2 Gyↄn 1

1Maŋ ɛ kegyia Gyↄn ne ŋmarasena tↄne kei mee yelee ɛmɛɛ Kristotena baŋ ɛ kyaa botↄↄ nɛ. Mɛɛ gyae ɛ nombia nideli lee me konↄↄ man. Mↄna na maageŋ ne gyae na ɛ nombia mena ya, baŋ pou ba gyeŋ anokoare keŋ Wurubuarɛ ba lese wola nɛ mↄ ne gyae ɛ nombia. 2Anokoare keŋ doo de man nɛ dↄↄ te dɛɛ gyae ɛ nombia mena. Mena anokoare kei gyae ke doo de man kekpaa. 3De kɛɛ yɛɛ kpene keŋ Wurubuarɛ ne gyae te dɛɛ gyae dↄŋa mↄ nɛ, de kya Wurubuarɛ na ↄ bu Yesu Kristo baa mo be bɛrɛɛ boele daa na baa wii de waraŋase na baa fa daa wosefɛɛreŋ. 4Dana maŋ gyoŋ nideli ŋgba mↄↄ naa ɛ man baale ne sila anokoare keŋ, ŋgba mena keŋ de kya Wurubuarɛ ŋon ba wola daa nɛ. 5Kristotena, mɛɛ waase ŋon bo ɛ yela dɛɛ gyae dↄŋa. Kei te yɛɛ nyi mmaraa wↄle yaa mɛɛ ŋmarase mee yelee ŋon ya. De wulaa da gyeŋ mena mmaraa kei lee debaŋ keŋ dↄↄ lɛɛ Kristo di nɛ. 6Wurubuarɛ kegyae gbagba yɛna ŋgba dee di ↄ mmaraase dↄↄ. Wurubuarɛ mmaraa keŋ ↄ be fa daa lee kewalaŋ keŋ yɛna nyi dɛɛ gyae dↄŋa. 7Akɛrɛɛtena burum te yaasee gyoo tɛɛle keŋ dↄↄ te be dↄŋɛɛ bɛɛ beo balaŋ. Be dↄŋɛɛ bɛɛ yako nyi Yesu Kristo ta bese deniwalaŋ kↄŋ tɛɛle kei dↄↄ ya. Walaŋ kamasɛ ŋon ↄ ne yako mena nombia kɛŋa dinↄↄ na ↄ yɛɛ Kristo kↄlare dekarate ŋon walaŋ e. 8Mena dↄↄ ɛ deke ɛ wose nideli, na kpene keŋ dↄↄ ɛ ne sila Wurubuarɛ nɛ ba lee ɛ nyiŋmaa man ya, na Wurubuarɛ kenyiŋ tↄ ŋon kom pou. 9Walaŋ ŋon ↄ bee sila nombia ŋan Kristo ba wolo nɛ ŋaageŋ ya te ↄ na mo ↄ wui ŋaale kpu nɛ, na ŋon na Wurubuarɛ be taŋ nↄↄdokoloŋ ya. Te walaŋ ŋon ↄ ne sila nombia ŋan Kristo ba wolo nɛ ŋaageŋ na, ↄtenate na de kya Wurubuarɛ na ↄ bu Yesu Kristo dana nↄↄdokoloŋ. 10Mena dↄↄ akpaa ŋolo de kↄŋ ɛ gyaŋ te ↄ na wola kawola daale keŋ ke yɛɛ kpoo lee keŋ Kristo ba wola daa nɛ na, ɛ na lɛɛ ↄtenate see ɛ gyaŋ ya te ɛ na do e nↄↄ gba ŋgba Kristo walaŋ nɛ ya. 11Walaŋ kamasɛ ŋon ↄ lɛɛ e na ↄ kpuɛ na e ↄ nombiakumɛɛ keyɛɛ man. 12Me dana nombia burum maa yako ŋon, mↄna me bɛɛ gyae maa ŋmarase ŋa yelee ŋon ya, nawolo nyi me loo doo nyi maa kↄŋ kaa naa ŋon na dɛɛ kyaa kolosi. Keŋ ne gyae la ke yela dee di gyoŋ nideli. 13Ɛ tebia Kristotena baŋ be kyaa kɛbo nɛ na do ŋon nↄↄ nideli.

will be added

X\