2 Korintotena 5

1Da gyeŋ nyi tɛɛle kei dↄↄ de kyaa nɛ, dↄↄ gyae dɛɛ kyare ya na de ta yem. Mↄna akpaa da yem na, Wurubuarɛ waa fa daa wosenaane wↄle adido, keŋ ka te yɛɛ tɛɛle kei dↄↄ wosenaane ke ya. Wurubuarɛ gbagba yɛɛ na ke, te ke gyae ke kyaa kekpaakekpaa. 2Debaŋ kei na dɛɛ keketee da wose man, nawolo nyi dɛɛ gyae nideli nyi Wurubuarɛ waa faa daa mena wosenaane wↄle kei. 3Nyi akpaa Wurubuarɛ da mo ke do daa na, dↄↄ gyae dɛɛ ta diteŋteli ya. 4Debaŋ keŋ de sɛɛ de doo wosenaane kei man nɛ, dɛɛ yeyɛɛ ŋgba kasolↄ daale na ŋere na daa nɛ. Na dɛɛ yako baa nyi yeŋ yaa dɛɛ gyae debokeiman ya. Mↄna nafↄ da kegyaebii yɛna nyi Wurubuarɛ waa mo wosenaane wↄle keŋ kyaa adido nɛ do daa. Na wosenaane wↄle keŋ kaa kyaa wosenaane bene keŋ na yem nɛ nawↄↄ man. 5Wurubuarɛ gbagba desina na daa fa mena kekyɛɛkee kenaŋ, te ↄ moo ↄ feliŋ ŋon do de man. Ŋon te ↄ moowↄ see ateta, mo kyaŋ abↄↄ ŋan pou waa kaa yɛɛ fa daa nɛ nae. 6Mena dↄↄ debaŋ kamasɛ na da wose bɛɛ yↄkↄse daa ya. Da gyeŋ nyi debaŋ keŋ de sɛɛ de kyaa wosenaane kei man kɛbo nɛ, de ta gyoo ta botↄↄ keŋ de Gbeŋgyoo Yesu kyaa nɛ ya. 7Da ke kyaa tɛɛle kei dↄↄ nɛ, nombia ŋan dↄↄ lɛɛ di nɛ ŋan te de silana. Na abↄↄ ŋan dɛɛ naa na de sia nɛ, te de silana ya. 8Lee mena dↄↄ de dana lookegyakaa nideli. Nafↄ da kegyaebii yɛna nyi, dɛɛ lee wosenaane kei man na de kaa kyaa de Gbeŋgyoo Yesu gyaŋ. 9Mena dↄↄ nyi de kyaa tɛɛle kei dↄↄ bo o, yaa da yeŋae o, kpene keŋ dↄↄ dɛɛ yase de sia yɛna nyi, dɛɛ yɛɛ kpene keŋ gyae ka gyoo de Gbeŋgyoo Yesu sia. 10Nawolo nyi kaboena nyi walaŋ kamasɛ waa kↄŋ kaa seŋ Kristo siaman na waa di ↄ nombia, na waa tↄ walaŋ kamasɛ kom ŋgba mena keŋ ↄtenate be yɛɛ ↄ tom tɛɛle kei dↄↄ nɛ. Dukum dana ka kom ketↄ, te debam mↄ dana ka kom ketↄ. 11Da gyeŋ Wurubuarɛ keyee kedoobii man dↄↄ, te dɛɛ do balaŋ kakyeŋ Wurubuarɛ ↄsom man. Wurubuarɛ gyeŋ de dinↄↄ, te dɛɛ lɛɛdi nyi ɛmɛɛ mↄ ɛ gyeŋ de dinↄↄ lee ɛ konↄↄse man. 12Te yɛɛ nyi da bese yaa dɛɛ kɛlɛɛ da wose bo fa ŋon ya. Mↄna dɛɛ tↄↄse ŋon nombia ŋan gyae ke yela ɛ ke tale gyina ɛ wose adido lee daa dↄↄ nɛ bo. Dekↄŋ mena na, ɛ ke tale nyiŋ nombii yako balaŋ baŋ bee gyina ba wose adido lee abↄↄ ŋan bɛɛ mo be sia naa ŋa nɛ dↄↄ, kela ŋan ŋe doo deniwalaŋ konↄↄ man nɛ. 13Akpaa nombia kɛŋa dↄↄ te ɛ yako nyi da nyeeya ne wↄlɛɛ na, ŋe wↄlɛe fa Wurubuarɛ. Te akpaa da nyeeya doo mↄ na, kenaŋ na ɛmɛɛ dↄↄ te da nyeeya doo. 14Kristo kegyae keŋ te di da nyee, nawolo nyi da gyeŋ nyi ŋon lɛɛ na balaŋ pou yeŋ yeŋ. Mena dↄↄ yɛɛ yaa ŋgba balaŋ pou yeŋa la nɛ. 15Kristo yeŋa la fa balaŋ pou, na ke yela baŋ be kyaa na be sia nɛ be nyiŋ kyaa fa ba wose ya. Mↄna baa kyaa fa Yesu Kristo ŋon ↄ ba yem fa wↄ, te Wurubuarɛ be gyuusu e nɛ. 16Mena dↄↄ lee nɛnɛɛ ne gyu na, dↄↄ ne kɛɛ balaŋ ŋgba mena keŋ tɛɛle kei dↄↄ balaŋ ne kɛɛ wↄ nɛ ya. Gyaŋgba keŋ na, nafↄ de kɛɛ Kristo mↄ mena. Mↄna nɛnɛɛ dↄↄ, dↄↄ na tekaa kɛɛ e mena bela ya. 17Lee mena dↄↄ akpaa nyi ŋolo de lɛɛ Kristo di na, ↄ ta bese walaŋ wↄle. Ↄ dinↄↄ bene keŋ te lam, te nɛnɛɛ ↄ te nyiŋ dinↄↄ wↄle. 18Nombia kɛŋa pou lee Wurubuarɛ gyaŋ. Ŋon tɛɛ la Yesu Kristo dↄↄ desina daa na ŋon Wurubuarɛ nsana, te ↄ faa daa tom nyi dɛɛ yako ↄ nombia kɛŋa, na dɛɛ mo desina ŋon na balaŋ nsana. 19Nombii keŋ dɛɛ yako ŋon yɛna nyiaa, Wurubuarɛ tɛɛ la Kristo dↄↄ desina ŋon na balaŋ pou nsana, te ↄ moo be nombiakumɛɛ pou kyɛɛ wↄ. Te ↄ moo ŋon na balaŋ nsana kedesina tom kei do daa de nyiŋmaa man. 20Mena dↄↄ daa yɛna Kristo kpilala baŋ da seŋɛɛ ↄ nawↄↄ man, keŋ Wurubuarɛ ne tɛɛ de dↄↄ kolosi sola ŋon. Da seŋɛɛ Kristo nawↄↄ man dɛɛ sola ŋon nyi, ɛ yela ɛmɛɛ na Wurubuarɛ nsana keyɛɛ gyoŋ. 21Kristo te yɛɛ nombiikum kamasɛ ya. Mↄna Wurubuarɛ yela ↄ kaa moo de nombiakumɛɛ pou seele. Te ↄ yeŋawↄ ŋgba nombiakumɛɛyɛɛre nɛ, na ke yela de nombia ka tenee Wurubuarɛ siaman lee ŋon Kristo dↄↄ.

will be added

X\