2 Korintotena 8

1De tebia, dɛɛ gyae ɛ ka gyeŋ Wurubuarɛ bɛrɛɛ keŋ ↄ ba mo boele Kristotena baŋ be kyaa Masedonia tɛɛle dↄↄ nɛ. 2Be naa diyem nideli. Mↄna gyoŋ dinaa keŋ doo be man dↄↄ nɛ, keŋ na ba diyem koraŋ na bɛɛ yɛɛ wↄe nideli lee balaŋ abↄↄ kefa man. 3Mee di adansɛɛ lee ba wose man nyiaa, be faawↄ lee baŋ gbagba be konↄↄ man ba ketalebii man keŋ ŋolo ta ŋere wↄ ya. Maa tale yako nyi, be faawↄ kela be doŋ ↄto gba. 4Keŋ na ba diyem koraŋ na, ba sola daa nideli nyi dɛɛ fa wↄ gbɛɛ na baa kyↄ Kristotena baŋ be kyaa Gyudia tɛɛle man nɛ. 5Be yɛɛ kpene keŋ da te gyakaa loo gba nyi baa yɛɛ ya nɛ. Be taŋgbɛɛwↄ mo ba wose fa de Gbeŋgyoo Yesu, kenaŋ wↄle na te ba moo ba wose fa daa mↄ Wurubuarɛ kegyaebii man. 6Mena dↄↄ da sola Tituse nyi, mena keŋ ↄ be taŋ fi kↄba kelɛɛ asɛɛ ↄ na mo kyↄ ayematena nɛ, waa yɛɛ kakyeŋ na waa kyↄ ŋon na ɛ ke yɛɛ ke kelii ↄto. 7Ma gyeŋ nyi ɛ ne tale yɛɛ kpene kamasɛ nideli, lee ɛ kelɛɛdi na ɛ kekolosi na ɛ nombia kagyeŋ, na ɛ kakyeŋ kado, na ɛ balaŋ kegyae pou man. Mena dↄↄ ɛ yɛɛ kakyeŋ na ɛ ke yɛɛ ɛ kↄba kefa tom keŋ mↄ nideli. 8Te yɛɛ nyi mɛɛ ŋere ŋon bo ya. Mↄna mɛɛ gyae maa mo Masedoniatena kakyeŋ keŋ bɛɛ yɛɛ lee balaŋ abↄↄ kefa man nɛ, mo maa na ŋon na maa naa mena keŋ ɛmɛɛ mↄ ɛ balaŋ kegyae doo. 9Ɛ gyeŋ mena keŋ de Gbeŋgyoo Yesu Kristo bɛrɛɛ keŋ doo. Ɛ gyeŋ nyi ↄ yɛɛ gyoorobu e, mↄna lee ɛmɛɛ dↄↄ te ↄ kaa bese diyemte, na ↄ diyem keŋ ke yela ɛmɛɛ ka bese gyoorobia. 10Nombia ŋan me dana maa kolosi fa ŋon lee nombia kɛŋa man yɛna nyiaa, kaboena nyi yaa tↄↄle kpene keŋ ɛ be baŋ nae ɛ ne yɛɛ lee dewii keŋ nɛ. Dewii na ɛmɛɛ kyaŋa na gbɛɛ keŋ ɛ ne gyae nyi ɛ ke fa abↄↄ, te ɛmɛɛ mↄ taŋgbɛɛ la fa abↄↄ ŋenaŋ. 11Mena dↄↄ tom keŋ ɛ be fiasɛɛ ɛ ne yɛɛ nɛ, ɛ gyeŋ yɛɛ ke kelii ↄto. Kegyae keŋ ɛ ne gyae nyi ɛ ke fa nɛ, ɛ mo mena kegyae kenaŋ fa kelii ↄto lee ɛ ketalebii man. 12Nyi akpaa ŋolo ne gyae nyi waa fa kolo lee ↄ konↄↄ man na, kpene keŋ ↄ dana te ↄ na lese fa lee ↄ konↄↄ man nɛ, keŋ na gyoo na Wurubuarɛ sia. Na kpene keŋ ↄ be dana waa fa nɛ ya. 13Na da kegyaebii yɛna nyi baale wose dɛɛ fɛɛ wↄ, na ɛmɛɛ wose kekyaŋ ŋon ya. Mↄna kpene keŋ dɛɛ gyae yɛna nyi, ɛ popou wose dɛɛ fɛɛ ŋon kyɛɛkyɛɛ. 14Debaŋ kei dↄↄ ɛmɛɛ dana, mena dↄↄ kaboena nyi yaa kyↄ baŋ ba wose be kyaŋ wↄ nɛ. Na wee daale ɛmɛɛ mↄ wose de kyaŋ ŋon na, baŋ mↄ ke nyiŋ kyↄ ŋon. Dekↄŋ mena na, ɛ popou wose gyae ke fɛɛ ŋon kyɛɛkyɛɛ. 15Wurubuarɛ nombia aŋmaraseŋ see yakowↄ lee weenɛɛ ŋan Wurubuarɛ be fa Iseraetena lee adido nɛ wose man nyiaa, "Walaŋ ŋon ↄ be yilaa ŋa burum na, ↄ nↄↄnↄↄle te ↄ nyiŋawↄ. Te ŋon mↄ ↄ be yilaa kyomii nɛ, ŋon mↄ nyiŋa ↄ nↄↄnↄↄle bo." 16Mɛɛ fa Wurubuarɛ karaŋ ŋgba mena keŋ ↄ be yeli Tituse ne gyae ɛ nombia, ŋgba mena keŋ maŋ mↄ ne gyae ɛ nombia nɛ. 17Na keŋ dↄↄ waase Tituse dↄↄ te ↄ sɛɛwↄ nyi waa kↄŋ ɛ gyaŋ ya. Mↄna ɛ nombia wulaa gyↄↄ e loo, te ↄ wulaa yɛɛ wa agyueŋ nyi waa kↄŋ ɛ gyaŋ. 18Dee kpila de gyoo Kristobaale ŋolo nyi waa kpu na Tituse na baa kↄŋ ɛ gyaŋ. De gyoo ŋonaŋ kɛɛ tɛɛ kolosi Kristo nombia kpaakpaa ŋan dↄↄ, te yeli ↄ te nyiŋ yele Kristotena pou man. 19Agyakaŋ yɛna nyi, Kristotena baŋ pou lese na e nyi waa kpu na daa na dɛɛ ta lɛɛ kↄbase ŋan dɛɛ lɛɛ nɛ. Mena tom kei de dↄŋɛɛ dɛɛ yɛɛ nɛ, na lese Wurubuarɛ yele te kɛɛ lese de kakyeŋ keŋ daa mↄ na doo na dɛɛ mo kyↄ ŋon nɛ wola. 20Dɛɛ kɛɛ da wose dↄↄ nideli keŋ nyi, ŋolo be nyiŋ nombiikum daale kolosi lee da wose man, lee mena keŋ dɛɛ mo tela mena kↄbase ŋan ɛ ne faa nɛ ya. 21Nawolo nyi da kegyaebii yɛna nyi, dɛɛ yɛɛ kpene kamasɛ ke gbɛɛ dↄↄ. Na dɛɛ yɛɛ ke bo nyi ka gyoo Wurubuarɛ waageŋ sia ya, mↄna ka gyoo denibalaŋ mↄ sia. 22Dee kpila de gyoo Kristobaale ŋolo ŋon daa na e ne yɛɛ tom nɛ, nyi waa kpu na wↄ na baa kↄŋ ɛ gyaŋ. De ta gyoo ↄ man naa nyi, gbɛɛ kamasɛ man na ↄ dana kakyeŋ. Ↄ sia te yɛɛ nyi waa kↄŋ ɛ gyaŋ na ↄ kaa kyↄ ŋon, nawolo nyi ↄ te lɛɛ ŋon di nideli. 23Tewulɛɛ kɛwↄ man na, Tituse yɛna walaŋ ŋon daa na e ne yɛɛ tom dokoloŋ som ŋon. Tewulɛɛ akaŋ baŋ dↄↄ, Kristotena baŋ lese na wↄ nyi be kaa seŋ be nawↄↄ man, na baa lese Kristo yele. 24Mena dↄↄ ɛ lese ɛ balaŋ kegyae keŋ wola wↄ, na ke yela baa gyeŋ kpene keŋ dↄↄ dee gyina da wose adido lee ɛ dↄↄ nɛ, na Kristotena baŋ man balaŋ pou ke nyiŋ naa.

will be added

X\