2 Korintotena 4

1Lee mena keŋ Wurubuarɛ be wii de waraŋase, te ↄ ba mo tom kei do daa de nyiŋmaa man dↄↄ nɛ, dↄↄ ne yee ya. 2Mena dↄↄ te da lese da wose lee desɛŋ nombia man, te dↄↄ ne yɛɛ kolo mↄ weese ya. Dↄↄ na mo adao gbɛɛneŋ man mo kolo kyakale na Wurubuarɛ nombia ŋan ya. Mↄna dɛɛ lese Wurubuarɛ nombia ŋan ŋe yɛɛ anokoare nɛ man nideli, na walaŋ kamasɛ kagyeŋ nyi kpene keŋ dɛɛ yɛɛ nɛ, te yɛɛ dekara Wurubuarɛ siaman ya. 3Te akpaa Kristo nombia kpaakpaa ŋan yɛɛ nombia aweeseŋ ŋa na, kenaŋ na ŋe yɛɛ nombia aweeseŋ ŋa bo fa balaŋ baŋ baa yo nɛ baageŋ. 4Mena balaŋ kɛwↄ bɛɛ lɛɛ nombia kpaakpaa ŋan di ya, nawolo nyi ↄbↄnsam ŋon ↄ yɛɛ tɛɛle kei dↄↄ gyoo e nɛ, ta mo wↄ do ditiŋtɛɛ man. Mena dↄↄ bↄↄ ne naa keŋmaŋee keŋ doo nombia kpaakpaa ŋan na lese ↄ gyoorobiiri wola nɛ ya. Te bↄↄ ne naa, na baa gyeŋ nyi Kristo yɛna Wurubuarɛ dinↄↄ gbagba ŋon ya. 5Nombia ŋan dee kolosi fa ŋon nɛ, te yɛɛ daa gbagba da wose man nombia yaa dee kolosi fa ŋon ya. Mↄna Yesu Kristo nombia kpaakpaa ŋan yaa dee kolosi fa ŋon, nyi ŋon yɛna de Gbeŋgyoo te ŋon mↄ dↄↄ te dɛɛ som ŋon. 6Nawolo nyi Wurubuarɛ ŋon ↄ be yako nyi, "Keŋmaŋee dɛɛ lee ditiŋtɛɛ man ŋmaŋee nɛ," ŋon ke yela la te keŋmaŋee ŋmaŋeewↄ de konↄↄse man, na ke yela dɛɛ gyeŋ Wurubuarɛ gyoorobiiri keŋ doo Kristo man nɛ. 7Mↄna daa baŋ Wurubuarɛ gyooro abↄↄ kɛŋa doo de man nɛ, de yɛɛ ŋgba kpene keŋ bↄↄ mo tɛɛle ma ke nɛ. Na ka wola nyi doŋ dinaa keŋ doo de man nɛ, lee Wurubuarɛ gyaŋ. Ke ta lee daa gbagba gyaŋ ya. 8Dɛɛ naa diyem lee gbɛɛ kamasɛ man, mↄna da seŋɛɛ keŋkeŋ. Debaŋ ŋaale man na da agyueŋ bee doo debodokoloŋ ya, mↄna da wose bee gbirisi daa ya. 9Bɛɛ naase daa diyem, mↄna Wurubuarɛ bɛɛ lese ↄ sia yela daa ya. Bɛɛ gyↄ daa lↄ yeŋ yeŋ, mↄna dↄↄ na yem ya. 10Wee na wee na dɛɛ naa diyem yeŋ yeŋ da wose man, ŋgba mena keŋ Yesu mↄ be naa nɛ. Na kawola nyi nyeedoŋ keŋ Yesu dana nɛ, keŋ ke te daa mↄ dana. 11Daa baŋ de kyaa na de sia nɛ, wee na wee na lee Yesu dↄↄ bɛɛ lese daa fa yeŋ. Na ke yela walaŋ kamasɛ kena nyi, Yesu nyeedoŋ keŋ doo daa baŋ da wosenaane kei gyae ka yeŋ nɛ mↄ man. 12Lee mena dↄↄ daa ne gyaŋee na yeŋ nombia wee kamasɛ, na ɛmɛɛ kenyiŋ nyiŋ nyeedoŋ kekpaa. 13Wurubuarɛ nombia aŋmaraseŋ see yenaŋ daale ne yako nyiaa, "Me lɛɛ Wurubuarɛ nombia di dↄↄ, te me kolosi ↄ nombia." Kelɛɛdi dokoloŋ kenaŋ te daa mↄ lɛɛwↄ di, mena dↄↄ te dee kolosi ↄ nombia nɛ. 14Da gyeŋ nyi Wurubuarɛ ŋon ↄ be gyuusu de Gbeŋgyoo Yesu lee yeŋ man nɛ, waa ta Yesu dↄↄ gyuusu daa na waa mo ŋon kpu na daa kaa seŋ ŋon Wurubuarɛ siaman. 15Ɛ deeli dↄↄ te nombia kɛŋa pou kↄŋawↄ mena, na ŋgba mena keŋ Wurubuarɛ ba mo ↄ bɛrɛɛ boele balaŋ burum te ↄ ne lɛɛ ba nyee nɛ, ke yela baa fane fa Wurubuarɛ karaŋ nideli na baa lese ↄ yele. 16Lee mena dↄↄ da wose bɛɛ yↄkↄse daa ya. Nawolo nyi keŋ na da wosenaane kɛɛ yↄkↄse kei koraŋ nɛ, de dinↄↄ wↄle keŋ dↄↄ kee nyiŋ doŋ wee kamasɛ. 17Diyem keŋ dɛɛ naa debaŋ kei nɛ, ka be gyae ke kyare ya na ka te lam. Ke gyae ke yela dee nyiŋ gyoorobiiri keŋ gyae ke kyaa kekpaakekpaa, keŋ ka dokoso be kyaa ya te ka kela diyem keŋ dɛɛ naa nɛ. 18Mena dↄↄ, dↄↄ na mo de loo gyakaa abↄↄ ŋan dɛɛ naa na de sia fonɛɛ nɛ dↄↄ ya, mↄna dɛɛ mo de loo bo gyakaa abↄↄ ŋan dↄↄ ne naa na de sia ya nɛ dↄↄ. Nawolo nyi abↄↄ ŋan dɛɛ mo de sia naa ŋa nɛ, ŋe bɛɛ kyare ya na ŋa te lam. Mↄna abↄↄ ŋan dↄↄ na mo de sia naa ŋa ya nɛ, ŋe gyae ke doo kekpaakekpaa.

will be added

X\