1 Pita 2

1Nɛnɛɛ be ta lola ŋon wↄle. Mena dↄↄ ɛ lese nombiakumɛɛ kamasɛ lee ɛ kekyaabii man. Ɛ na dii akɛrɛɛ bela ya. Ɛ na yɛɛ nↄↄse ala ala ya. Ɛ na yeli ɛ sia keyɛɛ balaŋ abↄↄ ya. Ɛ na wↄlɛɛ balaŋ yela lee gbɛɛ kamasɛ man ya. 2Mↄna debaŋ kamasɛ na ɛ yela Wurubuarɛ nombia ŋan ŋaageŋ ke gyↄ ŋon loo, ŋgba mena keŋ dide loŋ ne gyↄ biikyaa loo nɛ. Akpaa ɛ yɛɛ mena na gyae ke yela ɛ ka bee ɛ kelɛɛdi keŋ man nideli, na ɛ ke nyiŋ nyeedoŋ kekpaa keŋ. 3Ɛ yela ɛ loo ke gyakaa mena nombia kɛŋa dↄↄ debaŋ kamasɛ, nawolo nyi ɛmɛɛ gbagba te naa nyi de Gbeŋgyoo Yesu Kristo dana wↄe nideli. 4Mena dↄↄ ɛ tuu benaa de Gbeŋgyoo Yesu Kristo, nawolo nyi ŋon yɛna nyeedoŋ pou nyee. Ↄ yɛɛ ŋgba boe keŋ deni maara ne kɛɛ ke nyi kↄↄ taŋ tↄnↄↄ ya nɛ. Mↄna Wurubuarɛ ŋon ↄ ba lese e nɛ siaman na, ↄ dana tↄnↄↄ nideli. 5Ɛmɛɛ mↄ te nyiŋ nyeedoŋ. Ɛ yɛɛ yaa ŋgba boya ŋan Wurubuarɛ ba mo ↄ ne ma ↄ deni dinaa keŋ nɛ, te ɛ bese ↄ saese na ɛ ke ta Yesu Kristo dↄↄ fa e kedi keŋ na gyoo ↄ sia. 6Nawolo nyi Wurubuarɛ nombia aŋmaraseŋ see ŋan yakowↄ yenaŋ daale nyiaa, "Wurubuarɛ kpa ɛ kɛɛ, me ta mo boe kpaakpaate daale mɛɛ see deni mokↄↄ Gyerusalɛm donↄↄ man. Maŋ lese na e, mena dↄↄ walaŋ kamasɛ ŋon ↄ lɛɛ e di na desɛŋ be gyae ke kyaŋ e ya." 7Ɛmɛɛ baŋ ɛ ne lɛɛ e di nɛ dↄↄ ↄ dana tↄnↄↄ fa ŋon, mↄna balaŋ baŋ bↄↄ bɛɛ e nɛ dↄↄ ba te yeli Wurubuarɛ nombia ŋan ↄ be ŋmarase see nɛ te kaa yɛɛ ampaŋ. Nombia ŋenaŋ yɛna nyi, "Boe keŋ deni maara be bɛɛ ke nɛ, keŋ bese la kaa yɛɛ boe keŋ kↄↄ kyaŋ deni keŋ seŋ keŋkeŋ." 8Wurubuarɛ nombia aŋmaraseŋ see ŋan besewↄ yako yenaŋ daale bela nyiaa, "Boe kei dↄↄ te balaŋ baa gyↄ nae kpaŋte. Mena boe kenaŋ dↄↄ ke te balaŋ baa sarakee yala." Kpene keŋ dↄↄ te baa sarakee ke dↄↄ yala yɛna nyi ba te bɛɛ Wurubuarɛ nombia ŋan. Wurubuarɛ wulaa yakowↄ lee gyaŋgba gyaŋgba keŋ nyi be fareba kenaŋ. 9Mↄna ɛmɛɛ dↄↄ, ɛmɛɛ yɛna balaŋ baŋ Wurubuarɛ ba lese nɛ. Ɛmɛɛ yɛna ↄ saese na ↄ gyoorobia. Ɛmɛɛ yɛna balaŋ baŋ Wurubuarɛ ba lese te ↄ be desina wↄ see fa ↄ wose. Ɛmɛɛ yɛna Wurubuarɛ balaŋ gbagba baŋ. Ŋon lesena ŋon na ɛ ke nyiŋ kolosi ↄ nombia dinaana ŋan ŋↄↄ taŋ keyako ya nɛ fa balaŋ. Ŋon lesena ŋon lee ditiŋtɛɛ man kↄŋ ↄ keŋmaŋee dinaa keŋ man. 10Gyaŋgba keŋ na nafↄ ɛ te yɛɛ Wurubuarɛ balaŋwↄ ya, mↄna nɛnɛɛ dↄↄ ɛ te kaa bese ↄ balaŋ gbagba. Gyaŋgba keŋ na Wurubuarɛ te wii ɛ waraŋase ya, mↄna nɛnɛɛ dↄↄ ↄ te kaa wii ɛ waraŋase. 11Me tebia kpaakpaa, ɛ tↄↄse nyi ɛ yɛɛ ŋↄↄlawↄ te ɛ be gyae ɛ ke kyaa tɛɛle kei dↄↄ kekpaakekpaa ya. Mena dↄↄ mɛɛ waase ŋon bo nyiaa, ɛ lese ɛ wose lee ɛ wosenaane lookum keŋ ne wↄŋee ŋon wee na wee nɛ man. Nawolo nyi mena abↄↄ ŋenaŋ be gyae ke yela ɛ ke tale yɛɛ Wurubuarɛ kegyaebii ya. 12Keŋ ɛ kyaa bom na balaŋ baŋ ba te yɛɛ Kristotenawↄ ya nɛ dↄↄ, ɛ yela ɛ kekyaabii ke yɛɛ loo. Nyi akpaa be yako gba nyi "Kristotena kɛwↄ yɛɛ nombiakumɛɛyɛɛrawↄ" na, ɛ yela baa naa abↄↄ kpaakpaa ŋan ɛ ne yɛɛ nɛ na debaŋ keŋ Wurubuarɛ waa bese kↄŋ kaa di balaŋ nombia na, baa nyiŋ lese ↄ yele. 13Ɛ yɛɛ balaŋ baŋ ɛ silana de Gbeŋgyoo Yesu Kristo, mena dↄↄ ɛ yↄkↄse ɛ wose fa balaŋ baŋ pou bee di doŋ tɛɛle kei dↄↄ nɛ. Ɛ mo obuo fa gyoo dinaa ŋon ↄ ne di doŋ walaŋ kamasɛ dↄↄ nɛ. 14Mena mↄ te ɛ mo obuo fa balaŋ baŋ gyoo dinaa ŋon ba lese wↄ nyi baa wↄŋ nombiakumɛɛyɛɛra deŋele, na baa kɛlɛɛ balaŋ baŋ bɛɛ yɛɛ nombia kpaakpaa nɛ. 15Nawolo nyi Wurubuarɛ kegyaebii yɛna nyi yaa yɛɛ nombia kpaakpaa lee ɛ kekyaabii man. Akpaa ɛ yɛɛ mena na balaŋ baŋ bↄↄ gyeŋ kolo ya te bɛɛ wↄlɛɛ ɛ yele nɛ, be gyae baa nyiŋ nombiikum daale kolosi lee ɛ wose man ya. 16Ɛ kyaa ŋgba balaŋ baŋ be kyaa ba wose dↄↄ nɛ. Mↄna ɛ na yeli ɛ wose dↄↄ kekyaa kenaŋ ke fa ŋon gbɛɛ na ɛ ke yɛɛ nombiakumɛɛ ya. Ɛ kyaa ŋgba balaŋ baŋ bɛɛ som Wurubuarɛ nɛ. 17Ɛ mo obuo fa walaŋ kamasɛ, na ɛ ke gyae ɛ tebia Kristotena baŋ mↄ. Ɛ yela Wurubuarɛ keyee ke doo ɛ man debaŋ kamasɛ, na ɛ ka mo obuo fa ɛ gyoo dinaa ŋon. 18Ɛmɛɛ baŋ ɛ kyaa balaŋ gyaŋ nɛ, ɛ yↄkↄse ɛ wose fa ɛ gbeŋgyoona na ɛ ka mo obuo fa wↄ nideli. Na ɛ gbeŋgyoona baŋ be dei te ba woɛ nɛ baageŋ te ɛ ke yↄkↄse ɛ wose fa ya, mↄna kaboena nyi yaa yↄkↄse ɛ wose fa ɛ gbeŋgyoona baŋ be dana akpanyaŋnyaŋ mↄ nɛ. 19Nyi akpaa walaŋ ŋon ↄ loo gyakaa nyi waa yɛɛ Wurubuarɛ kegyaebii de naa diyem keŋ nafↄ tekaboena nyi waa naa ya te ↄ tale seŋ ke man keŋkeŋ kelii ↄto na, Wurubuarɛ waa hiraa e. 20Akpaa nyi ɛ man ŋolo de yɛɛ kolo kum te bee tuku e te ↄ nyiŋ konↄↄ seŋ lɛɛ ↄ ketuku kenaŋ pou na, woŋ dↄↄ te kaboena nyi baa kɛlɛɛ e? Mↄna akpaa n nombia kpaakpaa keyɛɛ dↄↄ te n ne naa diyem te n nyiŋ konↄↄ seŋ ke man keŋkeŋ kelii ↄto na, kenaŋ na Wurubuarɛ waa hiraa neŋ. 21Mena nombia kɛŋa dↄↄ te Wurubuarɛ baake ŋon nyi ɛ kaa bese ↄ balaŋ, nawolo nyi Kristo gbagba mↄ naa diyem ɛ dↄↄ. Ↄ yɛe mena see ŋon na ɛ ke nyiŋ kasee e na ɛ ke sila ↄ nawↄↄ. 22"Ŋon Kristo te yɛɛ dukum daale ya, te ŋolo mↄ te nyii dekara nombii daale mↄ lee ↄ nↄↄman korakora ya." 23Debaŋ keŋ bↄↄ tee e nɛ, ↄ ta tee ŋolo tↄ kom ya. Ↄ naa diyem mↄna ↄ te falaa ŋolo ya. Ↄ moo ↄ sia bo gyakaa Wurubuarɛ ŋon ↄ ne di nombia na ke gbɛɛ nɛ dↄↄ. 24Ŋon Yesu Kristo gbagba lɛɛ na de nombiakumɛɛ pou seele debaŋ keŋ bↄↄ gyↄ e mataa ↄpaŋdaŋ dↄↄ nɛ. Na ke yela dee nyiŋ da wose lee de nombiakumɛɛ pou man, na dɛɛ kyaa Wurubuarɛ kegyaebii man. Kristo gyamɛɛ ŋan ↄ be nyim nɛ dↄↄ te de nyiŋa kawee kekyↄ. 25Gyaŋgba keŋ na nafↄ ɛ yɛɛ ŋgba namense baŋ bↄↄ yoo nɛ. Mↄna nɛnɛɛ dↄↄ ɛ ta bese kↄŋ ɛ silana ɛ Gbeŋgyoo ŋon ↄ ne kɛɛ ɛ dↄↄ ŋgba namensekɛɛlere nɛ, na kolo kum kamasɛ be yɛɛ ŋon ya.

will be added

X\