1 Nyi akpaa ɛmɛɛ Kristotena wolɛɛwolɛɛ de nyiŋ nombia na, weera dↄↄ te ɛ na mo gyu balaŋ yakaa nyibaŋ gyaŋ, te ɛ bɛɛ mo gyu ɛ tebia Kristotena gyaŋ ya? 2 Ɛ ba gyeŋ nyi ɛmɛɛ Wurubuarɛ balaŋ ne gyae la ɛ ke di tɛɛle kei dↄↄ balaŋ nombia yee? Akpaa nyi ɛmɛɛ ne gyae la ɛ ke di tɛɛle kei dↄↄ balaŋ nombia na, weera dↄↄ te ɛ be tale di ɛmɛɛ gbagba nsana nombia buruburu kɛŋa ya? 3 Ɛ ba gyeŋ nyi daa Kristotena ne gyae la dee di Wurubuarɛ kpilala nombia yee? Akpaa nyi daa ne gyae la dee di Wurubuarɛ kpilala nombia na, kenaŋ na dↄↄ tale di da kekyaabii kei man nombia yee? 4 Akpaa nyi mena nombia kɛŋa doo ya nsana na, woŋ dↄↄ te ɛ na lese balaŋ baŋ bↄↄ dana daseŋae Kristotena siaman ya nɛ nyi baa di ɛ nombia? 5 Nombii kei dana desɛŋ! Mena dↄↄ ɛ be dana siakaralate ŋolo ɛ man keŋ waa tale di ɛ nombia fa ŋon yee? 6 Mↄna ɛmɛɛ dↄↄ, ɛ ne tale ke samenaa dↄŋa fa walaŋ ŋon ↄ te yɛɛ Kristo baale e ya nɛ nyi waa di ɛ nombia. 7 Ɛ kɛɛ samenaa dↄŋa kei nawolo baa nyi ɛ te yale ɛ kelɛɛdi keŋ man. Akpaa ŋolo de yɛɛ nombiikum tia neŋ na, woŋ dↄↄ te n bee nyiŋ konↄↄ fa e ya? Yaa akpaa ŋolo da ŋere neŋ do na, woŋ dↄↄ te n bee nyiŋ konↄↄ fa e ya? 8 Ɛmɛɛ gbagba koraŋ ne yɛɛ nombiakumɛɛ tia ɛ tebia Kristotena, te ɛ na ŋere dↄŋa do. 9 Mena dↄↄ ɛ ba gyeŋ nyi nombiakumɛɛyɛɛra be gyae baa nyiŋ gbɛɛ gyoo Wurubuarɛ gyoori keŋ man yee? Ɛ na yeli baa beo ŋon ya, nawolo nyi balaŋ baŋ bɛɛ yɛɛ kafoŋ, na baŋ bɛɛ som banɛɛ na baŋ bɛɛ lee be baala yaa be wɛɛla wↄle, na baala baŋ bee doo na dↄŋa, 10 na ŋmɛɛlatena na baŋ be dana sibii na soloŋ nyↄↄra na balaŋ baŋ bɛɛ wↄlɛɛ balaŋ na balaŋ baŋ bɛɛ mo doŋ lɛo balaŋ abↄↄ nɛ, be gyae baa nyiŋ gbɛɛ gyoo Wurubuarɛ gyoori keŋ man ya. 11 Nafↄ na mena te ɛ man baale mↄ doo. Mↄna Wurubuarɛ baake na ŋon, te ↄ faafo ŋon te ↄ desina ŋon see fa ↄ wose. Nɛnɛɛ Wurubuarɛ te lɛɛ ŋon do nyi ɛ gbɛɛneŋ tenɛɛ ↄ siaman lee de Gbeŋgyoo Yesu Kristo na Wurubuarɛ feliŋ ŋon yele man. 12 "Me dana gbɛɛ nyi maa tale yɛɛ kpene kamasɛ, mↄna na ŋe popou deila fa maŋ ya. Me dana gbɛɛ nyi maa tale yɛɛ kpene kamasɛ, mↄna mↄↄ gyae maa fa kpene kamasɛ gbɛɛ na ke kedi gyoori me dↄↄ ya." 13 Weenɛɛ doo bo fa dubulu, te dubulu mↄ doo bo fa weenɛɛ. Mↄna Wurubuarɛ waa kↄŋ kaa wↄlɛɛ kɛŋa pou. Ba te yɛɛ wosenaane bo fa kafoŋ nombia ya, mↄna be yɛɛ ke bo nyi dɛɛ mo som de Gbeŋgyoo Wurubuarɛ. De Gbeŋgyoo Wurubuarɛ tee wosenaane keŋ. 14 Wurubuarɛ tɛɛwↄ ↄ doŋ keŋ dↄↄ gyuusu de Gbeŋgyoo Yesu lee yeŋ man, mena ke te waa ta ↄ doŋ kenaŋ dↄↄ gyuusu daa mↄ lee yeŋ man. 15 Ɛ ba gyeŋ nyi ɛ wosenaane yɛɛ Kristo gbagba wosenaane yenaŋ daale ke yee? Kaboena nyi maa mo Kristo wosenaane yenaŋ daale ke tina kafoŋte? Korakora, be kↄŋ mena ya. 16 Ɛ ba gyeŋ nyi walaŋ ŋon ↄ mo ↄ wose tina kafoŋte na, ŋon na e ta bese wosenaane dokoloŋ yee? Nawolo nyi Wurubuarɛ nombia aŋmaraseŋ see ne yako nyiaa, "Alo na ↄ baale baa bese walaŋ dokoloŋ." 17 Mↄna walaŋ ŋon ↄ mo ↄ wose fa de Gbeŋgyoo Yesu na, ŋon na e ta bese walaŋ dokoloŋ. 18 Ɛ lese ɛ wose lee kafoŋ nombia man. Nombii kamasɛ be kyaa keŋ ne yɛɛ walaŋ wosenaane ayimɛɛ ŋgba kafoŋ nombia nɛ ya. Nawolo nyi walaŋ kamasɛ ŋon ↄ ne yɛɛ kafoŋ nombia na, ↄ ne yɛɛ dukum bo tia ŋon gbagba wosenaane. 19 Wurubuarɛ feliŋ ŋon ↄ ba mo fa ŋon te ↄ doo ɛ man nɛ, ɛ ba gyeŋ nyi ɛ wosenaane yɛna ↄ deni dinaa yee? Ɛ be kyaa fa ɛ wose ya. 20 Nawolo nyi Wurubuarɛ lɛɛ ŋon bo na koya doŋ, mena dↄↄ ɛ mo wosenaane lese ŋon Wurubuarɛ yele.
