2 Korintotena 7

1Me gyoona kpaakpaa, Wurubuarɛ te wulaa yako see nyi waa yɛɛ mena abↄↄ kɛŋa pou fa daa. Mena dↄↄ ɛ yela dɛɛ lese ayimɛɛ kamasɛ ŋan ne wↄlɛɛ da wosenaane na da woo nɛ leki. Ɛ yela Wurubuarɛ keyee ke doo de man, na dee desina da wose nideli see fa e, na dɛɛ mo obuo fa e lee da kekyaabii man. 2Ɛ booli ɛ wose na daa, na ɛ ka mo ɛ konↄↄ pou fa daa. Da te yɛɛ ŋolo nombiikum daale ya. Da te wↄlɛɛ ŋolo nyee ya, te de ta ŋere ŋolo mↄ do ya. 3Mↄↄ ne yako mena nombia kɛŋa na maa mo bu ŋon fↄↄ ya. Me wulaa yako ŋon kaa laŋ nyiaa, dɛɛ gyae ɛ nombia nideli lee de konↄↄ man. Mena dↄↄ nyi nyeedoŋ man o, yeŋ man o, daa na ŋon yaa. 4Mɛɛ lɛɛ ŋon di nideli te lee ɛmɛɛ dↄↄ mee gyina ma wose adido tɛɛle kei dↄↄ. Keŋ na da diyem keŋ dɛɛ naa kei koraŋ nɛ, mena dinↄↄ kei na do maŋ kakyeŋ nideli te gyoŋ keŋ doo me man mↄ nɛ be taŋ ↄto ya. 5Debaŋ keŋ dↄↄ kↄŋ Masedonia tɛɛle man nɛ, de te nyiŋ da wose gba koraŋ dɛɛ kyaa fɛɛfo ya. Balaŋ naase daa diyem lee gbɛɛ kamasɛ man. Baale korowↄ seŋ tia daa, yela gyakoloŋ gyoo daa. 6Mↄna Wurubuarɛ ŋon ↄ ne yako do balaŋ baŋ dekↄkↄrↄkↄↄ be kyaŋ wↄ nɛ, ŋon tɛɛ la Tituse ŋon ↄ ba lee ɛ gyaŋ nɛ dↄↄ kↄŋ kaa yako do daa mↄ. 7Na Tituse kekↄŋ kaageŋ keŋ doo na daa kakyeŋ ya, mↄna kakyeŋ keŋ ɛ ba do e nɛ mↄ kpuɛ. Nawolo nyi ↄ yako daa mena keŋ me nombia ne gyↄ ŋon loo, na mena keŋ ɛ ne wii maŋ, na mena keŋ ɛ be desina ɛ wose nyi ɛ ke yoo seŋ me wↄle nɛ. Mena dↄↄ te yeli me sia ta gye nideli. 8Me nyiiwↄ nyi tↄne keŋ mↄↄ ŋmarase yelee ŋon nɛ te fɛɛ ɛ wↄe ya. Mↄna te takaa maŋ ŋgba mↄↄ ŋmarase ke nɛ ya. Me naawↄ nyi tↄne kenaŋ man nombia takaa ŋon berɛ, mena dↄↄ takaa maŋ mↄ. Mↄna ma gyeŋ nyi ka be gyae ke takaa ŋon kekpaakekpaa ya. 9Lee mena dↄↄ nɛnɛɛ dana maŋ gyoŋ. Te yɛɛ nyi keŋ tↄne keŋ man nombia be takaa ŋon dↄↄ ya, mↄna keŋ ka be yele ɛ be kyɛɛkee lee ɛ gbɛɛneŋ kumɛɛ man dↄↄ. Nawolo nyi ka ke takaa ŋon keŋ yɛɛ Wurubuarɛ kegyaebii man ke. Mena dↄↄ da gyeŋ nyi da te yɛɛ ŋon kolo kum ya. 10Kolo de takaa ŋolo lee Wurubuarɛ kegyaebii man na, ne yele ↄ ne kyɛɛkee lee ↄ gbɛɛneŋ kumɛɛ man na ↄ kaa nyiŋ nyeekelɛɛ. Ke bɛɛ takaa ↄtenate wↄle wↄle bela ya. Mↄna nyi kolo de takaa ŋolo keŋ ka te yɛɛ Wurubuarɛ kegyaebii man ke ya na, kɛɛ mo ↄtenate gyu yeŋ man. 11Ketakaa keŋ be yɛɛ Wurubuarɛ kegyaebii maŋ dↄↄ, ɛ kɛɛ nombia kpaakpaa ŋan ba lee ke man kↄŋ. Te yeli ɛ te yase ɛ sia ɛ kaa lese wola walaŋ kamasɛ nyi, ɛ ba gyeŋ kolo lee nombiikum keŋ man ya. Ɛ gyeŋa baŋ nideli lee nombii kenaŋ dↄↄ, te gyakoloŋ mↄ gyoo ŋon. Te yeli ɛ ne gyae me nombia, te ɛ loo gyakaa nyi ɛ kena maŋ. Te yeli ɛ te yase ɛ sia ɛ ke desina nombia ŋenaŋ man, na ɛ ke wↄŋ dukumyɛɛre ŋon deŋele. Lee gbɛɛ kamasɛ man na, ɛ ta lese wola nyi ɛ ba gyeŋ kolo lee nombiikum kei man ya. 12Mena tↄne keŋ mↄↄ ŋmarase yelee ŋon nɛ, na walaŋ ŋon ↄ be yɛɛ dukum, yaa ŋon bↄↄ yɛɛ dukum tia e nɛ baageŋ dↄↄ te me ŋmarase ke ya. Mↄna me ŋmarase ke bo na Wurubuarɛ ke yela ɛ ka gyeŋ lee ɛmɛɛ gbagba ɛ konↄↄ man nyi, de nombia yɛɛ ɛ nombia ŋa Wurubuarɛ siaman. 13Mena abↄↄ kɛŋa pou na do daa kakyeŋ. Kei wↄle na, debaŋ keŋ dↄↄ naa nyi Tituse sia ta gye lee mena keŋ ɛ popou be kyↄ e, te wa agyueŋ be yɛɛ e dokoloŋ nɛ, yɛɛ daa mↄ gyoŋ nideli. 14Me kɛlɛɛ ŋon fa Tituse, te ɛ te yeli desɛŋ ke kyaŋ maŋ ya. Mena keŋ kpene kamasɛ keŋ dↄↄ yako ŋon yɛɛ ampaŋ nɛ, mena mↄ te da ke kɛlɛɛ ŋon fa Tituse keŋ te kaa yɛɛ ampaŋ. 15Akpaa ↄ kɛɛ mena keŋ ɛ be bu e, na mena keŋ ɛ ba mo obuo lɛɛ e nɛ, ne yeli ↄ ne gyae ŋon nideli kpu. 16Dana maŋ gyoŋ nideli, nawolo nyi ma gyeŋ nyi maa tale mo ma wose lↄ ɛ dↄↄ nideli.

will be added

X\