1 Korintotena 8

1Nɛnɛɛ mɛɛ gyae maa kolosi fa ŋon lee bane weenɛɛ wose man. Ke yɛɛ ampaŋ ke nyi walaŋ kamasɛ gyeŋ nombia, mↄna mena nombia kagyeŋ kei ne yeli walaŋ ne gyↄ ↄ konↄↄ wola ↄ wose bo, te balaŋ kegyae ne yele la Kristotena ne tale kyↄ dↄŋa na baa seŋ nideli ba kelɛɛdi man. 2Akpaa walaŋ na gyueŋ nyi ↄ gyeŋ nombia nɛ, ↄtenate ba gyeŋ kolo ya. Nawolo nyi ↄ ba gyeŋ ŋgba mena keŋ kaboena nyi waa gyeŋ nɛ ya. 3Mↄna walaŋ ŋon ↄ ne gyae Wurubuarɛ na, ŋon mↄ te Wurubuarɛ gyeŋ. 4Mena dↄↄ lee bane weenɛɛ kedi wose man nɛ, da gyeŋ nyi bane te yɛɛ kolo ke tɛɛle kei dↄↄ ya, te da gyeŋ mↄ nyi Wurubuarɛ dokoloŋ kyaa la. 5Doo nyi bɛɛneŋ na gbeŋgyoona burum kyaa. Nyi akpaa bɛɛneŋ baŋ balaŋ ne baake wↄ nyi be gbeŋgyoona nɛ kyaa adido bo o, yaa be kyaa tɛɛle kei dↄↄ bo o nɛ, 6daa dↄↄ Wurubuarɛ dokoloŋ kooŋ te de dana. Ŋon yɛna de kya ŋon kpene kamasɛ ba lee ↄ gyaŋ, te ŋon mↄ dↄↄ te de dana nyeedoŋ. Gbeŋgyoo dokoloŋ kooŋ mↄ te de dana, ŋon yɛna Yesu Kristo. Ↄ dↄↄ te Wurubuarɛ tɛɛwↄ yɛɛ kpene kamasɛ, te ŋon mↄ dↄↄ te de dana nyeedoŋ. 7Mↄna na balaŋ pou gyeŋa na mena nombii kei ya. Nawolo nyi bane nombia ta gyoo be man nideli keŋ nyi akpaa be di mena weenɛɛ kɛŋa na, ne yɛɛ wↄ nyi be te di bane weenɛɛ. Te keŋ ba kelɛɛdi taŋ doŋ dↄↄ ya nɛ, na ne yɛɛ wↄ nyi be ta mo ayimɛɛ tina ba wose. 8Mↄna weenɛɛ be gyae ke tale mo daa benaa na Wurubuarɛ ya. Akpaa de di ŋa o, yaa de te di ŋa ya nɛ, ŋe bɛɛ wↄlɛɛ daa na Wurubuarɛ nsana ya. 9Mↄna ɛ kɛɛ ke nideli nyi gbɛɛ keŋ ɛ dana nyi ɛ ke tale di mena weenɛɛ ŋenaŋ nɛ, na bese kateesa fa walaŋ ŋon ↄ kelɛɛdi taŋ doŋ nɛ ya. 10Akpaa walaŋ ŋon ↄ kelɛɛdi taŋ doŋ ya nɛ de naa nyi nyaŋ ŋon n gyeŋ nombia kɛŋa kyaa bane deni man n ne dii na, ŋgba n na wola e gbɛɛ baa nyi waa ta di bane dɛɛ weenɛɛ? 11Mena dↄↄ n nombia kagyeŋ beiŋ gyae ke yela n dↄↄ ŋon ↄ kelɛɛdi taŋ doŋ ya, te Kristo ba yem lɛɛ ↄ nyee nɛ, waa yo Wurubuarɛ gbɛɛ man. 12Nyi akpaa n yɛɛ dukum kei dinↄↄ tia n dↄↄ ŋon ↄ kelɛɛdi taŋ doŋ ya, te n yeli ↄ konↄↄ man nombia de yↄkↄse lee ↄ kelɛɛdi man nɛ, na n te yɛɛ dukum tia Kristo. 13Mena dↄↄ akpaa nyi bane weenɛɛ ŋan maa di, ne gyae la ke yela me dↄↄ ke yala gyoo dukum man yeyɛɛ na, kenaŋ na mↄↄ gyae maa di ŋa korakora bela ya. Nawolo nyi mↄↄ ne gyae nyi me dↄↄ ke yala gyoo dukum man yeyɛɛ ya.

will be added

X\