1 Korintotena 3

1Me tebia, debaŋ keŋ me kyaa ɛ gyaŋ nɛ, ma te tale kolosi fa ŋon ŋgba balaŋ baŋ Wurubuarɛ feliŋ doo be man nideli nɛ ya, mↄna me kolosiwↄ fa ŋon bo ŋgba balaŋ baŋ be sia gyakaa tɛɛle kei dↄↄ abↄↄ dↄↄ nɛ, yaa balaŋ baŋ be sɛɛ be yɛɛ kyokyoosewↄ Kristo man nɛ. 2Yɛɛ yaa ŋgba dide loŋ te ma moowↄ fa ŋon nɛ. Ŋa te yɛɛ weenɛɛ doŋ nyiŋan ya, nawolo nyi na ɛ ta bee ta na weenɛɛ doŋ nyiŋan ke di ya. Kaa lii na gyɛŋ wee kei koraŋ nɛ, ɛ ta bee ta na ŋe ke di ya. 3Ɛ sɛɛ ɛ yɛɛ ŋgba balaŋ baŋ be loo gyakaa tɛɛle kei dↄↄ abↄↄ dↄↄ nɛ. Nawolo nyi daaworo na aŋmaareŋ na kale nombia doo ɛ man. Kenaŋ na ŋgba ɛ sɛɛ ɛ yɛɛ ŋgba balaŋ baŋ be loo gyakaa tɛɛle kei dↄↄ abↄↄ dↄↄ nɛ baa? 4Akpaa ŋolo de yako nyi, "Me silana Pↄↄl bo" te ŋolo mↄ kpa "Me silana Apolo bo" na, ŋgba ɛ sɛɛ ɛ yɛɛ baa ŋgba tɛɛle kei dↄↄ balaŋ nɛ? 5Ke gbagba na, amↄte yɛna Apolo te amↄte yɛna maŋ Pↄↄl mↄ. De popou yɛɛ de kya Wurubuarɛ tewulɛɛ baŋ ɛ be tɛɛ de dↄↄ lɛɛ nyeedoŋ nombia ŋan di nɛ wↄ. Te de man walaŋ kamasɛ dana tom keŋ de Gbeŋgyoo Yesu be fa e nyi waa yɛɛ. 6Wurubuarɛ nombia ŋan dee kolosi nɛ, yɛɛ yaa ŋgba kolo keŋ bↄↄ duu nɛ. Maŋ Pↄↄl duu la, te Apolo mↄ doo ke loŋ, mↄna Wurubuarɛ yele la te ka beewↄ. 7Mena dↄↄ na walaŋ ŋon ↄ be duu, yaa ŋon ↄ ba do ke loŋ nɛ danaana yele ya, mↄna Wurubuarɛ ŋon ↄ be yeli kↄↄ bee nɛ danaana yele. 8Walaŋ ŋon ↄ be duu na ŋon ↄ ba do ke loŋ nɛ, be popou loo gyakaa bo kolo dokoloŋ dↄↄ. Te Wurubuarɛ waa tↄ walaŋ kamasɛ kom lee ↄ tom keŋ ↄ be yɛɛ nɛ dↄↄ. 9Nawolo nyi daa na Wurubuarɛ bom la dɛɛ yɛɛ ↄ tom keŋ. Ɛ yɛɛ ŋgba Wurubuarɛ wↄↄ keŋ ↄ ne fare yaa ↄ deni keŋ ↄ ne maa nɛ. 10Lee Wurubuarɛ bɛrɛɛ keŋ ↄ ba mo boele maŋ dↄↄ nɛ, me ta see deni keŋ mokↄↄ ŋgba deni maare kpaakpaate ŋon ↄ gyeŋ ↄ tom nɛ. Keŋte baale mↄ kaŋawↄ bɛɛ maa gyakaa ke dↄↄ. Mↄna kaboena nyi walaŋ kamasɛ waa kɛɛ mena keŋ ↄ ne maa gyakaa nɛ nideli. 11Yesu Kristo te Wurubuarɛ moowↄ see deni kei mokↄↄ. Mena dↄↄ ŋolo be gyae waa tale see mokↄↄ wↄle kpu na keŋ bↄↄ wulaa see nɛ ya. 12Nyi akpaa ŋolo da mo kↄba yayam yaa kↄba wolom yaa boya ŋan ŋe dana koya doŋ yaa daase yaa kaase ma gyakaa mokↄↄ kasee gyaŋgbate keŋ dↄↄ nɛ, 13wee dinaa keŋ Kristo waa bese kↄŋ na, baa lese kpene kamasɛ debↄↄ na walaŋ kamasɛ tom keŋ ↄ be yɛɛ nɛ ka lee debↄↄ. Nawolo nyi boalaŋ te baa mo lese kpene kamasɛ debↄↄ. Boalaŋ kenaŋ ne gyaela ka lese tom keŋ walaŋ kamasɛ be yɛɛ nɛ dinↄↄ wola. 14Akpaa nyi ŋolo wui abↄↄ ŋan ↄ ba mo ma nɛ te kpaa boalaŋ kenaŋ man ya na, Wurubuarɛ waa tↄ e kom nideli. 15Mↄna akpaa ŋolo wui de kpaa na, ↄ te yɛɛ tom leki. Walaŋ ŋonaŋ gbagba dↄↄ Wurubuarɛ waa lɛɛ e, mↄna gyae ke yɛɛ bo ŋgba ↄ kↄlee e bo lee boalaŋ man nɛ. 16Ɛ ba gyeŋ nyi ɛmɛɛ gbagba yɛna Wurubuarɛ ↄsom deni dinaa keŋ, te ↄ feliŋ ŋon doo ɛ man yee? 17Mena dↄↄ akpaa ŋolo de wↄlɛɛ Wurubuarɛ ↄsom deni dinaa keŋ nɛ, Wurubuarɛ waa wↄlɛɛ ↄtenate mↄ. Nawolo nyi Wurubuarɛ desinaa ↄ deni dinaa keŋ bo see fa ↄ wose, te ɛmɛɛ yɛna ↄ deni dinaa kenaŋ. 18Ɛ na beo ɛ wose ya. Akpaa ŋolo doo ɛ man te ↄ ne kɛɛ ↄ wose nyi ↄ yɛɛ siakaralate e tɛɛle kei dↄↄ na, kaboena nyi waa besena ↄ wose yɛɛ diyiŋte na waa nyiŋ bese siakaralate gbagba. 19Nawolo nyi tɛɛle kei dↄↄ nyansa yɛɛ diyiŋ nombia ŋa Wurubuarɛ siaman. Wurubuarɛ nombia aŋmaraseŋ see ne yako nyiaa, "Siakaralatena adao man te Wurubuarɛ na mo kyaŋ wↄ." 20Te ba besewↄ ŋmarase see nyiaa, "De Gbeŋgyoo Wurubuarɛ gyeŋ nyi siakaralatena konↄↄ man nombia be dana tↄnↄↄ ya." 21Mena dↄↄ ŋolo na mo ↄ sia gyakaa deniwalaŋ dↄↄ, na waa gyina ↄ wose adido ya, nawolo nyi kpene kamasɛ yɛɛ ɛ wui. 22Pↄↄl o Apolo o Pita o tɛɛle kei o nyeedoŋ o yeŋ o debaŋ kei o wee daale o, ŋe popou yɛɛ ɛ wui. 23Ɛmɛɛ mↄ yɛɛ Kristo wui, te Kristo mↄ yɛɛ Wurubuarɛ wui.

will be added

X\