1 Gyↄn 3

1Ɛ kɛɛ kegyae kpaakpaa keŋ de kya Wurubuarɛ ne gyae daa, te ↄ ne baake daa nyi ↄ bia gbagba te ampaŋ de yɛɛ ↄ biawↄ. Kpene keŋ dↄↄ tɛɛle kei dↄↄ balaŋ ba gyeŋ nyi de yɛɛ Wurubuarɛ biawↄ yɛna nyi, bↄↄ gyeŋ Wurubuarɛ gbagba ya. 2Me gyoona kpaakpaa, nɛnɛɛ de yɛɛ Wurubuarɛ biawↄ, te dinↄↄ keŋ waa yela dee nyiŋ wee daale nɛ, ↄ ta lese ta ke wola daa ya. Mↄna da gyeŋ nyi wee keŋ waa kↄŋ nɛ dɛɛ yɛɛ ŋgba ŋon nɛ, nawolo nyi dɛɛ naa e na dɛɛ gyeŋ mena keŋ ↄ doo. 3Walaŋ kamasɛ ŋon ↄ loo gyakaa ↄ dↄↄ mena nɛ, ↄtenate waa wↄŋ ↄ wose lee dukum keyɛɛ man ŋgba Kristo nɛ. 4Walaŋ kamasɛ ŋon ↄ yɛɛ dukum na ↄ ta fom Wurubuarɛ mmaraa keŋ, nawolo nyi dukum keyɛɛ yɛna Wurubuarɛ mmaraa kafom. 5Mↄna ɛ gyeŋ nyi Yesu Kristo kↄŋae na ↄ kaa lese daa lee dukum man, te ɛ gyeŋ mↄ nyi dukum kamasɛ be doo ↄ man ya. 6Mena dↄↄ walaŋ kamasɛ ŋon ŋon na Kristo dana nↄↄdokoloŋ na, ↄ bee doo dukum keyɛɛ man bela ya. Kei nawolo nyi ŋon ↄ gyakaa ↄ ne yɛɛ dukum na, ↄ te naa ta Yesu Kristo ya te ↄ ba gyeŋ ↄ dinↄↄ mↄ ya. 7Me bia kpaakpaa, ɛ na yela ŋolo ka beo ŋon do dukum keyɛɛ man ya. Nyaŋ ŋon n yɛɛ nombia kpaakpaa na, n gbɛɛneŋ tenɛɛ Wurubuarɛ siaman ŋgba mena keŋ Kristo gbɛɛneŋ tenɛɛ nɛ. 8Walaŋ ŋon ↄ gyakaa ↄ ne yɛɛ dukum na ↄ yɛɛ ↄbↄnsam walaŋ e, nawolo nyi ↄbↄnsam yɛɛ dukumyɛɛre e leenaŋ kewalaŋ keŋ pou. Kpene keŋ dↄↄ Wurubuarɛ bu ŋon be kↄŋ yɛna nyi, ↄ kↄŋae ↄ kaa wↄlɛɛ ↄbↄnsam tom. 9Walaŋ ŋon ↄ yɛɛ Wurubuarɛ bu e na, ↄ be doo dukum keyɛɛ man ya nawolo nyi Wurubuarɛ dinↄↄ doo ↄ man. Te ↄ be gyae waa tale gyakaa dukum keyɛɛ dↄↄ ya, nawolo nyi ↄ yɛɛ Wurubuarɛ bu e. 10Nnɛ te dɛɛ mo gyeŋ baŋ be yɛɛ Wurubuarɛ bia na baŋ be yɛɛ ↄbↄnsam wui. Nyaŋ ŋon n bɛɛ yɛɛ kpene keŋ dei ya yaa nyaŋ ŋon n bɛɛ gyae n dↄↄ ya na n te yɛɛ Wurubuarɛ bu e ya. 11Nombii keŋ ɛ be nyii leenaŋ debaŋ keŋ ɛ be lɛɛ Yesu Kristo di nɛ yɛna nyi "Dɛɛ gyae dↄŋa." 12Ɛ na yɛɛ ŋgba balee ŋon bɛɛ baake e nyi Kani nɛ ya. Na Kani yɛɛ ↄbↄnsam walaŋ e te ↄ koo ↄ naabu. Woŋ dↄↄ te Kani koo ↄ naabu? Nawolo nyi ŋon Kani gbɛɛneŋ ba tenɛɛ Wurubuarɛ siaman ya, te ↄ naabu gbɛɛneŋ tenɛɛ. 13Mena dↄↄ me naabia, nyi tɛɛle kei dↄↄ balaŋ ne kↄla ŋon na ɛ na yeli ke yɛɛ ŋon gyakoloŋ ya. 14Da gyeŋ nyi daa dↄↄ de ta lee yeŋ man kↄŋ nyeedoŋ kekpaa man, nawolo nyi dɛɛ gyae dↄŋa dↄↄ. Walaŋ ŋon ↄ bɛɛ gyae ↄ dↄↄ ya na, ↄ sɛɛ ↄ doo yeŋ nyiŋmaa man. 15Nyaŋ ŋon n ne kↄla n dↄↄ na n yɛɛ awudiini e Wurubuarɛ siaman, te ɛ gyeŋ mↄ nyi awudiini kamasɛ be dana nyeedoŋ kekpaa keŋ ya. 16Yesu Kristo ka mo ↄ nyee lɛɛ daa dↄↄ, te da gyeŋ mena keŋ kaboena nyi daa mↄ dɛɛ gyae de tebia. Mena dↄↄ kaboena nyi daa mↄ dɛɛ mo da nyeeya lɛɛ de tebia. 17Nyi akpaa ŋolo dana abↄↄ tɛɛle kei dↄↄ te ↄ naa nyi te hia ↄ dↄↄ, te ↄ bɛɛ lese ↄ sia yela e na sena te ↄtenate waa tale yako nyi Wurubuarɛ kegyae doo ↄ man? 18Me bia kpaakpaa, ɛ na fa dɛɛ mo nↄↄ yakaa gyae dↄŋa ya, mↄna ɛ yela dɛɛ yɛɛ deeli fa dↄŋa anokoare man. 19Kei ne gyae la ke yela dɛɛ gyeŋ nyi de yɛɛ Wurubuarɛ ŋon ↄ dana anokoare keŋ nɛ wui. Mena dↄↄ akpaa de konↄↄse de bu daa fↄↄ koraŋ na, dɛɛ tale seŋ Wurubuarɛ siaman keŋ dↄↄ yee gyakoloŋ ya. 20Nawolo nyi Wurubuarɛ kela de konↄↄse te ↄ gyeŋ kpene kamasɛ man. 21Me gyoona kpaakpaa, akpaa de konↄↄse bee bu daa fↄↄ ya na, dɛɛ tale seŋ Wurubuarɛ siaman keŋ dↄↄ yee kolo ya. 22Te da sola e kpene kamasɛ na dee nyiŋ ke, nawolo nyi dee nyii ↄ dei te dɛɛ yɛɛ kpene keŋ ↄ ne gyae. 23Kei yɛna kpene keŋ ↄ ne gyae nyi dɛɛ yɛɛ. Dɛɛ lɛɛ ↄ bu Yesu Kristo di, na dɛɛ gyae dↄŋa ŋgba mena keŋ ↄ be yako daa nɛ. 24Walaŋ kamasɛ ŋon ↄ ne nyii Wurubuarɛ dei na, ŋon na Wurubuarɛ nↄↄ yɛɛ dokoloŋ. Wurubuarɛ feliŋ ŋon ↄ ba mo do de man nɛ, yele la da gyeŋawↄ nyi daa na Wurubuarɛ nↄↄ yɛɛ dokoloŋ.

will be added

X\