2 Korintotena 9

1Lee toto keŋ ɛ na doo nyi baa mo kyↄ ɛ tebia Kristotena nɛ dↄↄ, nafↄ tekaboena nyi maa ŋmarase ŋon kolo lee ka wose man bela ya. 2Nawolo nyi ma gyeŋ mena keŋ ɛ ne yɛɛ kakyeŋ nyi ɛ ke kyↄ ɛ tebia lee ɛ konↄↄ man. Mena dↄↄ ne yeli mɛɛ kɛlɛɛ ŋon fa Masedoniatena. Mɛɛ yako wↄ nyi leenaŋ dewii te ɛmɛɛ baŋ ɛ kyaa Akaya tɛɛle man nɛ, desina ɛ wose fa mena toto kei kado. Kakyeŋ keŋ ɛ dana ɛ na do mena toto kei nɛ ta do balaŋ burum mↄ kakyeŋ. 3Mee kpila tewulɛɛ kɛwↄ ɛ gyaŋ na de kɛɛ kɛlɛɛ ŋon keŋ nɛ be yɛɛ yakaa ya. Nawolo nyi debaŋ kamasɛ na, mɛɛ kɛlɛɛ ŋon fa Kristotena baŋ be kyaa Masedonia nɛ nyi ɛmɛɛ dↄↄ ɛ taŋ desina ɛ wose see. 4Akpaa nyi ɛ te desina ɛ wose ya te Masedoniatena baale de sila maŋ kↄŋ na, baa kaa naa nyi me kɛɛ kɛlɛɛ ŋon keŋ nɛ yɛɛ yakaa. Dekↄŋ mena nɛ na daa daageŋ ne gyae la dee di desɛŋ ya, mↄna ɛmɛɛ mↄ ɛ sia gyae ka yeŋ. 5Mena dↄↄ me kɛɛ ke nyi, kaboena nyi maa kpila tewulɛɛ kɛwↄ na baa kyaŋ gbɛɛ kↄŋ ɛ gyaŋ na ɛ ke nyiŋ yilaa abↄↄ ŋan ɛ be yako see nyi ɛ ke fa nɛ see. Kenaŋ na akpaa me kↄŋ na be gyae ke yɛɛ nyi mɛɛ ŋere ŋon bo ya, mↄna ɛmɛɛ gbagba faa la lee ɛ konↄↄ man. 6Ɛ tↄↄse nyiaa, nyi akpaa ŋolo te sɛɛ ŋmatee abↄↄ bia ka bo ya na, mena mↄ te ↄ be gyae waa kara ka bo ya. Mↄna akpaa ŋolo de ŋmatee abↄↄ bia burum na, mena mↄ te waa kara burum. 7Mena keŋ walaŋ kamasɛ be yako see nyi waa fa lee ↄ konↄↄ man nɛ, waa fa mena. Te yɛɛ nyi bɛɛ ŋere e bo ya. Nawolo nyi walaŋ ŋon ↄ ne booli ↄ sia fa kolo lee ↄ konↄↄ man na, ŋon te Wurubuarɛ ne gyae. 8Wurubuarɛ waa tale mo ↄ bɛrɛɛ keŋ boele ŋon, na waa yela ɛ ke nyiŋ kpene kamasɛ keŋ ɛ ne gyae debaŋ kamasɛ. Waa yela ɛ ke nyiŋ gbaa, na ɛ ka mo ŋaale yɛɛ deeli. 9Wurubuarɛ nombia aŋmaraseŋ see yakowↄ yenaŋ daale nyiaa, "Wurubuarɛ te gyuusu ↄ nyiŋmaa ↄ ne fa ayematena abↄↄ. Ↄ bɛrɛɛ keŋ ↄ dana nɛ be gyae ke taŋ ya." 10Wurubuarɛ ne faa na wↄↄfarale abↄↄ duuluŋ, te ŋon ke ne faa na daa weenɛɛ. Mena dↄↄ waa fa ŋon abↄↄ ŋan ɛ ne gyae nɛ pou na waa yela ŋe ke wuku. Na ɛ kenyiŋ yɛɛ wↄe nideli fa ayematena. 11Wurubuarɛ waa yela ɛ ke nyiŋ ɛ wose nideli kpene kamasɛ man, na ɛ ke tale yɛɛ wↄe debaŋ kamasɛ. Te mena keŋ ɛ ne tɛɛ de dↄↄ fa balaŋ abↄↄ nɛ, gyae ke yela balaŋ ke fa Wurubuarɛ karaŋ. 12Nawolo nyi mena wↄe ya aneyɛɛŋ kei nɛ, te yeli Kristotena burum te nyiŋ kpene keŋ bɛɛ gyae, te bɛɛ lese Wurubuarɛ yele nideli. 13Ɛ ta lese ɛ dinↄↄ wola lee ɛ deeli keyɛɛ keŋ man. Ɛ deeli keyɛɛ keŋ gyae kawola nyi na Kristo nombia kpaakpaa ŋan ŋaageŋ te ɛ lɛɛwↄ di ya, mↄna balaŋ baa naa nyi ɛ ne di Wurubuarɛ nombia ŋan dↄↄ. Lee mena dↄↄ balaŋ baa lese Wurubuarɛ yele. 14Baa fane fa ŋon nideli lee be konↄↄ man. Nawolo nyi bɛɛ naa Wurubuarɛ bɛrɛɛ dinaa keŋ doo ɛ man nɛ. 15Ɛ yela dɛɛ do Wurubuarɛ nↄↄ, nawolo nyi ↄ bɛrɛɛ keŋ ↄ ba mo boele denibalaŋ nɛ ka dokoso be kyaa ya.

will be added

X\