1 Korintotena 9

1Ɛ ne kɛɛ maŋ nɛ ma te yɛɛ Kristo kpilale e yee? Me doo ŋolo tɛɛ? Ma te yɛɛ walaŋ ŋon mↄↄ naa de Gbeŋgyoo Yesu Kristo na me sia yee? Na ma tom keŋ mↄↄ yɛɛ ɛ man nɛ, yele la te ɛ lɛɛ de Gbeŋgyoo Yesu di yee? 2Akpaa nyi baale bɛɛ lɛɛ maŋ do nyi me yɛɛ Kristo kpilale e ya na, ɛmɛɛ dↄↄ ɛ te lɛɛ maŋ do. Nawolo nyi mena keŋ ɛ be lɛɛ Kristo di te ɛ ɛmɛɛ na e be yɛɛ dokoloŋ nɛ, na lese la wola nyi me yɛɛ Kristo kpilale e. 3Nombia kɛŋa te mɛɛ mo tiranↄↄ fa baŋ bɛɛ yako nyi ma te yɛɛ Kristo kpilale e ya nɛ. 4Mena dↄↄ tekaboena nyi baa fa daa weenɛɛ na loŋ yee? 5Mena dↄↄ tekaboena nyi daa mↄ dɛɛ yala ala baŋ be yɛɛ Kristotenawↄ, na baa ta sila daa ŋgba mena keŋ bee sila Pita na Kristo kpilala akaŋ baŋ, na de Gbeŋgyoo Yesu ↄ naabia baŋ nɛ yee? 6Yaa daa na Banabase daageŋ te kaboena nyi dɛɛ yɛɛ tom, na dɛɛ mo kɛɛ da wose dↄↄ? 7Yoonↄↄte woŋti ne gyuu na yoo, te ŋon gbagba ne tↄ ↄ wose kom? Yaa wↄↄfarale woŋti kyaa la keŋ ↄ ne fara wↄↄ, te ↄ bee dii lee wↄↄ kenaŋ man ya? Wonembia kɛɛlere woŋti kyaa la, keŋ ↄ ne kɛɛle wonembia te ↄ bee di be naane ya? 8Denibalaŋ agyueŋ yaa me dana mee kolosi nombia kɛŋa yaa? Koa, Wurubuarɛ mmaraase ŋan mↄ na wolo mena. 9Nawolo nyi be ŋmarasewↄ do mmaraase ŋan Wurubuarɛ ba mo fa Mosesi nɛ man nyiaa, "Na bake nunkyue ŋon ↄ ne yɛɛ tom wↄↄman nɛ nↄↄ, na ↄ be nyiŋ di weenɛɛ ŋan ŋaale ya." Mena dↄↄ ɛ gyeŋ nyi nunkyue waraŋase yaa Wurubuarɛ ne wii nɛ? 10Na daa te Wurubuarɛ ne yako mena nombia kɛŋa fa yee? Ayi, daa te be ŋmarase ŋa fa. Nawolo nyi walaŋ ŋon ↄ na boolaa wↄↄ na ŋon ↄ ne gbee weenɛɛ nɛ, be popou loo gyakaa nyi baa nyiŋ kolo lee wↄↄ keŋ man. 11Wurubuarɛ nombia ŋan dↄↄ kolosi fa ŋon nɛ, ŋe yɛɛ yaa ŋgba abↄↄ ŋan dↄↄ duu ɛ man nɛ. Mena dↄↄ akpaa ɛmɛɛ mↄ ɛ fa daa tɛɛle kei dↄↄ abↄↄ na, ta kela ŋon? 12Akpaa nyi ɛ ne kyↄ baale lee gbɛɛ kei man na, tekaboena nyi yaa kyↄ daa kela wↄ yee? Mↄna daa ta mo mena gbɛɛ kei dↄↄ ŋere ŋon ya. De kyaŋa da wose te da seŋawↄ keŋkeŋ nombia kɛŋa pou man, na dↄↄ nyiŋ tↄ Kristo nombia kpaakpaa ŋan gbɛɛ ya. 13Mena dↄↄ ɛ ba gyeŋ nyi balaŋ baŋ bɛɛ yɛɛ tom Wurubuarɛ ↄsom deni dinaa keŋ man nɛ, bee nyiŋ be weenɛɛ bo lee botↄↄ yee? Te na botↄↄ keŋ bee deesi fa Wurubuarɛ nɛ, te somra baŋ mↄ na nyiŋ be weenɛɛ lee yee? 14Mena ke te de Gbeŋgyoo mↄ yakowↄ nyiaa, balaŋ baŋ bee kolosi nombia kpaakpaa ŋan nɛ, kaboena nyi baa nyiŋ be weenɛɛ lee nombia kpaakpaa ŋan kekolosi man. 15Mↄna me ta mo mena gbɛɛ keŋ me dana nɛ, yɛɛ kolo ya. Te mↄↄ ne ŋmarase nombia kɛŋa fa ŋon, na ke yela ɛ ke yɛɛ mena abↄↄ kɛŋa fa maŋ ya. Nyi ma yem gba na dei kela nyi ŋolo ke fa maŋ kolo, keŋ gyae ketↄ maŋ gbɛɛ na mↄↄ nyiŋ gyↄ me konↄↄ wola ma wose lee tom keŋ mɛɛ yɛɛ nɛ man ya. 16Mↄna gbɛɛ be doo nyi maa wola ma wose lee nombia kpaakpaa kɛŋa kekolosi dↄↄ ya, nawolo nyi me gyae o, ma te gyae ya o, ke yɛɛ kpene keŋ ke taŋ doo nyi maa kolosi nombia kpaakpaa ŋenaŋ. Akpaa ma te yako nombia ŋenaŋ ya na, maa laako. 17Nyi akpaa maŋ gbagba kegyaebii man te mee kolosi nombia kpaakpaa kɛŋa na, maa nyiŋ kom ketↄ. Mↄna akpaa te yɛɛ maŋ gbagba kegyaebii man ya na, kenaŋ na mɛɛ yɛɛ tom keŋ de Gbeŋgyoo Yesu ba mo fa maŋ nyi kaboena nyi maa yɛɛ nɛ bo. 18Woŋ yɛna kom keŋ baa tↄ maŋ? Keŋ yɛna nyi maa yako nombia kpaakpaa ŋan fa balaŋ keŋ nyi me na lɛɛ kolo ya. Te mↄↄ gyae maa mo gbɛɛ keŋ me dana nombia kpaakpaa kɛŋa keyako man nɛ, mo gyae kolo fa ma wose ya. 19Doo nyi me kyae ma wose dↄↄ keŋ ma te yɛɛ ŋolo gbeŋi e koraŋ ya nɛ, me ta mo ma wose besena gbeŋi fa balaŋ pou, na maa nyiŋ yela be man balaŋ burum kekↄŋ Kristo gyaŋ. 20Akpaa me gyu Gyudatena gyaŋ na, mɛɛ yɛɛ ma wose ŋgba Gyuda baale nɛ, na maa nyiŋ yela be man balaŋ burum kekↄŋ Kristo gyaŋ. Te akpaa me gyu balaŋ baŋ be doo Mosesi mmaraa keŋ tɛɛ na, mɛɛ yɛɛ ma wose ŋgba walaŋ ŋon ↄ doo mmaraa keŋ tɛɛ nɛ, mↄna mↄↄ doo ke tɛɛ ya. Mɛɛ yɛɛ mena na maa nyiŋ yela be man balaŋ burum kekↄŋ Kristo gyaŋ. 21Mena mↄ te akpaa me gyu balaŋ baŋ bↄↄ doo Gyudatena mmaraa keŋ tɛɛ ya nɛ gyaŋ na, mɛɛ yɛɛ ma wose ŋgba walaŋ ŋon ↄ be doo mmaraa kenaŋ tɛɛ ya nɛ. Mↄna ma te yɛɛ walaŋ ŋon mↄↄ doo Wurubuarɛ mmaraa tɛɛ ya. Me doo Kristo mmaraa tɛɛ. Mɛɛ yɛɛ mena na maa nyiŋ yela be man balaŋ burum baŋ bↄↄ doo mmaraa kenaŋ tɛɛ ya nɛ kekↄŋ Kristo gyaŋ. 22Akpaa me lii balaŋ baŋ ba kelɛɛdi taŋ doŋ ya nɛ gyaŋ na, mɛɛ yɛɛ ma wose ŋgba baŋ nɛ, na maa nyiŋ yela be man balaŋ burum kekↄŋ Kristo gyaŋ. Me ta mo ma wose yɛɛ kpene kamasɛ fa balaŋ pou, na maa yɛɛ mena keŋ maa tale nɛ, na maa nyiŋ yela be man balaŋ burum kekↄŋ Kristo gyaŋ. 23Wurubuarɛ nombia kpaakpaa ŋan dↄↄ te mɛɛ yɛɛ kɛŋa pou, na maŋ mↄ kenyiŋ abↄↄ kpaakpaa ŋan gyae ka lee ŋe man kↄŋ nɛ. 24Ɛ ba gyeŋ nyi balaŋ burum ne yeu baa lɛɛ yele na, be popou ne yeu mↄna walaŋ dokoloŋ ne lɛɛ na yele yee? Mena dↄↄ ɛmɛɛ mↄ ɛ kyaŋ ɛ wose na ɛ ke yeu nideli, na ɛ ke nyiŋ yele keyeu keŋ man. 25Walaŋ kamasɛ ŋon ↄ ne desina ↄ wose fa keyeu na, ↄ ne di keyeu mmaraase ŋan pou dↄↄ. Ↄ ne yɛɛ kɛŋa pou bo fa yele keŋ be gyae ke kyare ya nɛ. Mↄna daa ne yɛɛ Kristo tom keŋ dɛɛ mo nyiŋ yele keŋ gyae ke doo kekpaakekpaa nɛ bo. 26Mena dↄↄ mↄↄ ne yeu ŋgba walaŋ ŋon ↄ ba gyeŋ keŋ dↄↄ te ↄ ne yeu nɛ ya, te mↄↄ ne yoo mↄ ŋgba walaŋ ŋon ↄ ne fuŋii wa akↄta do feliŋ man yakaa yakaa nɛ ya. 27Mↄna maŋ dↄↄ mɛɛ naase ma wose diyem, te mɛɛ yɛɛ ke ŋgba me gbeŋi nɛ. Na wee daale dekↄŋ nyi ma kekolosi Kristo nombia ŋan fa balaŋ taŋ wↄle nɛ, na bↄↄ lese maŋ see yenaŋ keŋ mↄↄ nyiŋ yele ya.

will be added

X\