1 Timoti 4

1Wurubuarɛ feliŋ ŋon yakowↄ nideli nyiaa, tɛɛle kei da benaa kↄ ↄto na balaŋ baale baa tina Wurubuarɛ kelɛɛdi yela, na baa tei feliŋkumɛɛ na ↄbↄnsam dekarate ŋon nombia. 2Mena kawola kɛŋa lee balaŋ baŋ be dↄŋɛɛ bɛɛ beo ba wose te bee dii akɛrɛɛ laŋ nɛ gyaŋ. Ba nyeeya ta yem ŋgba nyeela te ba moowↄ do boalaŋ man nyakee ŋa nɛ. 3Bɛɛ tↄ balaŋ gbɛɛ nyi be na yale ya, te bɛɛ yako wↄ bela nyi be na di weenɛɛ ŋaale ya. Mↄna Wurubuarɛ yɛɛ weenɛɛ bo nyi balaŋ baŋ bɛɛ lɛɛ e di te ba gyeŋ anokoare keŋ nɛ, baa fane fa e karaŋ na baa di. 4Nawolo nyi kpene kamasɛ keŋ Wurubuarɛ be yɛɛ na ke dei, te akpaa nyi de fane fa e karaŋ na tekaboena nyi dɛɛ bɛɛ ŋa ya. 5Nawolo nyi Wurubuarɛ nombia ŋan na kefane keŋ te desina ŋa. 6Akpaa n mo mena nombia kɛŋa wola Kristotena na, n ke yɛɛ Yesu Kristo tobaale kpaakpaate ŋon bↄↄ mo kelɛɛdi na kawola kpaakpaate keŋ n silana nɛ kɛɛle e nɛ. 7Lese n wose lee ŋↄla nombia na kawola ŋan ŋↄↄ taŋ tↄnↄↄ ya nɛ man, na n ke sila Wurubuarɛ ↄsom kpaakpaate keŋ gbɛɛ nideli na ka ke male neŋ. 8Nawolo nyi wose kewↄŋee dana tↄnↄↄ kyomii bo fa deniwalaŋ. Mↄna Wurubuarɛ ↄsom dana tↄnↄↄ nombia pou man, nawolo nyi kɛɛ fa nyeedoŋ gyɛŋ te kɛɛ fa nyeedoŋ kekpaakekpaa debaŋ keŋ gyae ke kↄŋ nɛ man. 9Nombia kɛŋa yɛɛ ampaŋ, te kaboena nyi dɛɛ lɛɛ ŋa di nideli. 10Kei dↄↄ te dɛɛ kyaŋ da wose yɛɛ tom nideli debaŋ kamasɛ, nawolo nyi de loo gyakaa Wurubuarɛ ŋon ↄ kyaa kekpaakekpaa nɛ dↄↄ. Ŋon yɛna balaŋ pou nyeelɛɛre, tuturu na balaŋ baŋ pou bɛɛ lɛɛ e di nɛ. 11Wola wↄ mena nombia kɛŋa, na n ke kɛɛ nyi walaŋ kamasɛ te kasee ŋa nideli. 12Na yeli ŋolo na ŋolo ke kɛɛ neŋ nyi n yɛɛ bu e ya, mↄna yela n kekolosi na n dinↄↄ na n balaŋ kegyae na n kelɛɛdi na n kekyaa keŋ ayimɛɛ be doo n wose man ya nɛ, ka bese kolo kekasee fa balaŋ baŋ bↄↄ lɛɛ Wurubuarɛ di nɛ. 13Pɛte maa kↄŋ na, mɛɛ gyae nyi n ke yɛɛ kakyeŋ mo n debaŋ na n doŋ kala Wurubuarɛ nombia ŋan balaŋ man, na n ke yako wↄ nyeekelɛɛ nombia ŋan, na n kawola wↄ ŋe man nideli. 14Mo Wurubuarɛ kolo anefaŋ keŋ Wurubuarɛ akpeŋkpeŋgyↄↄra be yako ke nombia, debaŋ keŋ kegyiise ba mo ba nyiŋmaase gyakaa n dↄↄ te n be nyim nɛ yɛɛ tom nideli. 15Yɛɛ kakyeŋ di mena nombia kɛŋa pou dↄↄ debaŋ kamasɛ na n ka mo n wose fa ŋa, na balaŋ kenyiŋ naa n siaman kegyu na n nombia ŋan n ne yɛɛ nɛ. 16Kɛɛ n dinↄↄ na n kawola man nideli. Yɛɛ kakyeŋ di ŋe dↄↄ debaŋ kamasɛ. Akpaa n yɛɛ mena na, n ke lɛɛ ɛmɛɛ na baŋ bee tei neŋ nɛ pou nyee.

will be added

X\