1 Timoti 1

1Tↄne kei lee maŋ Pↄↄl gyaŋ. Da nyeelɛɛre Wurubuarɛ na de Gbeŋgyoo Yesu Kristo ŋon dↄↄ de loo gyakaa nɛ, lese na maŋ nyi maa yɛɛ Kristo kpilale. 2Mɛɛ ŋmarase tↄne kei mee yelee nyaŋ Timoti ŋon lee Yesu Kristo kelɛɛdi man dↄↄ te n ba bese me bu gbagba nɛ. Mɛɛ fane nyi de kya Wurubuarɛ na de Gbeŋgyoo Yesu Kristo baa mo be bɛrɛɛ boele neŋ, na baa wii n waraŋase na baa fa neŋ wosefɛɛreŋ. 3Ŋgba mena keŋ mee gyu Masedonia tɛɛle man te mↄↄ do neŋ kakyeŋ nyi nya kyaa Efeso donↄↄ man nɛ, mena yaa mɛɛ gyae nyi n ke kyaa botↄↄ. Na n ke tↄ balaŋ baŋ be kyaa Efeso botↄↄ bɛɛ wola akɛrɛɛ kawola Kristo ↄsom keŋ man nɛ nyi baa tina ŋa yela bileŋ. 4Yako wↄ nyi be na wↄlɛɛ debaŋ na beneŋ beneŋ ŋↄla kegyↄ, na be naanaↄ kalola kegyakaare nombia kawola ya. Nawolo nyi kɛŋa pou na mo aŋmaareŋ bo kↄŋ, te ŋe bee yeli balaŋ ke yɛɛ Wurubuarɛ kegyaebii ya. N lɛɛ Wurubuarɛ di na te nyaŋ ke tale yɛɛ ↄ kegyaebii. 5Keŋ dↄↄ te mɛɛ yako neŋ mena nombia kɛŋa yɛna nyiaa, mɛɛ gyae nyi kegyae keŋ ba lee konↄↄ kpaakpaa man nɛ, na konↄↄ man nombia kpaakpaa na Kristo kelɛɛdi kpaakpaate keŋ ke doo Kristo walaŋ kamasɛ man. 6Balaŋ baale ta yoo gbɛɛ lee abↄↄ kpaakpaa kɛŋa man te ba gyoo afa kumɛɛ keyↄↄ. 7Bɛɛ gyae nyi baa bese Wurubuarɛ mmaraa wolala, mↄna kpene keŋ baŋ gbagba ne kolosi na nombia ŋan dↄↄ ba seŋɛɛ keŋkeŋ bee kolosi nɛ bↄↄ gyeŋ ŋe man ya. 8Da gyeŋ nyi mmaraa dei. Akpaa ŋolo de di ke dↄↄ nideli na ke dei fa e. 9Da gyeŋ mↄ nyi ba te yɛɛ mmaraa bo fa balaŋ kpaakpaa ya. Mↄna be yɛɛ ke bo fa baŋ bↄↄ ne di mmaraase ŋan dↄↄ ya, na baŋ bↄↄ ne yↄkↄse ba wose ya, na baŋ bↄↄ gyeŋ Wurubuarɛ ya na nombiakumɛɛyɛɛra na baŋ ayimɛɛ doo ba wose man na baŋ bↄↄ ne sila Wurubuarɛ gbɛɛneŋ ya, na baŋ bɛɛ koe be kyaↄ yaa be naↄ nɛ na baŋ mↄ bɛɛ koe balaŋ nɛ, 10na kafoŋtena na baala baŋ bee doo na dↄŋa, na baŋ bɛɛ mo balaŋ gyae kↄba, na akɛrɛɛtena na baŋ bɛɛ beo kaŋ ntamse, na kpene kamasɛ keŋ bɛɛ kyaa na kawola kpaakpaate keŋ ya nɛ. 11Mena kawola kpaakpaa kei kyaawↄ na nyeedoŋ nombia kpaakpaa ŋan Wurubuarɛ ba mo do me nyiŋmaa man nyi maa kolosi fa balaŋ nɛ. Kawola kpaakpaa kei lee Wurubuarɛ doŋte ŋon balaŋ na lese ↄ yele nɛ gyaŋ. 12Mɛɛ fa de Gbeŋgyoo Yesu Kristo ŋon ↄ be fa maŋ doŋ kei nyi maa yɛɛ ↄ tom nɛ karaŋ. Mɛɛ fa e karaŋ ŋgba ↄ be kɛɛ maŋ nyi me yɛɛ walaŋ kpaakpaa e, te ↄ ba lese maŋ nyi me kaboena nyi maa yɛɛ ↄ tom keŋ ↄ ba mo do maŋ me nyiŋmaa man nɛ. 13Gyaŋgba keŋ na me kolosi mmusuo nombia tia Yesu, te me naase ↄ kaseela baŋ diyem te me kↄla wↄ mↄ. Mↄna kɛŋa pou wↄle na Wurubuarɛ wii me waraŋase, nawolo nyi na mↄↄ gyeŋ keŋ mɛɛ yɛɛ nɛ ya te ma te lɛɛ Kristo mↄ di ya. 14De Gbeŋgyoo Yesu Kristo moo ↄ bɛrɛɛ keŋ boele maŋ nideli, te ↄ yela me lɛɛ e di te ↄ moo ↄ kegyae keŋ do me man. 15Kei yɛna anokoare nombii keŋ kaboena nyi walaŋ kamasɛ waa lɛɛ di. Nombii kenaŋ yɛna nyi, Kristo Yesu kↄŋae tɛɛle kei dↄↄ ↄ kaa lɛɛ nombiakumɛɛyɛɛra nyee. Maŋ Pↄↄl gba yɛna nombiakumɛɛyɛɛra pou nyee. 16Mↄna lee mena nombii kei dↄↄ te Wurubuarɛ wii me waraŋase, na Yesu Kristo ke nyiŋ ta maŋ nombiakumɛɛyɛɛra pou nyee kei dↄↄ lese ↄ konↄↄ keŋ ↄ dana nɛ wola. Na ka ke yɛɛ kekasee nombii fa balaŋ baŋ pou baa kaa lɛɛ e di na baa nyiŋ nyeedoŋ kekpaa keŋ nɛ. 17Ɛ yela dɛɛ kɛlɛɛ e nyi, "Nyaŋ nyaageŋ yɛna Wurubuarɛ na gyoo ŋon n kyaa kekpaakekpaa. Nyaŋ yɛna Wurubuarɛ ŋon n bɛɛ yem ya, te ŋolo mↄ bɛɛ naa neŋ na ↄ sia fonɛɛ ya. Nyaŋ nyaageŋ yɛna Wurubuarɛ ŋon n kaboena nyi baa mo obuo na gyoorobiiri fa neŋ kekpaakekpaa. Amɛn." 18Me bu Timoti, nombia ŋan mↄↄ mo do n nyiŋmaa man, na ŋan Wurubuarɛ akpeŋkpeŋgyↄↄra be wulaa yako see lee n wose man nɛ, mena nombia ŋenaŋ pou yɛɛ dokoloŋ. Mena dↄↄ mo nombia ŋenaŋ tela ŋgba yoo abↄↄ nɛ, na n ka mo yoo na akɛrɛɛ nombia wolala baŋ. 19Na tina n kelɛɛdi na n konↄↄ man nombia kpaakpaa ŋan yela ya. Baale te bɛɛ nombia kpaakpaa kɛŋa te be yela ba Kristo kelɛɛdi keŋ mↄ wↄlɛɛwↄ. 20Balaŋ benaŋ baale yɛna Hameneyose na Alɛkesanda. Me ta mo wↄ fa ↄbↄnsam nyi waa wↄŋ ba deŋela na bↄↄ tekaa kolosi mmusuo nombia tia Wurubuarɛ bela ya.

will be added

X\