1 Timoti 6

1Ɛmɛɛ baŋ ɛ doo balaŋ tɛɛ nɛ, ɛ mo obuo fa ɛ gbeŋgyoona lee gbɛɛ kamasɛ man. Ɛ yɛɛ mena na ŋolo be nyiŋ kolosi nombiikum lee Wurubuarɛ na de kawola keŋ wose man ya. 2Nyi akpaa ŋolo ↄ gbeŋgyoo yɛɛ Kristo baale e nɛ, ↄ na kɛɛ nyi keŋ be popou yɛɛ Kristotenawↄ dↄↄ ↄ be bu e nideli ya. Keŋ gba te kaboena nyi waa mo obuo fa e nideli nawolo nyi baŋ bee di ba tom tↄnↄↄ nɛ, be yɛɛ Kristotenawↄ te bɛɛ gyae be nombia mↄ. Mena nombia kɛŋa te kaboena nyi nya wola wↄ na n ka do wↄ kakyeŋ na baa di ŋe dↄↄ. 3Walaŋ kamasɛ ŋon ↄ na wola nombia kpoo ŋan ŋↄↄ ne kyaa na de Gbeŋgyoo Yesu Kristo kawola keŋ na Wurubuarɛ ↄsom nombia ya nɛ, 4na mena walaŋ ŋonaŋ yɛɛ walaŋ ŋon ↄ ne gyina ↄ wose adido te ↄ ba gyeŋ daale mↄ ya. Aŋmaareŋ kum na kale nombia ŋan ŋↄↄ taŋ tↄnↄↄ ya nɛ doo la ↄ kawola keŋ man. Kɛŋa na moona nombiakumɛɛ ŋgba balaŋ kekↄla na aŋmaareŋ kelɛɛ na daaworo na ↄmanso na balaŋ katee na nyeeman ditiŋtɛɛ na dↄŋa kekↄla nɛ kↄŋ. 5Mena balaŋ kɛwↄ nyeeya ta yekee, mena dↄↄ te debaŋ kamasɛ na be dana nombia bɛɛ wↄŋee na dↄŋa. Anokoare be doo be man ya. Baŋ gyeŋ nyi Wurubuarɛ ↄsom yɛɛ gbɛɛ keŋ baa mo nyiŋ kↄba. 6Nyi akpaa kyomii keŋ n dana te n yela ke da gyoo n sia na, Wurubuarɛ ↄsom dana tↄnↄↄ nideli fa neŋ. 7Nawolo nyi de ta mo kolo kↄŋ tɛɛle kei dↄↄ ya, mena mↄ te dↄↄ gyae dɛɛ mo kolo lee tɛɛle kei dↄↄ gyu ya. 8Mↄna nyi akpaa de dana weenɛɛ na abↄↄ ŋan dɛɛ do na, kaboena nyi ŋe dɛɛ gyoo de sia. 9Balaŋ baŋ bɛɛ gyae kↄba beiŋ nɛ ne yale kekɛɛsekɛɛ na ↄbↄnsam kↄta man, te ne yeli bɛɛ yɛɛ abↄↄ nkaraŋkaraŋ na be ta yoo lee Wurubuarɛ gbɛɛneŋ man na ba te wↄlɛɛ kekpaakekpaa. 10Nyi walaŋ de yase ↄ sia do kↄba kegyae dↄↄ beiŋ man na, na mo e gyu dukum man. Baale te sila kↄba kegyae beiŋ kei te be tinaa ba kelɛɛdi keŋ yela, te ba moo ba wose do kayeyɛɛ dinaa man. 11Mↄna nyaŋ Wurubuarɛ walaŋ dↄↄ yeu lee mena nombia kɛŋa pou man, na n ke sila nombia ŋan ŋa tenɛɛ Wurubuarɛ siaman nɛ na Wurubuarɛ ↄsom kpaakpaate, na nombia ŋan n be lɛɛ di nɛ na balaŋ kegyae na n ke yɛɛ kakyeŋ seŋ keŋkeŋ, na n ke bu n wose debaŋ kamasɛ. 12Yoo keŋ n ne yoo nyi keŋ n be lɛɛ Kristo di dↄↄ nɛ, seŋ keŋkeŋ na n ke yoo ke nideli na n ke nyiŋ nyeedoŋ kekpaa keŋ. Kei dↄↄ te Wurubuarɛ lↄↄ yele baake neŋ, debaŋ keŋ n be gyuusu n nↄↄ kolosi n kelɛɛdi keŋ nombia balaŋ burum siaman nɛ. 13Ma seŋɛɛ Wurubuarɛ ŋon ↄ ne fa kpene kamasɛ nyeedoŋ nɛ, na Yesu Kristo ŋon ↄ be di Wurubuarɛ nombia ŋan adansɛɛ kegyia Pↄntiↄse Pilato gyaŋ nyi ŋe yɛɛ anokoare nɛ siaman mɛɛ yako neŋ nyiaa, 14kɛɛ na n kedi mmaraase kɛŋa dↄↄ. Na kyɛɛkee ŋa ya, na n ke kɛɛ nyi ŋolo mↄ be nyiŋ nombiikum daale yako lee n wose ya, kelii wee keŋ de Gbeŋgyoo Yesu Kristo waa bese kↄŋ. 15Wurubuarɛ waageŋ kaboela nyi dɛɛ lese ↄ yele. Nawolo nyi ŋon waageŋ yɛna doŋ pou nyee, na gyooneŋ pou Gyoo na gbeŋgyoona pou Gbeŋgyoo. Ŋon ne gyae la waa yela Yesu Kristo kabese kↄŋ wee keŋ ŋon gbagba ba see nɛ man. 16Ŋon waageŋ kyaa la kekpaakekpaa te ↄ bɛɛ yem ya, te ↄ kyaa keŋmaŋee keŋ walaŋ bɛɛ tale benaa ke ya nɛ man. Ŋon te walaŋ te naa ta e see ya, te ŋolo mↄ be gyae waa tale naa e ya. Ŋon danaana doŋ keŋ be taŋ ↄto ya, te ↄ kaboena nyi baa lese ↄ yele debaŋ kamasɛ. Amɛn. 17Faree balaŋ baŋ be dana ba wose tɛɛle kei dↄↄ nɛ nyi be na gyina ba wose adido ya te be na mo be loo gyakaa abↄↄ ŋan be dana nɛ dↄↄ ya, nawolo nyi ŋↄↄ gyae ke kyaa kekpaakekpaa ya. Mↄna kaboena nyi baa mo be loo pou gyakaa Wurubuarɛ ŋon ↄ ne fa daa abↄↄ pou te ne yɛɛ daa gyoŋ nɛ dↄↄ. 18Faree wↄ nyi baa yɛɛ deeli, na baa yela be deeli keyɛɛ keŋ ka bo. Baa yɛɛ wↄe na baa nyiŋ tale mo ba abↄↄ ŋan be dana nɛ ŋaale fa balaŋ. 19Nyi akpaa be yɛɛ kɛŋa na, bɛɛ yɛɛ bo see ba wose wee daale. Kei man te baa tale mo nyiŋ nyeedoŋ kekpaa keŋ. 20Timoti, kɛɛ kpene keŋ bↄↄ mo do n nyiŋmaa man nɛ dↄↄ nideli. Lese n wose lee afa kumɛɛ keyↄↄ na aŋmaareŋ yakaa yakaa ŋan balaŋ ne baake nyi nyansa nombia nɛ man. 21Nawolo nyi balaŋ baale kpa be dana mena nyansa kei, mena dↄↄ te yeli be ta yoo lee ba kelɛɛdi man. Wurubuarɛ waa mo ↄ bɛrɛɛ boele ŋon. Amɛn.

will be added

X\