ŋon gbɛɛ na ɛ ke nyiŋ gbɛɛ gyoo de Gbeŋgyoo Yesu Kristo ŋon ↄ yɛɛ da nyeelɛɛre e nɛ gyoorobiiri keŋ ke kyaa kekpaakekpaa nɛ man. 12Ma gyeŋ nyi ɛ wulaa ɛ gyeŋ mena nombia kɛŋa, te ɛ wulaa ɛ seŋɛɛ anokoare nombia ŋan mↄↄ yako ŋon nɛ man keŋkeŋ. Mↄna mɛɛ gyae nyi maa kyaa tↄↄse ŋon nombia kɛŋa debaŋ kamasɛ. 13Ma gyeŋ nyi debaŋ keŋ me sɛɛ me kyaa tɛɛle kei dↄↄ nɛ, kaboena nyi maa kyaa tↄↄse ŋon nombia kɛŋa na ɛ be nyiŋ wolee ŋa ya. 14Nawolo nyi de Gbeŋgyoo Yesu Kristo ta lese wola maŋ nyi ma woya akaŋ tɛɛle kei dↄↄ ta tekaa bo ya. 15Lee mena dↄↄ te mɛɛ yɛɛ kakyeŋ yako ŋon nombia kɛŋa, na akpaa ma yem koraŋ na ɛ ke tale tↄↄse ŋa debaŋ kamasɛ. 16De kɛɛ kolosi de Gbeŋgyoo Yesu Kristo doŋ dinaa na ↄ ka bese kↄŋ keŋ nombia nɛ, te yɛɛ nyi ŋↄla nombia ŋan balaŋ na mo sia kekara gyↄ nɛ yaa dee kolosi ya, mↄna daa gbagba naa ↄ gyoorobiiri keŋ na de sia fonɛɛ. 17Debaŋ keŋ me kya Wurubuarɛ ba lese Yesu Kristo yele te ↄ ba lese ↄ gyoorobiiri wola nɛ, na de kyaa botↄↄ. De nyii nↄↄwoya ŋaale lee Wurubuarɛ Kpatakpere ŋon gyoorobiiri keŋ man nyiaa, "Kei yɛna me bu ŋon mɛɛ gyae e lee me konↄↄ man, te ↄ na gyoo me sia mↄ nideli" 18Daa gbagba nyii nↄↄwoya kɛŋa ŋan ba lee adido kↄŋ debaŋ keŋ daa na de Gbeŋgyoo Yesu Kristo kyaa Wurubuarɛ bula keŋ dↄↄ nɛ. 19Kei yele la da gyeŋawↄ nideli nyi Wurubuarɛ akpeŋkpeŋgyↄↄra nombia ŋan bↄↄ yako see nɛ yɛɛ ampaŋ. Mena dↄↄ ɛ see deŋele na ɛ ke nyii ŋa nideli. Nombia ŋenaŋ yɛɛ ŋgba kanea keŋ bↄↄ kyaŋee see ditiŋtɛɛ man nɛ. Kɛɛ ŋmaŋee kelii debaŋ keŋ nebo kyolobii ŋon waa lee. Kei na wola ŋon baa nyi yaa kyaŋ Wurubuarɛ nombia ŋan man nideli kelii debaŋ keŋ Yesu Kristo waa kaa yela ɛ konↄↄse ke gyuusu na ɛ ke nyii ↄ nombia ŋan man nideli. 20Lee kɛŋa pou wↄle na nombii tuturu keŋ mɛɛ gyae ɛ ka gyeŋ nideli yɛna nyiaa, Wurubuarɛ akpeŋkpeŋgyↄↄra baŋ man ŋolo te yako nombii daale keŋ bↄↄ ŋmarase do Wurubuarɛ nombia aŋmaraseŋ see ŋan man ŋon gbagba ↄ baam dↄↄ ya. 21Nawolo nyi Wurubuarɛ nombia ŋan be tɛɛ wa akpeŋkpeŋgyↄↄra dↄↄ te bↄↄ yako nɛ, ŋe man dokoloŋ be kyaa keŋ ka lee deniwalaŋ gbagba kegyaebii man ya. Mↄna Wurubuarɛ feliŋ ŋon wola na wↄ nombia ŋan ba lee ŋon Wurubuarɛ gyaŋ te be yakowↄ.

will be added

X\