1 Pita 4

1Kristo naa diyem tɛɛle kei dↄↄ. Mena dↄↄ ɛmɛɛ mↄ ɛ yela mena dinↄↄ kenaŋ ke doo ɛ man. Nawolo nyi akpaa ŋolo de naa diyem mena na, dukum bɛɛ tale di doŋ ↄ dↄↄ bela ya. 2Mena dↄↄ ↄtenate bɛɛ tekaa yela tɛɛle kei dↄↄ abↄↄ kumɛɛ kegyae ke di ↄ dↄↄ bela ya. Mↄna ↄ sia gyakaa bo nyi waa yɛɛ Wurubuarɛ kegyaebii debaŋ kamasɛ. 3Gyaŋgba keŋ na ɛ wↄlɛɛ ɛ debaŋ yɛɛ abↄↄ ŋan balaŋ baŋ bↄↄ gyeŋ Wurubuarɛ ya ne yɛɛ nɛ. Ɛ yɛɛ abↄↄ nkaraŋkaraŋ ŋan ɛmɛɛ gbagba ne gyae nɛ bo. Ɛ yɛɛ lookum nyↄↄ soloŋ dɛɛse te ɛ yɛɛ desɛŋ nombia kpu na banɛɛ ↄsom ŋan Wurubuarɛ ne kↄle nɛ. Tekaboe mena, ɛ tina mena abↄↄ kɛŋa keyɛɛ yela. 4Nɛnɛɛ te doo balaŋ baŋ ba te yɛɛ Kristotenawↄ ya nɛ nↄↄ, ŋgba ɛmɛɛ na wↄ bɛɛ tekaa yɛɛ mena abↄↄ nkaraŋkaraŋ kɛŋa bom bela ya nɛ. Mena dↄↄ bɛɛ tee ŋon. 5Mↄna kaboena nyi mena balaŋ benaŋ baa gyeŋ nyiaa, baa kaa seŋ Wurubuarɛ siaman na baa tira be nombia ŋan bↄↄ yɛɛ nɛ pou nↄↄ. Wurubuarɛ te desina ↄ wose nyi waa di balaŋ baŋ be kyaa na be sia, na baŋ bↄↄ yekee pou nɛ nombia. 6Kei dↄↄ te Kristo gyuuwↄ kekolosi Wurubuarɛ nombia ŋan fa balaŋ baŋ bↄↄ yekee nɛ. Yeŋ keŋ bↄↄ yem nɛ yɛɛ kpene keŋ Wurubuarɛ ba mo bu wↄ fↄↄ, ŋgba mena keŋ waa bu walaŋ kamasɛ fↄↄ nɛ. Mↄna Kristo kolosi ↄ nombia ŋan fa wↄ, na ba woya ke nyiŋ tale kaa kyaa Wurubuarɛ gyaŋ kekpaakekpaa. 7Debaŋ keŋ tɛɛle kei gyae ke gyu kↄ ↄto nɛ ta benaa. Mena dↄↄ ɛ yela ya agyueŋ ke doo ŋon kyɛɛkyɛɛ, na ɛ ke kyaŋ ɛ wose na ɛ ke nyiŋ tale fane fa Wurubuarɛ. 8Kpene keŋ kela kɛŋa pou yɛna nyi ɛ gyae dↄŋa nideli lee ɛ konↄↄse man. Nawolo nyi akpaa ɛ ne gyae dↄŋa na, ɛ ke tale mo nombiakumɛɛ kyɛɛ dↄŋa. 9Ɛ yɛɛ ŋↄↄlale fa dↄŋa nideli keŋ ɛ na toroŋ ya. 10Wurubuarɛ faa ɛ man walaŋ kamasɛ wa abↄↄ anefaŋ ŋan kpookpoo. Mena dↄↄ ɛ man walaŋ kamasɛ waa kɛɛ keŋ ↄ be nyim nɛ dↄↄ nideli, na waa mo ke kyↄ ↄ tebia. 11Akpaa ŋolo wui yɛna Wurubuarɛ nombia ŋan kekolosi na, kaboena nyi waa kolosi Wurubuarɛ nombia bo. Akpaa ŋolo wui yɛna balaŋ kasom na, waa mo doŋ keŋ Wurubuarɛ be fa e nɛ mo som nideli. Akpaa ɛ yɛɛ mena na gyae ke yela balaŋ ke ta Yesu Kristo dↄↄ lese Wurubuarɛ yele nombia pou man. Ŋon Yesu kaboela na gyoorobiiri na doŋ pou kekpaakekpaa. Amɛn. 12Me tebia kpaakpaa, ɛ na yeli kayeyɛɛ keŋ ɛ na yeyɛɛ nɛ ke yɛɛ ŋon gyakoloŋ ŋgba kolo wↄle daale ne yɛɛna ŋon nɛ ya. Nawolo nyi mena kayeyɛɛ kei ne kɛɛse ŋon bo kɛɛ nyi ɛ seŋɛɛ keŋkeŋ ɛ kelɛɛdi man. 13Mↄna ɛ yela ke yɛɛ ŋon gyoŋ nyi ɛ ne naa diyem keŋ Kristo mↄ be naa nɛ. Nawolo nyi kei ne gyae la ke yela ke yɛɛ ŋon gyoŋ nideli debaŋ keŋ waa kaa lese ↄ gyoorobiiri keŋ debↄↄ nɛ. 14Akpaa balaŋ na tee ŋon lee keŋ ɛ silana Yesu Kristo dↄↄ na, ɛmɛɛ na nyeebam. Nawolo nyi kei nawola la nyi Wurubuarɛ feliŋ ŋon ↄ dana gyoorobiiri nɛ doo ɛ man. 15Ɛ na yeli baa naase ɛ man ŋolo diyem nyi ↄ yɛɛ awudiini e yaa ŋmɛɛlate yaa nombiakumɛɛyɛɛre, yaa ŋgba walaŋ ŋon ↄ na mo ↄ nↄↄ do balaŋ nombia man nɛ ya. 16Akpaa nyi n yɛɛ Kristo baale e dↄↄ te bɛɛ naase neŋ diyem na, na yeli ke yɛɛ neŋ desɛŋ ya. Mↄna fa Wurubuarɛ karaŋ nyi Kristo yele keŋ gyakaa nyaŋ mↄ dↄↄ. 17Debaŋ te lii keŋ Wurubuarɛ waa di balaŋ nombia. Ↄ nombia kedi kenaŋ gyae ke fiasɛɛ bo lee Kristotena dↄↄ. Te akpaa waa fiasɛɛ bo lee daa Kristotena dↄↄ na, kenaŋ na woŋ ne gyae la ke kↄŋ balaŋ baŋ bↄↄ ne lɛɛ Wurubuarɛ nombia ŋan di ya nɛ dↄↄ? 18Wurubuarɛ nombia aŋmaraseŋ see ŋan yakowↄ yenaŋ daale nyiaa, "Akpaa nyi dana doŋ nyi baa lɛɛ balaŋ baŋ be gbɛɛneŋ tenɛɛ Wurubuarɛ siaman nɛ nyee na, kenaŋ na woŋ ne gyae la ke kↄŋ balaŋ baŋ bↄↄ gyeŋ Wurubuarɛ ya nɛ, na nombiakumɛɛyɛɛra dↄↄ?" 19Mena dↄↄ balaŋ baŋ bɛɛ naa diyem lee Wurubuarɛ kegyaebii man nɛ, kaboena nyi baa mo ba wose do Wurubuarɛ ŋon ↄ ne yɛɛ kpene kamasɛ nɛ nyiŋmaa man, na baa kyaŋ be nombia kpaakpaa keyɛɛ keŋ man nideli. Nawolo nyi kpene keŋ Wurubuarɛ de yako nyi waa yɛɛ na, keŋ te ↄ ne yɛɛ.

will be added

X\