1 Tesalonikatena 3

1Nɛnɛɛ da kena nyi nombia ta kela daa keŋ dↄↄ gyae dɛɛ tale kaa naa ŋon dↄↄ ya nɛ, de yɛɛ da agyueŋ nyi dɛɛ bese kyaa Atɛnse donↄↄ man. 2Mena dↄↄ dee kpila de dↄↄ Timoti ŋon ↄ yɛɛ Wurubuarɛ tobaale e, te ↄ kpuɛ na daa Kristo nombia kpaakpaa ŋan kekolosi man nɛ ɛ gyaŋ. Dee kpila e nyi ↄ kaa do ŋon kakyeŋ na ɛ ka seŋ keŋkeŋ ɛ kelɛɛdi man, 3na nyi akpaa kayeyɛɛ kei dinↄↄ de kↄŋ ɛ dↄↄ na, ɛ man ŋolo be nyiŋ bese ↄ wↄle ya. Nawolo nyi ɛmɛɛ gbagba ɛ gyeŋ nideli nyiaa, mena kayeyɛɛ kei yɛɛ kpene keŋ Wurubuarɛ be yako see nyi gyae ke kↄŋ de dↄↄ. 4Debaŋ keŋ de kyaa ɛ gyaŋ nɛ, de wulaa yako ŋon agbaatee agbaatee nyiaa, baa naase daa diyem ŋgba mena keŋ be kↄŋ te ɛ ne naa nɛ. 5Ɛ kayeyɛɛ keŋ ɛ na yeyɛɛ nɛ ne takaa maŋ nideli, te ma te gyae gbɛɛ keŋ maa mo kↄŋ botↄↄ kina. Mena dↄↄ te mee kpila Timoti ɛ gyaŋ. Me kpila e bo nyi waa kↄŋ kaa kɛɛ nyi ɛ seŋɛɛ ɛ kelɛɛdi keŋ man keŋkeŋ. Nawolo nyi me wↄe ne lↄ maŋ nyi, nnɛ ↄbↄnsam te kaa kɛɛse ŋon kɛɛ yela ɛ te tina ɛ kelɛɛdi keŋ yela. Nyi de kↄŋ mena na, na da tom keŋ pou te yɛɛ yakaa. 6Mↄna Timoti ka lee ɛ gyaŋ kↄŋ yaa, te ↄ te kↄŋ kaa yako daa nombia kpaakpaa nyi ɛ seŋɛɛ keŋkeŋ ɛ kelɛɛdi man te ɛ ne gyae balaŋ mↄ. Ↄ te kaa yako daa nyi debaŋ kamasɛ na ɛ ne tↄↄse daa, te ɛ sia te yɛɛ nyi ɛ kena daa ŋgba mena keŋ daa mↄ ne gyae nyi dɛɛ naa ŋon nɛ. 7De tebia, mena dↄↄ keŋ na de kayeyɛɛ na be kɛɛ naase daa diyem pou man na, ɛ kelɛɛdi keŋ na do daa kakyeŋ. 8Nawolo nyi lee mena keŋ ɛ seŋɛɛ keŋkeŋ de Gbeŋgyoo Yesu nombia ŋan ɛ be lɛɛ di nɛ man dↄↄ, de wↄe te fɛɛ daa nideli. 9Nↄↄkado woŋti kaboela keŋ dɛɛ tale mo do Wurubuarɛ, lee kpene keŋ ↄ be yɛɛ fa ŋon nɛ dↄↄ? Dɛɛ fa e karaŋ lee gyoŋ keŋ dↄↄ nyim ↄ siaman lee ɛmɛɛ dↄↄ nɛ dↄↄ. 10Nelim na ka weese na dɛɛ fane fa Wurubuarɛ nyiaa, waa yela dɛɛ bese naa ŋon na de sia, na dɛɛ kyↄ ŋon na ɛ ka seŋ ɛ kelɛɛdi keŋ man keŋkeŋ kelii ↄto. 11Dɛɛ fane nyi de kya Wurubuarɛ gbagba na de Gbeŋgyoo Yesu, baa toro gbɛɛ fa daa na dɛɛ kↄŋ ɛ gyaŋ. 12Dɛɛ fane nyi de Gbeŋgyoo Yesu waa yela ɛ balaŋ kegyae keŋ ke doo ɛ man nideli, na ɛ ke nyiŋ gyae dↄŋa na balaŋ pou, ŋgba mena keŋ daa mↄ ne gyae ŋon nɛ. 13De Gbeŋgyoo Yesu waa desina ɛ konↄↄse man, na wee keŋ ŋon na balaŋ baŋ pou Wurubuarɛ be desina wↄ see fa ↄ wose nɛ baa kↄŋ na, ɛ ke yɛɛ balaŋ baŋ ayimɛɛ na nombiikum kamasɛ be doo ɛ man ya de kya Wurubuarɛ ŋonaŋ siaman.

will be added

X\