1 Timoti 5

1Akpaa n ne kolosi na baala kegyiise nɛ, na fae wↄ ŋgba nya akoso nɛ ya mↄna kolosi na wↄ ŋgba n kyaↄ nɛ. Kolosi na tewulɛɛ mↄ ŋgba n kegyiise yaa n naabia nɛ. 2Kolosi na ala kegyiise ŋgba n naↄ nɛ, na n ke kolosi na alebia ŋgba n desina nɛ, keŋ n ba gyueŋ ba wose man agyueŋ kum kamasɛ ya. 3Kaboena nyi nya lese n konↄↄ man tela liala baŋ bↄↄ taŋ baŋ baa kɛɛ be dↄↄ ya nɛ, na n ka mo obuo mↄ fa wↄ. 4Mↄna akpaa lialo ŋolo dana bia yaa naanasebia nɛ, kaboena nyi bia yaa naanasebia baŋ baa tela e nideli na ka lese be Wurubuarɛ ↄsom nombia ŋan bↄↄ kasee nɛ wola. Be yɛɛ mena nɛ, na bɛɛ tↄ be kyaↄ na be naanaↄ kom baa nawolo nyi mena te Wurubuarɛ ne gyae. 5Lialo ŋon ↄ kyaa ↄ wose dↄↄ keŋ ↄ be dana walaŋ ŋon ↄ ne kɛɛ ↄ dↄↄ ya nɛ, ↄ na mo ↄ loo pou gyakaa Wurubuarɛ dↄↄ bo. Mena dↄↄ nelim na ka weese pou na ↄ gyakaa ↄ ne fane fa Wurubuarɛ nyi waa kɛɛ ↄ dↄↄ. 6Mↄna lialo ŋon ↄ ne gyae tɛɛle kei dↄↄ gyoŋ kedi nɛ dↄↄ ↄ dↄŋ bo yakaa keŋ ↄ be dana nyeedoŋ ya. 7Kolosi nombia kɛŋa fa Kristotena baŋ, na ŋolo be nyiŋ nombiikum daale yako lee ba wose man ya. 8Nyi akpaa ŋolo bɛɛ tale kɛɛ ↄ loŋtona dↄↄ ya, tuturu na ŋon gbagba ↄ denimantena dↄↄ ya nɛ, na nawolo baa nyi ↄ te tina ↄ Wurubuarɛ kelɛɛdi keŋ yela. Mena walaŋ ŋonaŋ nombiakumɛɛ keyɛɛ gba kela walaŋ ŋon ↄ bɛɛ lɛɛ Kristo di nɛ ya. 9Lialo ŋon ↄ te dii ta kela kulutooneŋ sↄŋotooro (60) ya na, be na kala e kpu liala dikpii keŋ man ya. Kaboena nyi waa yɛɛ alo ŋon ↄ be kyaa baale dokoloŋ gyaŋ, keŋ ↄ ta lee ↄ baale ŋonaŋ wↄle ya. 10Waa yɛɛ walaŋ ŋon balaŋ na lese ↄ yele lee ↄ nombia kpaakpaa keyɛɛ man, na mena keŋ ↄ be tale kɛɛle ↄ bia nideli te ↄ ne lɛɛ ŋↄↄla te ↄ ne kɛɛ be dↄↄ nideli mↄ nɛ. Waa yɛɛ walaŋ ŋon ↄ ne lɛɛ Wurubuarɛ balaŋ te ↄ ne kɛɛ be dↄↄ nideli, te ↄ ne yɛɛ deeli fa baŋ ba wose be kyaŋ wↄ mↄ nɛ. Waa yɛɛ walaŋ ŋon ↄ ne nyiŋ debaŋ yɛɛ nombia kpaakpaa lee gbɛɛ kamasɛ man. 11Liala baŋ ba te ŋmɛɛ ta ya nɛ, na kala wↄ kpu mena liala dikpii kei man ya. Nawolo nyi yale de gyↄ wↄ loo kela ba kelɛɛdi keŋ na, baa lee Yesu Kristo wↄle na be kaa yala bela. 12Nyi akpaa be yɛɛ mena na, Wurubuarɛ waa bu wↄ fↄↄ nawolo nyi ba te yala ntam keŋ bↄↄ taŋgbɛɛ kaŋ fa Kristo nɛ dↄↄ. 13Kenaŋ wↄle na, bɛɛ wↄlɛɛ ba debaŋ yakaa na be dↄŋ na akpaŋalaŋ akpaŋalaŋ. Kei wↄle na, bɛɛ kolosi balaŋ wose man nombia na be dana ba wose bɛɛ yɛɛ abↄↄ ŋan tekaboena nyi baa yɛɛ ya nɛ, te bɛɛ kolosi nombia ŋan tekaboena nyi baa kolosi ya nɛ. 14Lee mena dↄↄ mɛɛ gyae nyi liala baŋ be yɛɛ alebiawↄ nɛ, baa yala na baa lola bia na baa kɛɛ ba akpaŋalaŋse dↄↄ nideli. Be yɛɛ mena na, de kↄlala baŋ be gyae baa nyiŋ nombiikum kamasɛ kolosi lee da wose man ya. 15Nawolo nyi liala baale taŋ lee Wurubuarɛ wↄle gyu be silana ↄbↄnsam. 16Nyi akpaa Kristo alo ŋolo dana liala ↄ dekpaŋalaŋ man nɛ, kaboena nyi waa kɛɛ be dↄↄ keŋ ↄ na mo wↄ lↄ Kristotena baŋ dↄↄ ya. Na Kristotena baŋ ke nyiŋ kɛɛ liala baŋ bↄↄ taŋ baŋ baa kɛɛ be dↄↄ ya nɛ dↄↄ. 17Kristotena kegyiise baŋ be yɛɛ siamantenawↄ te bɛɛ yɛɛ ba tom nideli nɛ, kaboena nyi baa bu wↄ nideli. Tuturu na kegyiise baŋ bɛɛ kyaŋ ba wose kolosi Wurubuarɛ nombia ŋan te bɛɛ wola balaŋ ŋe man nideli nɛ. 18Nawolo nyi Wurubuarɛ nombia ŋan ne yako daa nyiaa, "Wonembu ŋon ↄ ne tuku amↄla nɛ, bↄↄ ne bake ↄ nↄↄ ya. Mena mↄ te walaŋ ŋon ↄ ne yɛɛ tom na, kaboena nyi baa tↄ e kom." 19Nyi akpaa ŋolo da mo nombiikum daale gyakaa kegyia ŋolo dↄↄ nɛ, ɛ na lɛɛ ke do ya. Gyisɛ ɛ be nyiŋ adansɛɛtena bala yaa batooro pɛna ɛ ke lɛɛ ke do. 20Balaŋ baŋ bɛɛ yɛɛ nombiakumɛɛ nɛ, ɛ lese si wↄ balaŋ nsana na gyakoloŋ ke nyiŋ gyoo balaŋ akaŋ baŋ mↄ. 21Mɛɛ faree neŋ nideli lee Wurubuarɛ na Yesu Kristo na ↄ kpilala baŋ ↄ ba lese wↄ nɛ siaman nyiaa, kɛɛ nyi n te di mmaraase kɛŋa dↄↄ keŋ nyi n be gyae ŋolo kela ŋolo ya. 22Na barase na n nyiŋmaa ka mo gyakaa balaŋ dↄↄ bileŋbileŋ nyi n na lese wↄ nyi baa yɛɛ Wurubuarɛ tom ya, te na mo n wose do balaŋ nombiakumɛɛ ŋan bɛɛ yɛɛ nɛ man ya. Tela n wose nideli keŋ nyi n be yɛɛ nombiikum ya. 23Lee n tↄↄ kawee na n kɛɛ wee bileŋbileŋ keŋ dↄↄ nɛ, na tekaa nyↄↄ loŋ kaageŋ ya mↄna nyↄↄ soloŋ kyomii kyomii. 24Balaŋ baale wui nombiakumɛɛ na lee debↄↄ bileŋ pɛna baa di be nombia. Mↄna baale wui nombiakumɛɛ dↄↄ ŋa weesɛɛ bo, wↄle wↄle pɛte na lee debↄↄ. 25Mena mↄ te nombia kpaakpaa keyɛɛ bɛɛ weese ya. Ŋan ŋa weesɛɛ koraŋ nɛ, ŋe gyae kaa lee debↄↄ.

will be added

X\