2 Korintotena 10

1Maŋ Pↄↄl gbagba ne waase na ŋon nombii kei dↄↄ. Ɛ man baale ne yako nyi akpaa me kyaa ɛ gyaŋ na mↄↄ dana nↄↄdoŋ ya. Mↄna akpaa ma lee ɛ gyaŋ na, me nↄↄdoŋ kela kpene kamasɛ. Mɛɛ mo de Gbeŋgyoo Kristo konↄↄ kenyiŋ na ↄ wose keyↄkↄse mɛɛ sola ŋon nyiaa, 2akpaa me kↄŋ ɛ gyaŋ na ɛ na yeli maa mo sibiiyam kolosi na ŋon, ŋgba mena keŋ maa kolosi na baŋ bɛɛ yako nyi dɛɛ yɛɛ da abↄↄ bo ŋgba tɛɛle kei dↄↄ balaŋ nɛ ya. 3Doo nyi de yɛɛ denibalaŋwↄ, mↄna na tɛɛle kei dↄↄ balaŋ adao gbɛɛneŋ te dɛɛ mo yoo ya. 4De yoo abↄↄ ŋan dɛɛ mo yoo nɛ, te yɛɛ tɛɛle kei dↄↄ yoo abↄↄ ya. Mↄna ŋe yɛɛ yoo abↄↄ ŋan ŋe doŋ ba lee Wurubuarɛ gyaŋ. Mena yoo abↄↄ ŋenaŋ, ne tale yↄkↄse ↄbↄnsam kpene kamasɛ keŋ kyaa tɛɛle kei dↄↄ nɛ. 5Dɛɛ mo de yoo abↄↄ kɛŋa di aŋmaareŋ kamasɛ dↄↄ, te dɛɛ bese mo ŋa di kpene kamasɛ keŋ na koro seŋ tia Wurubuarɛ nombia ŋan nɛ dↄↄ. Dɛɛ mo ŋa di agyueŋse kamasɛ dↄↄ, na ŋe ke nyii Kristo dei. 6Da te desina da wose nyiaa, akpaa ɛ mo ɛ konↄↄ pou fa Kristo na daa mↄ dɛɛ wↄŋ walaŋ kamasɛ ŋon waa yɛɛ deŋele doŋ tia Kristo nɛ deŋele. 7Ɛmɛɛ dↄↄ ɛ ne kɛɛ abↄↄ bo adido adido. Akpaa ŋolo de gyↄ ↄ konↄↄ nyi ↄ yɛɛ Kristo walaŋ e na, kaboena nyi mena walaŋ ŋonaŋ waa tↄↄse nyi daa mↄ de yɛɛ Kristo balaŋwↄ ŋgba ŋon nɛ. 8Nyi akpaa ma mo doŋ keŋ de Gbeŋgyoo Wurubuarɛ be fa maŋ nɛ gyina ma wose adido na, be gyae ke yɛɛ maŋ desɛŋ ya. Nawolo nyi ↄ moo ↄ doŋ kenaŋ bo fa daa, na ke yela ɛ kelɛɛdi keŋ ka bee. Mↄna te yɛɛ nyi ka ke wↄlɛɛ ŋon bo ya. 9Mↄↄ ne gyae ke yɛɛ ŋon ŋgba, mɛɛ mo me tↄna keŋmarase ŋan bo ŋmaase ŋon nɛ ya. 10Nawolo nyi balaŋ baale ne yako nyiaa, me tↄna ŋan mɛɛ ŋmarase nɛ dana doŋ, te ŋe man nombia mↄ dana yuŋ. Mↄna akpaa maŋ gbagba kyaa ɛ gyaŋ na, me nↄↄ bɛɛ yɛɛ doŋ ya te ma kekolosi mↄ yɛɛ yakaa. 11Kaboena nyi mena balaŋ benaŋ baa gyeŋ nyiaa, mena keŋ de kyaa lem te dɛɛ ŋmarase tↄna yelee ŋon nɛ, akpaa de kyaa ɛ gyaŋ koraŋ na mena ke te dɛɛ yɛɛ. 12Kegbagba na, dↄↄ gyae dɛɛ taŋ mo da wose maa na balaŋ baŋ bɛɛ kɛlɛɛ ba wose nɛ ya. Ɛ kɛɛ be diyiŋ nombia. Bɛɛ mo ba wose maa na dↄŋa, te bɛɛ mo ba wose kɛɛse na dↄŋa. 13Daa dↄↄ, dↄↄ gyae dɛɛ gyina da wose adido gbaa mena keŋ kaboena nɛ ya. Kpene keŋ dↄↄ dee gyina da wose yɛna tom keŋ Wurubuarɛ ba mo fa daa nyi dɛɛ yɛɛ, te dↄↄ yɛɛ ke kaa lii ɛmɛɛ mↄ gyaŋ nɛ. 14Akpaa deŋ te kↄŋ ɛ gyaŋ ya te dee gyina da wose adido na, nafↄ da wose kegyina keŋ gyae ka bese gbaa mena keŋ kaboena nɛ. Mↄna daa yɛna balaŋ baŋ dↄↄ taŋgbɛɛ mo Kristo nombia kpaakpaa ŋan kↄna ŋon. 15Ka te yɛɛ keŋ nyi dɛɛ mo tom keŋ baale be yɛɛ nɛ, gyina da wose adido gbaa mena keŋ kaboena nɛ ya. Mↄna de loo gyakaa bo nyi ɛ ka bee ɛ kelɛɛdi man, na tomse ŋan dɛɛ yɛɛ ɛ man nɛ ke gyu siaman nideli. 16Na dee nyiŋ tale gbaa ŋon gyu yenaase wↄlɛɛ mↄ ke yako Kristo nombia kpaakpaa ŋan. Nawolo nyi dↄↄ ne gyae dɛɛ mo tom keŋ ŋolo be yɛɛ nɛ lɛɛ yele ya. 17Mↄna kaboena nyi dɛɛ yɛɛ ŋgba mena keŋ Wurubuarɛ nombia aŋmaraseŋ see ŋan ne yako nɛ. Be ŋmarasewↄ nyiaa, "Akpaa ŋolo ne gyina ↄ wose adido na, kaboena nyi waa gyina ↄ wose adido lee kpene keŋ de Gbeŋgyoo Wurubuarɛ be yɛɛ fa e nɛ dↄↄ." 18Nawolo nyi na walaŋ ŋon ↄ ne kɛlɛɛ ↄ wose nɛ te Wurubuarɛ ne lɛɛ e do ya, mↄna walaŋ ŋon Wurubuarɛ ne kɛlɛɛ e nɛ, te ↄ ne lɛɛ e do.

will be added

X\