2 Korintotena 13

1Kei yɛna betabotoorote ŋgba mɛɛ kↄŋ ɛ gyaŋ nɛ. Mɛɛ gyae ɛ ke tↄↄse nombii keŋ doo Wurubuarɛ nombia aŋmaraseŋ see yenaŋ daale nɛ nyiaa, "Pɛna ɛ ke bu ŋolo fↄↄ na, kaboena nyi yaa nyii lee balaŋ bala, yaa balaŋ batooro nↄↄman nyi nombii keŋ yɛɛ ampaŋ." 2Ma kekↄŋ ɛ gyaŋ bolate keŋ nɛ, me wulaa faree balaŋ baŋ pou bↄↄ yɛɛ nombiakumɛɛ kaalaŋ nɛ, na balaŋ akaŋ baŋ pou. Debaŋ kei keŋ mↄↄ kyaa ɛ gyaŋ ya nɛ, mena yaa me gyakaa mɛɛ faree ŋon nyiaa, akpaa ma bese kↄŋ na, mↄↄ gyae maa mo baŋ be sɛɛ bɛɛ yɛɛ nombiakumɛɛ nɛ wose kyɛɛ wↄ ya. 3Ɛmɛɛ kpa ɛ ne gyae ɛ kena nyi Kristo ne tɛɛ la me dↄↄ kolosi nɛ, ɛ kena ke. Ɛ kena nyi Kristo ba woɛ keŋ ↄ be gyae waa wↄŋ ɛ deŋele ya. Ↄ dana doŋ ɛ dↄↄ. 4Ke yɛɛ ampaŋ nyi be gyↄↄ e mataa ↄpaŋdaŋ dↄↄ, ŋgba walaŋ ŋon ↄ be taŋ doŋ ya nɛ. Mↄna debokeiman dↄↄ, ↄ te fom lee yeŋ man te ↄ kyaa Wurubuarɛ doŋ man. Mena mↄ te daa mↄ be taŋ doŋ ya. Mↄna keŋ de doo Kristo man dↄↄ, Wurubuarɛ doŋ doo de man te de dana dɛɛ som ŋon. 5Ɛ gyoo ɛ wose man nideli na ɛ ke kɛɛ nyi ɛ ne lɛɛ Yesu di nideli? Yaa ɛ ba gyeŋ nyi ɛmɛɛ na Yesu Kristo yɛɛ dokoloŋ yee? Akpaa ɛ ba gyeŋ mena ya na, kenaŋ na ɛ te yale ɛ kelɛɛdi man. 6Mɛɛ lɛɛ di nyi ɛ ka gyeŋ nyi, daa dↄↄ da te yala ta da kelɛɛdi man ya. 7Dɛɛ fane fa Wurubuarɛ nyiaa, ↄ na yeli ɛ ke yɛɛ kolo kum ya. Te yɛɛ keŋ nyi balaŋ ke kɛlɛɛ daa nyi da te yɛɛ daale dↄↄ ya, mↄna akpaa dekↄŋ nyi da te yale da kelɛɛdi man koraŋ na, dɛɛ gyae bo nyi ɛ ke yɛɛ nombia ŋan tenɛɛ Wurubuarɛ siaman nɛ. 8Nawolo nyi dↄↄ gyae dɛɛ tale lee nombii na anokoare keŋ wↄle ya. Ke man te da seŋɛɛ debaŋ kamasɛ. 9Nyi akpaa daa de yↄkↄse te ɛmɛɛ seŋɛɛ keŋkeŋ ɛ kelɛɛdi man na, dana daa gyoŋ. Nawolo nyi dɛɛ fane bo nyi yaa tale seŋ keŋkeŋ ɛ kelɛɛdi man Wurubuarɛ kegyaebii man. 10Mena dↄↄ te de kyaa lem na lem te mɛɛ ŋmarase tↄne kei mee yelee ŋon nɛ. Kenaŋ na akpaa me kↄŋ ɛ gyaŋ na, mↄↄ gyae maa mo doŋ keŋ de Gbeŋgyoo Yesu be fa maŋ nɛ kolosi na ŋon akpanyaŋnyaŋ man ya. Nawolo nyi de Gbeŋgyoo Wurubuarɛ faa maŋ doŋ kei bo, nyi maa mo kyↄ ŋon na ɛ ka bee ɛ kelɛɛdi man. Ↄ te fa maŋ ke bo nyi maa mo wↄlɛɛ ŋon ya. 11Me tebia, me nↄↄwoya ↄto yɛna nyiaa, ɛ kyaa nideli. Ɛ yase ɛ sia na ɛ ke kyaa nideli kelii ↄto, na ɛ ke tei nombia ŋan mↄↄ yako ŋon nɛ. Ɛ yɛɛ nↄↄdokoloŋ na ɛ ke kyaa wosefɛɛreŋ man. Na Wurubuarɛ ŋon ↄ ne gyae balaŋ te ↄ yɛɛ wosefɛɛreŋ Gbeŋgyoo e nɛ ke kyaa na ŋon. 12Ɛ mo Kristo balaŋ kegyae keŋ do dↄŋa nↄↄ lee ɛ konↄↄ man. 13Wurubuarɛ balaŋ baŋ pou be kyaa kɛbo nɛ na do ŋon nↄↄ. 14De Gbeŋgyoo Yesu Kristo waa mo ↄ bɛrɛɛ boele ŋon, na Wurubuarɛ kegyae keŋ ke doo ɛ man, na Wurubuarɛ feliŋ ŋon ke yela ɛ ke yɛɛ nↄↄdokoloŋ.

will be added

X\