2 Korintotena 11

1Mɛɛ waase ŋon nyiaa, akpaa nyi me nombia ŋan mee kolosi fa ŋon nɛ yɛɛ diyiŋ nombia ŋa koraŋ na, ɛ nyiŋ konↄↄ fa maŋ ŋgba mena keŋ ɛ ne taŋ nyiŋ konↄↄ fa maŋ nɛ. 2Mɛɛ gyae ŋon lee me konↄↄ man, ŋgba mena keŋ Wurubuarɛ ne gyae ŋon nɛ. Nawolo nyi ɛ yɛɛ ŋgba alebu keteŋ ŋon ayimɛɛ be doo ↄ man ya, te mↄↄ yako see nyi Kristo waageŋ te maa mo e fa waa yala nɛ. 3Mↄna me wↄe ne lↄ maŋ nyi, ŋolo waa beo ŋon na ɛ ka lese ya agyueŋ lee Kristo ↄsom keŋ dↄↄ, ŋgba mena keŋ dom ŋon ba mo adao gbɛɛneŋ man beo Efa gyaŋgba gyaŋgba keŋ nɛ. 4Nawolo nyi akpaa ŋolo de kↄŋ kaa kolosi Yesu wↄle ŋolo wose man nombia fa ŋon, lee Yesu ŋon daa be kolosi ↄ wose man nombia fa ŋon nɛ wↄle na, ɛ ne nyiŋ konↄↄ lɛɛ ↄtenate nombia do. Te ɛ bɛɛ gataa na feliŋ wↄlɛɛ mↄ kelɛɛdi kpu na Wurubuarɛ feliŋ ŋon ɛ be wulaa nyiŋ, na kawola wↄlɛɛ na nyeedoŋ nombia ŋan ɛ be wulaa nyii nɛ ya. 5Mↄↄ ne lɛɛ di mↄ nyi mena balaŋ baŋ be kpa baŋ yɛna Kristo kpilala gbagba nɛ, be man ŋolo kela maŋ ya. 6Nyi akpaa mↄↄ gyeŋ kekolosi ya nɛ, keŋ bɛɛ wolo nyi mↄↄ gyeŋ nombia bo ya. De ta lese mena nombia kɛŋa pou man wola ŋon lee gbɛɛ kamasɛ man. 7Mena keŋ mↄↄ yↄkↄse ma wose kolosi Wurubuarɛ nombia ŋan fa ŋon lese ŋon yele, te ma te lɛɛ ŋon kolo ya nɛ, me yɛɛ dukum baa? 8Debaŋ keŋ mɛɛ yɛɛ tom ɛ gyaŋ nɛ, ɛ tebia Kristotena baŋ be kyaa yenaase nɛ faa na maŋ abↄↄ te me talewↄ som ŋon. Mena dↄↄ maa tale yako nyi, ma moo kaale bo lↄ be dↄↄ na maa tale som ŋon. 9Nawolo nyi debaŋ keŋ me kyaa ɛ gyaŋ nɛ, ma wose kyaŋa maŋ na, me ta mo kaale kenaŋ lↄ ɛ dↄↄ ya. Mↄna de tebia Kristotena baŋ bↄↄ lee Masedonia nɛ, kaa faa maŋ abↄↄ ŋan pou mɛɛ gyae nɛ. Mena dↄↄ me kyaŋa ma wose, te me gyakaa mɛɛ kyaŋ ma wose nyi, mↄↄ bese kasolↄ ɛ dↄↄ lee gbɛɛ kamasɛ maŋ ya. 10Nombii na anokoare yaa mɛɛ yako ŋon lee Kristo man nyiaa, ŋolo be kyaa Akaya tɛɛle kei dↄↄ na waa tale tↄ maŋ gbɛɛ nyi me na gyina ma wose adido lee nombii kei dↄↄ ya. 11Woŋ dↄↄ te mɛɛ yako mena nombia kɛŋa? Nawolo baa nyi mↄↄ ne gyae ŋon yee? Wurubuarɛ gyeŋ nyi mɛɛ gyae ŋon. 12Mena keŋ mↄↄ wulaa bɛɛ nyi mↄↄ lɛɛ kolo lee ɛ gyaŋ ya nɛ, mena yaa me sɛɛ ma seŋɛɛ. Maa yɛɛ mena na maa nyiŋ mo tↄ baŋ bee gyina ba wose adido nɛ gbɛɛ. Na bↄↄ nyiŋ gbɛɛ wola ba wose nyi daa na wↄ ne yɛɛ na tom dokoloŋ ya. 13Nawolo nyi mena balaŋ benaŋ te yɛɛ Kristo kpilalawↄ ya. Bɛɛ beo balaŋ nyi bɛɛ yɛɛ tom bo fa Wurubuarɛ. Mena balaŋ benaŋ na mo be dinↄↄ gbagba weese, na bɛɛ yɛɛ ba wose ŋgba be yɛɛ Kristo kpilalawↄ nɛ. 14Be yɛɛ mena na be dana gyakoloŋ ya, nawolo nyi ↄbↄnsam gbagba koraŋ moo ↄ dinↄↄ gbagba weese, te ↄ moo ↄ wose yɛɛ ŋgba Wurubuarɛ kpilale kpaakpaate ŋolo nɛ. 15Mena dↄↄ nyi akpaa ↄbↄnsam ŋonaŋ tewulɛɛ mↄ da mo be dinↄↄ weese, te be yɛɛ ba wose ŋgba kpilala baŋ be gbɛɛneŋ tenɛɛ Wurubuarɛ siaman na, be dana gyakoloŋ ya. Be dinↄↄ keŋ be dana nɛ, keŋ te Wurubuarɛ waa kɛɛ na waa mo tↄ wↄ kom wee ↄtomante keŋ man. 16Mɛɛ yako ŋon baa bela nyiaa, ŋolo na yɛɛ wa agyueŋ nyi me yɛɛ diyiŋte e ya. Mↄna akpaa ɛ yɛɛ ya agyueŋ mena na, kenaŋ na ɛ lɛɛ maŋ ŋgba diyiŋte nɛ, na maa nyiŋ tale wola ma wose kyomii. 17Nombii na anokoare na, mena wose kawola kei te yɛɛ de Gbeŋgyoo kegyaebii man yaa mee kolosi ya. Mↄna mee kolosi baa ŋgba diyiŋte nɛ. 18Mena keŋ balaŋ burum na wola ba wose ŋgba mena keŋ tɛɛle kei dↄↄ balaŋ ne yɛɛ nɛ dↄↄ, maŋ mↄ maa wola ma wose mena. 19Ɛ kpa ɛ yɛɛ siakaralabiawↄ, mↄna ɛ ne nyiŋ konↄↄ kyaa tei ayiŋtena. 20Nyi akpaa ŋolo da besena ŋon yɛɛ ↄ kegbetibii, yaa ↄ na ŋere ŋon do, yaa ↄ ne kↄ ɛ nyeeya man di, yaa ↄ ne di gyoori ɛ dↄↄ, yaa ↄ bɛɛ kala ŋon do balaŋ man koraŋ ya na, ɛ ne nyiŋ konↄↄ lɛɛ ↄtenate do. 21Ɛ wui dei ŋgba de ta gyem na dɛɛ gyↄ de konↄↄ mo mena nombia kɛŋa yɛɛ ŋon ya nɛ. Mↄna kpene kamasɛ keŋ man ŋolo de gyↄ ↄ konↄↄ ↄ na wola ↄ wose na, maŋ mↄ maa tale gyↄ me konↄↄ wola ma wose kpene kenaŋ dↄↄ mena. Mee kolosi baa ŋgba diyiŋte nɛ. 22Nyi akpaa mena balaŋ benaŋ kpa be yɛɛ Hiburutenawↄ na, maŋ mↄ me yɛɛ Hiburu baale e. Nyi akpaa be kpa be yɛɛ Iseraetenawↄ na, maŋ mↄ me yɛɛ Iserae baale e. Nyi akpaa be kpa ba lee Aberaham duuluŋ man na, maŋ mↄ ma lee Aberaham duuluŋ man. 23Nyi akpaa be kpa be yɛɛ Kristo tewulɛɛwↄ na, maŋ yɛɛ Kristo tobaale kpaakpaate e kela wↄ. Nawolo nyi me yɛɛ tom na doŋ kela wↄ, te me naa diyem nideli mↄ kela wↄ. Be kyaŋa maŋ tↄ deni agbaatee agbaatee, te ba ŋmeree maŋ dambiise nideli, te be naase maŋ diyem yeŋ yeŋ wee na wee. Ɛ ke yako nyi mee kolosi baa ŋgba walaŋ ŋon ↄ nyee be doo ya nɛ, mↄna nombii na anokoare yaa mɛɛ yako. 24Gyudatena ŋmeree maŋ dambiise saonakufukadaale (39) betabonoŋ. 25Ba moo nyeela dambiise tuku maŋ betabotooro. Wee daale na, be fuŋii maŋ boya yeŋ yeŋ. Me kyaawↄ agbele dinaana man betabotooro keŋ ŋɛɛ buŋ maŋ, te ɛpo yela kedi maŋ. Te me kyaawↄ loŋ dↄↄ wee dibiliŋ nelim na ka weese. 26Me tɛɛ gbɛɛneŋ burum, te me naa diyem yeŋ yeŋ lee booneŋ katoŋ, na balaŋ baŋ bɛɛ ŋere balaŋ lɛo ba abↄↄ dekpaŋkpasare man nɛ nyiŋmaa man. Me dɛɛ Gyudatena, na baŋ ba te yɛɛ Gyudatenawↄ ya nɛ, naase maŋ diyem yeŋ yeŋ. Me naa diyem yeŋ yeŋ donↄↄ dinaana man, na ŋalese man na ɛpo dↄↄ, te me naa diyem balaŋ baŋ bee dii akɛrɛɛ nyi be yɛɛ Kristotenawↄ nɛ nyiŋmaa man. 27Me yɛɛ tom nideli keŋ te yɛɛ nsendee ya, te me naa diyem mↄ nideli. Me tɛɛwↄ weeya burum keŋ mↄↄ ne nyiŋ dosoroŋ gba maa doo ya, te me tɛɛwↄ na tanam na loŋboaneŋ. Me tɛɛwↄ weeya ŋaale man keŋ mↄↄ ne nyiŋ kolo na kolo gba tina me nↄↄ korakora ya. Me tɛɛwↄ na waare keŋ me te nyiŋ kolo kpaakpaate wuu ma wose ya. 28Nombia kɛŋa pou wↄle na, Kristotena akpiise ŋan pou nombia ne takaa na maŋ wee kamasɛ. 29Nawolo nyi, nyi ŋolo kelɛɛdi de yↄkↄse na, maŋ mↄ wose te yↄkↄse maŋ. Nyi ŋolo mↄ de yɛɛ dukum na, me tↄↄ loobia te kyoŋii maŋ fa ↄtenate. 30Nyi akpaa kaboena nyi maa wola ma wose na, maa wola ma wose bo lee abↄↄ ŋan na lese ma keyↄkↄse wola nɛ bo dↄↄ. 31Wurubuarɛ ŋon ↄ yɛɛ de Gbeŋgyoo Yesu Wurubuarɛ na ↄ kya e, te ↄ kaboena nyi dɛɛ lese ↄ yele kekpaakekpaa nɛ, ↄ gyeŋ nyi na dekara yaa mee dii ya. 32Debaŋ keŋ me kyaa Damasekuse donↄↄ man nɛ, walaŋ ŋon ↄ seŋɛɛ gyoo Aretase nawↄↄ man ↄ ne kɛɛ tɛɛle daale dↄↄ nɛ lese balaŋ nyiaa, baa deke Damasekuse donↄↄ keŋ anaanↄↄse ŋan pou na baa nyiŋ kyaŋ maŋ. 33Mↄna ba moo maŋ do dokyoŋoloŋ man, te be tisinaa maŋ ta na nfansere te me nyiŋa gbɛɛ yeu lee tɛɛle dↄↄ kɛɛre ŋon nyiŋmaa man.

will be added

X\