2 Korintotena 6

1De yɛɛ balaŋ baŋ daa na Wurubuarɛ ne yɛɛ na tom. Lee mena dↄↄ dɛɛ waase ŋon bo nyiaa, ɛ na yeli Wurubuarɛ bɛrɛɛ keŋ ↄ ba mo boele ŋon nɛ ke yɛɛ yakaa ya. 2Nawolo nyi Wurubuarɛ nombia aŋmaraseŋ see yakowↄ yenaŋ daale nyiaa, "Wurubuarɛ kpa debaŋ keŋ kaboena nyi maa wii ŋon nɛ, me nyii ɛ ke fane. Debaŋ keŋ mↄ kaboena nyi maa lɛɛ ɛ nyee nɛ, me lɛɛ ŋon." Te maŋ Pↄↄl ne yako ŋon baa ɛ ke nyii nyiaa, nɛnɛɛ yɛna debaŋ keŋ kaboena nyi Wurubuarɛ waa wii ŋon. Gyɛŋ wee kei yɛna nyeekelɛɛwee keŋ. 3De bɛɛ gyae nyi ŋolo ke wↄlɛɛ da yele lee tom keŋ dɛɛ yɛɛ nɛ man ya. Mena dↄↄ dɛɛ yɛɛ kakyeŋ nyi dↄↄ yɛɛ kolo, na ŋolo kenyiŋ gbɛɛ mo ayimɛɛ wuu daa ya. 4Lee mena dↄↄ de nombia ayɛɛsa pou man na, dɛɛ lese wola ŋon nyi de yɛɛ Wurubuarɛ tewulɛɛwↄ. Nawolo nyi de nyiŋa konↄↄ seŋ keŋkeŋ de kayeyɛɛ, na debaŋ keŋ da wose be kyaŋ daa nɛ, na de kaale burum man. 5Be tuku daa nideli wↄŋee daa balaŋ man, te be kyaŋa daa tↄ deni. De kyaŋa da wose yɛɛ tom nideli keŋ nyi dↄↄ ne nyiŋ dosoroŋ gba dee doo ya, te de tɛɛwↄ mↄ na tanam. 6Dɛɛ lese wola nyi de yɛɛ Wurubuarɛ tewulɛɛwↄ, mo lee da kekyaabii keŋ ayimɛɛ be doo ke man ya nɛ man. Da gyeŋ Wurubuarɛ nombia ŋan, te dee nyiŋ konↄↄ te dɛɛ yɛɛ deeli. Wurubuarɛ feliŋ ŋon doo de man, te dɛɛ gyae balaŋ anokoare man. 7Nombii na anokoare te dee kolosi, te dɛɛ yɛɛ kpene kamasɛ mↄ bo lee Wurubuarɛ doŋ man. De nombia ŋan tenɛɛ Wurubuarɛ siaman nɛ, te de dana demena na dunoluŋ ŋgba yoo abↄↄ nɛ. Ŋan te dɛɛ mo yoo lɛɛ da wose. 8Baale na lese da yele, te baale mↄ na do daa desɛŋ. Baale na tee daa, mↄna baale mↄ ne kɛlɛɛ daa. Baale ne kɛɛ daa nyi de yɛɛ akɛrɛɛtenawↄ, mↄna de nombia doo na ke gbɛɛ. 9Baale gyaŋ na, da te yɛɛ balaŋwↄ ya, mↄna da yele ta lee nideli. Kayeyɛɛ dↄↄ akpaa n naa daa na n kpa dɛɛ yem baa, mↄna de dana nyeedoŋ. Bɛɛ naase daa diyem nideli, mↄna de bɛɛ yem ya. 10De dↄŋ waraŋase man, mↄna Kristo dↄↄ dee di gyoŋ debaŋ kamasɛ. De dↄŋ na diyem, mↄna dee yeli balaŋ burum ne nyiŋ abↄↄ kpaakpaa lee Wurubuarɛ gyaŋ. De dↄŋ ŋgba balaŋ baŋ bↄↄ dana kolo ya nɛ, mↄna Kristo dↄↄ kolo na kolo bee hia daa ya. 11Me tebia Korintotena, da te kolosi nombii na anokoare keŋ fa ŋon, keŋ de ta mo kolo weese ŋon ya. Te dɛɛ gyae ŋon nideli lee de konↄↄ man. 12De bɛɛ wↄŋ da wose lee ɛ man ya, mↄna ɛmɛɛ ne wↄŋ ɛ wose lee de man. 13Mee kolosi baa fa ŋon ŋgba mena keŋ maa kolosi fa me bia nɛ. Mena dↄↄ ɛ na wↄŋ ɛ wose lee de man na daa mↄ ke wↄŋ da wose lee ɛ man ya. 14Ɛmɛɛ na balaŋ baŋ ba te yɛɛ Kristotenawↄ ya nɛ na yɛɛ nↄↄdokoloŋ ya. Ɛmɛɛ gbagba ɛ kɛɛ nyi, walaŋ ŋon ↄ nombia tenɛɛ Wurubuarɛ siaman na walaŋkum baa tale yɛɛ nↄↄdokoloŋ? Yaa ditiŋtɛɛ na keŋmaŋee gyae ke tale kyaa bom? 15Loŋtoro woŋti doola Kristo na ↄbↄnsam nsana? Yaa Kristo walaŋ na walaŋ ŋon ↄ te yɛɛ Kristo walaŋ e ya nɛ baa tale yɛɛ nↄↄdokoloŋ. 16Loŋtoro woŋti doola Wurubuarɛ ↄsom deni na bane nsana? Daa yɛna Wurubuarɛ ŋon ↄ kyaa kekpaakekpaa nɛ ↄsom deni keŋ. Wurubuarɛ gbagba yakowↄ ↄ nombia aŋmaraseŋ see ŋan man nyiaa, "Maa kyaa be man, na maa kpu na wↄ, na maa yɛɛ be Wurubuarɛ, na baŋ mↄ ke yɛɛ me balaŋ. 17Ɛ lese ɛ wose lee be man, na ɛ ke tira ɛ wose na wↄ. Ɛ na tina kpene keŋ ka wose dana ayimɛɛ nɛ ya. Ɛ yɛɛ mena na, maa lɛɛ ŋon do. 18Maa yɛɛ ɛ kya, na ɛmɛɛ mↄ ke yɛɛ me bia. Nnɛ yaa de Gbeŋgyoo Wurubuarɛ doŋte ŋon ne yako."

will be added

X\