1 Pita 5

1Me dana nombii keŋ mɛɛ gyae maa mo see ɛmɛɛ Kristotena kegyiise baŋ siaman. Maŋ mↄ me yɛɛ Kristotena kegyia e ŋgba ɛmɛɛ nɛ. Me naa mena keŋ Kristo be naa diyem nɛ na me sia, te maŋ mↄ maa nyiŋ dekyae kpu na e ↄ gyoorobiiri keŋ man debaŋ keŋ waa bese kↄŋ nɛ. 2Mɛɛ waase ŋon bo nyiaa, ɛ kɛɛ balaŋ baŋ Wurubuarɛ ba mo wↄ do ɛ nyiŋmaa man nɛ dↄↄ nideli, ŋgba mena keŋ namensekɛɛlere ne kɛɛ ↄ namense dↄↄ nɛ. Ɛ na yeli ke yɛɛ ŋgba bɛɛ ŋere ŋon bo ya, mↄna ɛ yela ka lee ɛmɛɛ gbagba ɛ konↄↄ man ŋgba mena keŋ Wurubuarɛ ne gyae nyi yaa yɛɛ nɛ. Ɛ na yɛɛ ŋgba ɛ ne yɛɛ ke bo mo gyae kↄba nɛ ya, mↄna ɛ yɛɛ ke ŋgba keŋ ɛ ne gyae nyi ɛ ka som Wurubuarɛ nideli dↄↄ. 3Ɛ na ŋere balaŋ baŋ Wurubuarɛ ba mo wↄ do ɛ nyiŋmaa man nyi yaa kɛɛ be dↄↄ nɛ ya, mↄna ɛ yela ɛ nombia ŋan ɛ ne yɛɛ nɛ ke gyↄ wↄ loo na baa kasee ŋa. 4Akpaa ɛ yɛɛ mena na wee keŋ Yesu Kristo ŋon ↄ yɛɛ namensekɛɛlere kegyia e nɛ de kaa bɛɛ lee na, kpene keŋ waa mo tↄ ŋon kom nɛ be gyae ke wↄlɛɛ korakora ya. 5Ɛmɛɛ alebia na tewulɛɛ mↄ, mena ke te kaboena nyi yaa yↄkↄse ɛ wose fa kegyiise baŋ. Ɛ popou ɛ yↄkↄse ɛ wose fa dↄŋa, nawolo nyi Wurubuarɛ nombia aŋmaraseŋ see ŋan yakowↄ yenaŋ daale nyiaa, "Wurubuarɛ na seŋ tia balaŋ baŋ bee gyina ba wose adido nɛ, mↄna ↄ na mo ↄ bɛrɛɛ boele baŋ bɛɛ yↄkↄse ba wose nɛ." 6Mena dↄↄ ɛ yↄkↄse ɛ wose na ɛ ka mo ɛ wose do Wurubuarɛ ŋon ↄ yɛɛ doŋ pou Gbeŋgyoo e nɛ tɛɛ, na waa gyina ŋon adido ↄ debaŋ kpaakpaate keŋ man. 7Ɛ mo ɛ nombia ŋan ne takaa ŋon nɛ pou see Wurubuarɛ siaman, nawolo nyi ↄ na gyueŋ ɛ wose man. 8Ɛ yela ya agyueŋ ke doo ŋon kyɛɛkyɛɛ na ɛ ke doo ɛ wose dↄↄ. Nawolo nyi ɛ kↄlare ↄbↄnsam ŋon dↄŋɛɛ ↄ ne kili ŋgba wonembu kum nɛ, keŋ ↄ ne gyae ŋolo waa kyaŋ tao. 9Ɛ seŋ keŋkeŋ ɛ kelɛɛdi man na ɛ ke tↄ e gbɛɛ. Ɛ tↄↄse nyi ɛ tebia Kristotena baŋ be kyaa tɛɛle kei dↄↄ pou nɛ mↄ ne naa diyem mena. 10Mↄna akpaa ɛ naa diyem debaŋ kyomii na, Wurubuarɛ gbagba waa yela ɛ ka bese seŋ nideli. Waa do ŋon kakyeŋ na ɛ ka seŋ keŋkeŋ. Ŋon yɛna bɛrɛɛ pou nyee. Ŋon baake na ŋon nyi yaa ta Kristo dↄↄ na ɛ ke nyiŋ ↄ gyoorobiiri keŋ kyaa kekpaakekpaa nɛ. 11Ɛ yela dɛɛ lese Wurubuarɛ yele nawolo nyi ŋon te doŋ pou yɛɛ ↄ wui kekpaakekpaa Amɛn. 12Silase kyↄↄ na maŋ te me ŋmarase mena tↄne kei. Ma gyeŋ nyi ↄ yɛɛ Kristo walaŋ kpaakpaate e keŋ dekara be doo ↄ man ya. Mɛɛ ŋmarase tↄnebii kei bo maa mo do ŋon kakyeŋ, te mɛɛ gyae ɛ ka gyeŋ nyi Wurubuarɛ bɛrɛɛ keŋ ↄ ba mo boele daa nɛ te yɛɛ dekara ya, mena dↄↄ ɛ seŋ ke man nideli. 13De tebia Kristotena baŋ be kyaa Babilↄn donↄↄ man nɛ na do ŋon nↄↄ. Wurubuarɛ lese na baŋ mↄ ŋgba mena keŋ ↄ ba lese ŋon nɛ. Mena ke te me bu Maake mↄ na do ŋon nↄↄ. 14Ɛ mo Kristo kegyae keŋ pukaa dↄŋa do dↄŋa nↄↄ. Wurubuarɛ waa fa ɛmɛɛ baŋ pou ɛmɛɛ na Kristo be yɛɛ nↄↄdokoloŋ nɛ wosefɛɛreŋ.

will be added

X\