1 Tesalonikatena 5

1De tebia, bɛɛ tekaa hia nyi ŋolo waa bese ŋmarase kolo lee debaŋ yaa wee keŋ mena nombia kɛŋa gyae kekↄŋ nɛ wose man nombia fa ŋon bela ya. 2Nawolo nyi ɛmɛɛ gbagba ɛ gyeŋ nyi wee keŋ de Gbeŋgyoo Yesu waa bese kↄŋ nɛ, gyae ke yɛɛ bo ŋgba mena keŋ ŋmɛɛlate ne kↄŋ nelim nɛ. 3Debaŋ keŋ balaŋ baa yako nyi, "De kyaa wosefɛɛreŋ man, te de wↄe mↄ bɛɛ lↄ daa ya nɛ," mena debaŋ kenaŋ te kayeyɛɛ dinaa gyae kaa futaa wↄ, ŋgba mena keŋ kadoŋee ne futaa fulute nɛ. Dekↄŋ mena na, be man ŋolo na ŋolo be gyae waa tale lese ↄ wose lee mena kayeyɛɛ kenaŋ man ya. 4Mↄna de tebia, ɛmɛɛ ba tekaa doo ditiŋtɛɛ man, na wee kenaŋ kaa futaa ŋon ŋgba ŋmɛɛlate nɛ ya. 5Nawolo nyi ɛ popou yɛɛ keŋmaŋee man balaŋwↄ, te ɛ doo keŋmaŋee kenaŋ man. Dↄↄ tekaa yɛɛ ditiŋtɛɛ man balaŋ baŋ be dↄŋ ditiŋtɛɛ man nɛ ya. 6Mena dↄↄ ɛ na yeli dee doo wolee da wose, ŋgba mena keŋ baale ne yɛɛ ne ya. Mↄna ɛ yela dee doo da wose dↄↄ na dɛɛ deke nideli. 7Nawolo nyi baŋ bee doo nɛ ne doo bo nelim, te baŋ mↄ bɛɛ dɛɛse nɛ ne dɛɛse bo balinↄↄ. 8Mↄna keŋ daa doo keŋmaŋee man dↄↄ, ɛ yela dɛɛ kɛɛ da wose dↄↄ nideli na dɛɛ mo da kelɛɛdi na de balaŋ kegyae mo yɛɛ nyeele pampasaŋ mo gyee da wose ŋgba yoonↄↄtena nɛ, na dɛɛ mo da nyeekelɛɛ keŋ dↄↄ de loo gyakaa nɛ wuu da nyeeya dↄↄ ŋgba nyeele kotↄtↄↄ nɛ. 9Nawolo nyi Wurubuarɛ te baake daa nyi waa naase daa diyem ya, mↄna ↄ baake daa bo nyi dɛɛ ta de Gbeŋgyoo Yesu Kristo dↄↄ nyiŋ nyeekelɛɛ. 10Ŋon de Gbeŋgyoo Yesu yeŋa la fa daa, mena dↄↄ nyi de kyae na de sia yaa da yeŋae koraŋ na, daa na e pou dɛɛ kyaa. 11Mena dↄↄ ɛ kolosi fa dↄŋa na ɛ ka do dↄŋa kakyeŋ, ŋgba mena keŋ ɛ ne taŋ yɛɛ nɛ. 12De tebia, nɛnɛɛ dɛɛ waase ŋon bo nyiaa, balaŋ baŋ de Gbeŋgyoo ba lese wↄ nyi baa yɛɛ ɛ siamantena, te bɛɛ yɛɛ ba tom na kakyeŋ kolosi fa ŋon nɛ, ɛ bu wↄ nideli. 13Ɛ gyae wↄ na ɛ ke bu wↄ nideli lee ba tom keŋ bɛɛ yɛɛ nɛ dↄↄ, na ɛ ke kyaa wosefɛɛreŋ man na dↄŋa. 14De tebia, dee kolosi fa ŋon nyiaa, ɛ kolosi fa kebↄŋaletena baŋ. Ɛ kolosi do baŋ gyakoloŋ dana wↄ nɛ. Ɛ kyↄ baŋ bↄↄ dana doŋ ya nɛ, na ɛ ke nyiŋ konↄↄ fa walaŋ kamasɛ. 15Ɛ kɛɛ nyi ŋolo na ŋolo na mo dukum tↄ dukum kom ya, mↄna ɛ yɛɛ deeli fa dↄŋa na balaŋ pou debaŋ kamasɛ. 16Ɛ kyaa gyoŋ man debaŋ kamasɛ. 17Ɛ fane debaŋ kamasɛ. 18Ɛ do Wurubuarɛ nↄↄ abↄↄ pou man debaŋ kamasɛ. Mena nombia kɛŋa te Wurubuarɛ ne gyae nyi yaa yɛɛ, nawolo nyi ɛmɛɛ na de Gbeŋgyoo Yesu Kristo yɛɛ dokoloŋ. 19Ɛ na ko Wurubuarɛ feliŋ ŋon ↄ ba mo do ɛ man nɛ nↄↄ ya. 20Ɛ na lɛɛ Wurubuarɛ nombia ŋan ↄ be tɛɛ wa akpeŋkpeŋgyↄↄra dↄↄ kolosi nɛ aŋmaareŋ ya. 21Mↄna ɛ gyoo nombia pou man kɛɛ, na ɛ ke kyaŋ ŋan dei nɛ man nideli. 22Ɛ wↄŋ ɛ wose lee nombiikum kamasɛ man. 23Dɛɛ sola Wurubuarɛ ŋon ↄ yɛɛ wosefɛɛreŋ Wurubuarɛ e nɛ, nyi waa gberaa ɛ wose ayimɛɛ pou leki na waa yela ɛ gbɛɛneŋ ka tenee keŋ nombiikum daale na doo ɛ man ya, mo kelii wee keŋ de Gbeŋgyoo Yesu Kristo waa bese kↄŋ nɛ. 24Wurubuarɛ ŋon ↄ be baake ŋon nɛ, waa yela kekↄŋ mena nawolo nyi ↄ ne di ↄ nombia dↄↄ. 25De tebia, ɛ fane fa daa mↄ. 26Ɛ do de tebia Kristotena baŋ pou nↄↄ nideli. 27Mɛɛ waase ŋon de Gbeŋgyoo yele man nyiaa, ɛ kala tↄne kei fa ɛ tebia Kristotena baŋ pou. 28De Gbeŋgyoo Yesu Kristo waa mo ↄ bɛrɛɛ boele ɛ popou na waa seŋ ɛ wↄle.

will be added

X\