1 Korintotena 4

1Mena dↄↄ kaboena nyi walaŋ kamasɛ waa lɛɛ daa do nyi de yɛɛ Kristo kpilalawↄ, te de yɛɛ balaŋ baŋ Wurubuarɛ ba mo ↄ nombia dinaana aweeseŋ ŋan do de nyiŋmaa man. 2Walaŋ ŋon ↄ ne kɛɛ ŋolo kolo dↄↄ nɛ, kpene keŋ kaboena nyi waa yɛɛ yɛna nyi, waa di anokoare fa ↄ gbeŋgyoo ŋon. 3Te maŋ dↄↄ akpaa nyi ɛ man baale yaa balaŋ wↄlɛɛ baale de bu maŋ fↄↄ na, bɛɛ takaa maŋ ya. Maŋ gbagba koraŋ bee bu ma wose fↄↄ ya. 4Me konↄↄ man nombia bee bu maŋ fↄↄ ya, mↄna kei bɛɛ wolo nyi nombiikum daale be doo me man ya. De Gbeŋgyoo Yesu yɛna ŋon ↄ ne di me nombia. 5Mena dↄↄ ɛ na barase bu ŋolo fↄↄ pɛte de Gbeŋgyoo Yesu kekↄŋ keŋ kelii ya. Ŋon ne gyae la ↄ kaa lese kpene kamasɛ keŋ weesɛɛ nɛ debↄↄ, na waa lese walaŋ konↄↄ man nombia pou debↄↄ. Debaŋ kenaŋ te Wurubuarɛ waa kɛlɛɛ walaŋ kamasɛ lee ↄ tom wa ayɛɛŋ dↄↄ. 6Me tebia, ɛmɛɛ dↄↄ te mɛɛ yako nombia kɛŋa te ma moo ma wose mɛɛ maa na Apolo wola ŋon, na ke yela ɛ ka gyeŋ Wurubuarɛ nombia aŋmaraseŋ see ŋan man. Nombia ŋenaŋ yɛna nyiaa, ɛ na gbaa nombia ŋan bↄↄ ŋmarase see nɛ dↄↄ ke yɛɛ kolo wↄle ya. Nyi akpaa ɛ yɛɛ mena na, ɛ be gyae ɛ ke kɛɛ ŋolo nyi ↄ dei kela ↄ dↄↄ ya. 7Amↄte yako na ŋon nyi ɛ kela ɛ tebia? Woŋ te ɛ dana keŋ nyi na Wurubuarɛ faa na ŋon ya? Te akpaa Wurubuarɛ faa na ŋon na, weera te ɛ ne gyina ɛ wose adido ŋgba na ŋon faa na ŋon ya nɛ? 8Ɛ gyeŋ nyi ɛ taŋ ke wulaa nyiŋ kpene kamasɛ keŋ ne hia ŋon? Te ɛ gyeŋ nyi ɛ taŋ wulaa nyiŋ ɛ wose? Ɛ gyeŋ nyi ɛ taŋ lee de wↄle di gyoori keŋ daa sɛɛ de yɛɛ balaŋ yakaa nyibaŋwↄ? Nafↄ me gyaewↄ nyi yaa bese gyooneŋ, na daa mↄ ke di gyoori kpu na ŋon. 9Nawolo nyi ne yɛɛ maŋ ŋgba Wurubuarɛ ta mo daa Kristo kpilala baŋ see wↄle wↄle, ŋgba balaŋ baŋ bↄↄ doo daale man ya, te bↄↄ lese wↄ see nyi baa ko balaŋ man nɛ. De ta bese kpene keŋ tɛɛle kei dↄↄ balaŋ na Wurubuarɛ kpilala baŋ be kyaa adido nɛ pou ne kɛɛ. 10Lee Kristo dↄↄ daa yɛɛ ayiŋtenawↄ, mↄna ɛmɛɛ te tɛɛ Kristo dↄↄ bese siakaralatena. Daa be dana doŋ ya, mↄna ɛmɛɛ dana doŋ. Balaŋ ne bu ŋon, mↄna daa dↄↄ bↄↄ ne bu daa ya. 11Mo kaa lii naŋ gyɛŋ kei nɛ, de dↄŋ na de tanam na da loŋboaneŋ! De doo abↄↄ akyekpɛɛ man, te bee tuku daa yeŋ yeŋ te daa gbagba mↄ be dana dekyae ya. 12Dɛɛ mo daa gbagba nyiŋmaase yɛɛ tom nideli. Akpaa balaŋ de falaa daa na, daa na sola Wurubuarɛ bɛrɛɛ bo fa wↄ. Akpaa be naase daa diyem na, dɛɛ yɛɛ kakyeŋ seŋ kelii ↄto. 13Akpaa be wↄlɛɛ da yele na, dɛɛ mo nↄↄwoya kpaakpaa nyiŋan tiranↄↄ fa wↄ. Kaa lii naŋ gyɛŋ wee kei nɛ, de ta bese tɛɛle kei dↄↄ abↄↄ ayimɛɛ nyiŋan, na walaŋ kamasɛ dufuŋ. 14Mↄↄ ne ŋmarase nombia kɛŋa na maa mo do ŋon desɛŋ ya, mↄna mɛɛ faree ŋon bo ŋgba me bia kpaakpaa nɛ. 15Akpaa de kↄŋ nyi ɛ dana balaŋ baŋ baa kɛɛ ɛ dↄↄ Kristo man ŋgba balaŋ kakpoŋse kufu (10,000) koraŋ na, ɛ be dana kyaↄ burum mena ya. Nawolo nyi Kristo man dↄↄ me ta bese ɛ kya lee debaŋ keŋ mↄↄ yako ŋon nombia kpaakpaa ŋan nɛ. 16Mena dↄↄ mɛɛ sola ŋon nideli nyi yaa kasee me dinↄↄ. 17Kei dↄↄ te mee kpila me bu Timoti ŋon mɛɛ gyae e, te ↄ ne di anokoare Kristo man nɛ ɛ gyaŋ. Ŋon ne gyae la ↄ kaa tↄↄse ŋon me gbɛɛneŋ ŋan mɛɛ mo sila Kristo Yesu te mɛɛ mo wola Kristotena akpiise ŋan man yenaŋ kamasɛ nɛ. 18Ɛ man baale ne yɛɛ konↄↄyuŋ ŋgba mↄↄ gyae maa tekaa bese kↄŋ ɛ gyaŋ bo ya nɛ. 19Mↄna akpaa de Gbeŋgyoo de sɛɛ na, be gyae ke kyare ya maa bese kↄŋ ɛ gyaŋ. Balaŋ baŋ bɛɛ yɛɛ konↄↄyuŋ nɛ, na be nombia ŋan bee kolosi nɛ ŋaageŋ te mɛɛ gyae me kaa nyii ya, mↄna mɛɛ gyae me kaa naa doŋ keŋ be dana bɛɛ yɛɛ mena nombia kɛŋa nɛ. 20Nawolo nyi Wurubuarɛ gyoorobiiri keŋ nombia ba seŋɛɛ kekolosi yaa nↄↄwoya ŋaageŋ dↄↄ ya, mↄna ka seŋae Wurubuarɛ doŋ keŋ dↄↄ. 21Woŋti te ɛ ne gyae? Ɛ ne gyae nyi maa mo dambila kↄŋ ɛ gyaŋ yaa, maa mo balaŋ kegyae na konↄↄ kefɛɛ bo kↄŋ.

will be added

X\