1 Korintotena 15

1Me tebia, nɛnɛɛ mɛɛ gyae maa tↄↄse ŋon nyeedoŋ nombia ŋan mↄↄ yako ŋon te ɛ be lɛɛ di te ɛ seŋɛɛ ŋe man keŋkeŋ nɛ. 2Akpaa ɛ kyaŋ nombia ŋan mↄↄ yako ŋon nɛ man keŋkeŋ na, Wurubuarɛ waa ta ŋe dↄↄ lɛɛ ɛ nyee. Mↄna akpaa ɛ te kyaŋ ŋa keŋkeŋ ya na ɛ kelɛɛdi keŋ yɛɛ yakaa. 3Nawolo nyi kpene keŋ de Gbeŋgyoo Yesu ba wola maŋ te ke dana tↄnↄↄ kela kpene kamasɛ nɛ, keŋ yaa ma moowↄ mɛɛ wola ŋon nɛ. Nombia ŋenaŋ yɛna nyi, De nombiakumɛɛ dↄↄ te Kristo kaa yeŋawↄ, ŋgba mena keŋ Wurubuarɛ nombia aŋmaraseŋ see ŋan ne yako nɛ. 4Be wuu e te weeya atoorote keŋ na Wurubuarɛ gyuusu e lee yeŋ man, ŋgba mena keŋ Wurubuarɛ nombia aŋmaraseŋ see ŋan ne yako nɛ. 5Ↄ lese ↄ wose wola Pita. Kenaŋ wↄle na te ↄ lese ↄ wose wola ↄ kpilala kufu bala baŋ mↄ. 6Kenaŋ wↄle nɛ ↄ besewↄ lese ↄ wose wola ↄ kaseela baŋ be yaanↄↄle kela balaŋ sↄŋonoŋ akpeŋ anoŋ (500) nɛ debaŋ dokoloŋ man. Be man balaŋ burum sɛɛ be kyaa na be sia te baale mↄ ta yekee. 7Keŋte ↄ lese ↄ wose wola Gyemisi, te ↄ besewↄ lese ↄ wose wola kpilala baŋ pou. 8Wↄle wↄle nɛ, ↄ kaa lese ↄ wose wola maŋ Pↄↄl ŋon nafↄ ŋolo te gyakaa loo nyi maa kaa bese Kristo walaŋ ya nɛ. 9Maŋ yɛna Kristo kpilala baŋ pou man kemaasa, te ma tekaboena gba nyi nafↄ baa baake maŋ nyi Kristo kpilale ya. Nawolo nyi me naase Kristotena baŋ diyem nideli. 10Mↄna lee Wurubuarɛ bɛrɛɛ dↄↄ te gyɛŋ me kaa bese walaŋ nɛ. Ↄ bɛrɛɛ keŋ ↄ ba mo boele maŋ nɛ te yɛɛ yakaa ya, nawolo nyi me yɛɛ tom kela Kristo kpilala akaŋ baŋ pou. Mↄna na maŋ gbagba doŋ te ma moowↄ yɛɛ ya, Wurubuarɛ bɛrɛɛ keŋ ↄ ba mo boele maŋ nɛ yɛɛ la. 11Mena dↄↄ Kristo nombia kɛŋa lee me gyaŋ o ŋa lee be gyaŋ bo o, ŋan te de popou ne kolosi te ŋan mↄ te ɛ lɛɛwↄ di. 12Mↄna akpaa dee kolosi nyeekelɛɛ nombia ŋan nyi Kristo yeŋawↄ te Wurubuarɛ gyuusu e lee yeŋ man na, woŋ dↄↄ te ɛmɛɛ baale ne yako nyi kefoŋ lee yeŋ man be kyaa ya? 13Nyi akpaa kefoŋ lee yeŋ man be kyaa ya na, kenaŋ na nawolo baa nyi Wurubuarɛ te gyuusu Kristo lee yeŋ man ya. 14Te akpaa Wurubuarɛ te gyuusu Kristo lee yeŋ man ya na, kenaŋ na Wurubuarɛ nombia ŋan dee kolosi na ɛ kelɛɛdi keŋ mↄ yɛɛ yakaa. 15Nyi akpaa be doo mena ya na kenaŋ na daa Kristo kpilala baŋ te di dekara gyakaa Wurubuarɛ dↄↄ, nawolo nyi dɛɛ yako nyi Wurubuarɛ gyuusu Kristo lee yeŋ man. Nyi akpaa woya be gyae baa foŋ lee yeŋ man ya na, kenaŋ na Wurubuarɛ te gyuusu Kristo lee yeŋ man ya. 16Mↄ akpaa kefoŋ lee yeŋ man be kyaa ya na, kenaŋ na Wurubuarɛ te gyuusu Kristo lee yeŋ man ya. 17Te akpaa nyi Wurubuarɛ te gyuusu Kristo lee yeŋ man ya nɛ, kenaŋ na ɛ kelɛɛdi keŋ yɛɛ yakaa te ɛ sɛɛ ɛ doo ɛ nombiakumɛɛ man. 18Kenaŋ na Kristotena baŋ mↄ bↄↄ yekee nɛ ta yekee leki. 19Akpaa nyi tɛɛle kei dↄↄ kaageŋ kekyaa dↄↄ te de loo gyakaa Kristo dↄↄ na, kenaŋ na de nombia dana waraŋase kela walaŋ kamasɛ. 20Mↄna anokoare keŋ doo ke man yɛna nyiaa, Wurubuarɛ gyuusu Kristo lee yeŋ man. Ŋon Kristo yɛna woya baŋ pou Wurubuarɛ waa kaa gyuusu wↄ nɛ be gyaŋgbate. 21Nawolo nyi mena keŋ yeŋ be tɛɛ walaŋ dokoloŋ dↄↄ kↄŋ tɛɛle kei dↄↄ nɛ, mena mↄ te kefoŋ lee yeŋ man mↄ tɛɛwↄ walaŋ dokoloŋ dↄↄ kↄŋ tɛɛle kei dↄↄ. 22Ŋgba mena keŋ balaŋ pou ba lee Adam man te ↄ nombiakumɛɛ dↄↄ bɛɛ yekee nɛ, mena mↄ te balaŋ baŋ pou be yɛɛ Kristo wui nɛ baa nyiŋ nyeedoŋ kekpaa lee Kristo yeŋ keŋ man. 23Mↄna walaŋ kamasɛ dana ↄ debaŋ keŋ Wurubuarɛ waa gyuusu e lee yeŋ man. Kristo taŋgbɛɛ la foŋ lee yeŋ man, te wee keŋ waa bese kↄŋ na balaŋ baŋ be yɛɛ ↄ wui nɛ mↄ baa foŋ lee yeŋ man. 24Kei wↄle na kpene kamasɛ gyae ke kↄŋ kↄ ↄto. Debaŋ kenaŋ te Kristo waa di doŋse pou na gyooneŋ na ŋe gyoorobiiri pou dↄↄ, na waa mo gyoori keŋ do ↄ kya Wurubuarɛ nyiŋmaa man. 25Nawolo nyi kaboena nyi Kristo waa di gyoori, kelii debaŋ keŋ Wurubuarɛ waa mo ↄ kↄlala pou do ↄ nawↄↄ tɛɛ. 26Te kↄlare ↄtomante ŋon Wurubuarɛ waa wↄlɛɛ e nɛ yɛna yeŋ. 27Nawolo nyi Wurubuarɛ nombia aŋmaraseŋ see ne yako lee Kristo wose man nyiaa, "Wurubuarɛ ta mo kpene kamasɛ do Kristo tɛɛ." Mↄna keŋ Wurubuarɛ be yako nyi ↄ ta mo kpene kamasɛ do ↄ tɛɛ nɛ, keŋ bɛɛ wolo nyi ŋon Wurubuarɛ gbagba mↄ doo ↄ tɛɛ ya. Nawolo nyi ŋon Wurubuarɛ moona kpene kamasɛ do Kristo tɛɛ. 28Debaŋ keŋ Wurubuarɛ da mo abↄↄ kɛŋa pou do ↄ bu ŋon tɛɛ taŋ nɛ, ↄ bu ŋon mↄ waa mo ↄ wose do ↄ kya Wurubuarɛ ŋon ↄ ba mo kpene kamasɛ do ↄ tɛɛ nɛ tɛɛ. Na balaŋ pou kena nyi Wurubuarɛ yɛna kpene kamasɛ nyee. 29Te akpaa kefoŋ lee yeŋ man be kyaa ya na, woŋ dↄↄ yaa balaŋ baŋ bɛɛ lɛɛ ba woya nↄↄ seŋ nyi baa sↄ wↄ Wurubuarɛ loŋ nɛ loo gyakaa? Yaa akpaa nyi bↄↄ gyae baa gyuusu balaŋ lee yeŋ man korakora ya na, weera te baale ne lɛɛ ba loŋtona baŋ bↄↄ yekee nɛ nↄↄ seŋ nyi baa sↄ wↄ Wurubuarɛ loŋ fa wↄ? 30Te daa gbagba mↄ de? Nyi akpaa kefoŋ lee yeŋ man be kyaa ya na, woŋ dↄↄ te wee kamasɛ dɛɛ mo da wose fa yeŋ? 31Me tebia, mɛɛ yako ŋon nyi yeŋ nombia ne tuŋ maŋ wee kamasɛ. Lee mena keŋ daa na ŋon na Kristo yɛɛ dokoloŋ dↄↄ, mɛɛ tale mo ŋon kyↄ poaa. Mena dↄↄ te mee kolosi nombii kei. 32Nyi tɛɛle kei dↄↄ nombia dↄↄ te daa na balaŋ baŋ be yɛɛ ŋgba wonembia baŋ bɛɛ kyaŋ balaŋ nɛ yoo yoo dinaa kei Efeso donↄↄ man na, woŋ tↄnↄↄ yaa maa nyiŋ lee ke man? Akpaa nyi kefoŋ lee yeŋ man be kyaa ya na, ɛ yela dɛɛ yɛɛ ŋgba mena keŋ dudu daale ne yako nɛ nyiaa, "Ɛ yela dee di na dɛɛ nyↄↄ, nawolo nyi kyoo kaageŋ na de ta yem." 33Ɛ na yeli ŋolo ka beo ŋon ya, "Nawolo nyi dↄↄre kum ne wↄlɛɛ dinↄↄ kpaakpaate." 34Ɛ bese gyoo ɛ wose man nideli na ɛ ke tina nombiakumɛɛ keyɛɛ yela. Nawolo nyi dana desɛŋ ŋgba ɛ man baale sɛɛ ɛ ba gyeŋ Wurubuarɛ nombia korakora ya nɛ. 35Mberem na ŋolo waa bↄↄse nyiaa, "Sena te woya baa tale foŋ lee yeŋ man bela, te wosenaane woŋti yaa baa nyiŋ?" 36Diyiŋ nombia kebↄↄse yaa kei. Nawolo nyi kpene kamasɛ keŋ n duu tɛɛle man nɛ, kɛɛ daale pɛte kolo wↄle ne tuu lee ke man. 37Akpaa n duu kolo bii nɛ, keŋ n ba mo duu na keŋ nyaŋ ke kↄ nɛ te yɛɛ kyɛɛkyɛɛ ya. 38Mↄna Wurubuarɛ ne faa na ke ke dinↄↄ, ŋgba mena keŋ ŋon gbagba ne gyae nɛ. Kpene kamasɛ keŋ n duu na, Wurubuarɛ ne yeli kɛɛ bee nyiŋ ke dinↄↄ. 39Wosenaane pou te yɛɛ dokoloŋ ya. Denibalaŋ wui kpoo te wonembia wui kpoo te gyebuse wui kpoo te kpebia mↄ wui kpoo. 40Mena mↄ te abↄↄ ŋan pou Wurubuarɛ be yɛɛ nɛ, ŋan ŋe kyaa adido nɛ ŋa kyeo kpoo te ŋan ŋe kyaa tɛɛle kei dↄↄ mↄ nɛ kyeo kpoo. 41Weese kɛɛ ŋalakee kpoo te gyaalaŋ mↄ wui keŋalakee kpoo te kyolobiise mↄ kɛɛ ŋalakee kpoo. Kyolobii kamasɛ mↄ dana mena keŋ ↄ ne ŋalakee. 42Mena ke te gyae ke yɛɛ debaŋ keŋ balaŋ baa foŋ lee yeŋ man nɛ. Akpaa be wuu walaŋ na waa dala, mↄna Wurubuarɛ de gyuusu e na waa fa e wosenaane wↄle keŋ be gyae ke dala ya. 43Nyi akpaa be wuu ke na kↄↄ dana tↄnↄↄ bela ya, mↄna akpaa be gyuusu ke lee yeŋ man na ke dana obuo. Nyi be wuu ke na kↄↄ dana doŋ ya, mↄna akpaa be gyuusu ke na ke dana doŋ. 44Deniwalaŋ wosenaane keŋ bɛɛ mo wuu nɛ, ke yɛɛ tɛɛle kei dↄↄ wosenaane ke. Mↄna akpaa Wurubuarɛ de gyuusu ke na ke ta bese Wurubuarɛ man wosenaane. Tɛɛle kei dↄↄ wosenaane kyaa, mena dↄↄ kaboena nyi Wurubuarɛ man wosenaane mↄ dɛɛ kyaa. 45Wurubuarɛ nombia aŋmaraseŋ see yakowↄ nyiaa, "Wurubuarɛ moo ↄ feliŋ do Adam gyaŋgbate ŋon man te ↄ nyiŋa nyeedoŋ. Mↄna Yesu Kristo ŋon bɛɛ baake e nyi Adam balate ŋon nɛ, ŋon yɛna Wurubuarɛ feliŋ ŋon ↄ ne fa nyeedoŋ kekpaa." 46Na ŋon ↄ yɛɛ Wurubuarɛ feliŋ e nɛ taŋgbɛɛ la kↄŋ ya, mↄna ŋon ↄ yɛɛ deniwalaŋ e nɛ taŋgbɛɛ la kↄŋ. Kenaŋ wↄle na pɛte ŋon ↄ yɛɛ Wurubuarɛ feliŋ e nɛ kↄŋawↄ. 47Adam gyaŋgbate ŋon lee tɛɛle kei dↄↄ nawolo nyi tɛɛle te Wurubuarɛ moowↄ yɛɛ e, mↄna Adam balate ŋon dↄↄ ŋon lee Wurubuarɛ man adido. 48Mena keŋ Adam ŋon ↄ ba lee tɛɛle kei dↄↄ doo nɛ, mena mↄ te tɛɛle kei dↄↄ balaŋ doo. Te mena keŋ Adam ŋon ↄ ba lee Wurubuarɛ man doo nɛ, mena mↄ te Wurubuarɛ man balaŋ doo. 49Mena keŋ walaŋ ŋon bↄↄ mo tɛɛle ma e dinↄↄ doo de man nɛ, mena mↄ te walaŋ ŋon ↄ ba lee adido nɛ dinↄↄ gyae ke doo de man. 50Me tebia, mɛɛ gyae ɛ ka gyeŋ nyi kpene keŋ ke yɛɛ wosenaane na fatabo ke nɛ, be gyae ke tale gyoo Wurubuarɛ gyoori keŋ man ya. Mena mↄ te wosenaane kei keŋ gyae ke dala nɛ, be gyae ke kyaa kekpaakekpaa ya. 51Ɛ see deŋele na ɛ ke tei nombia aweeseŋ kɛŋa. Nombia ŋenaŋ yɛna nyiaa, na de popou ne gyae la dɛɛ yeŋ ya. Mↄna debaŋ keŋ ba wola kaberɛ ↄtomante keŋ na, Wurubuarɛ waa kyɛɛkee de popou karatetee dokoloŋ ŋgba mena keŋ ↄga ne ŋmaale nɛ. 52Ba wola kaberɛ ↄtomante keŋ na Wurubuarɛ waa kyɛɛkee de popou, te baŋ bↄↄ yekee nɛ baa foŋ lee yeŋ man keŋ bↄↄ gyae baa yeŋ bela ya. 53Nawolo nyi Wurubuarɛ waa besena wosenaane keŋ kɛɛ dale nɛ yɛɛ wosenaane keŋ ke bɛɛ dale ya. Na waa besena wosenaane keŋ kɛɛ yem nɛ yɛɛ wosenaane keŋ ke bɛɛ yem ya. 54Akpaa wosenaane keŋ kɛɛ dale nɛ da bese wosenaane keŋ ke bɛɛ dale ya, te wosenaane keŋ kɛɛ yem nɛ da bese wosenaane keŋ ke bɛɛ yem ya nɛ, kenaŋ na Wurubuarɛ nombia ŋan bↄↄ ŋmarase see nɛ te kↄŋ mena. Nombia ŋenaŋ yɛna nyiaa, "Da te yoo di yeŋ dↄↄ. Yeŋ be taŋ doŋ de dↄↄ bela ya." 55"Yeŋ, n doŋ keŋ n dana n ne di balaŋ dↄↄ nɛ doo aleŋ? Yeŋ, n doŋ keŋ n dana n na mo do balaŋ kayeyɛɛ nɛ doo aleŋ?" 56Yeŋ doŋ keŋ ↄ dana ↄ na do balaŋ kayeyɛɛ nɛ yɛna dukum, te mmaraa mↄ ne yele la dukum ne nyiŋ doŋ. 57Mↄna dɛɛ do Wurubuarɛ nↄↄ, nawolo nyi ŋon yele la te de tɛɛwↄ de Gbeŋgyoo Yesu Kristo dↄↄ di kpene kamasɛ dↄↄ. 58Mena dↄↄ me tebia kpaakpaa ɛ seŋ keŋkeŋ, ɛ na yeli kolo ke wosi ŋon ya. Te debaŋ kamasɛ na, ɛ mo ɛ wose pou do de Gbeŋgyoo Yesu tom keŋ man. Nawolo nyi ɛ gyeŋ nyi tom keŋ ɛ ne yɛɛ lee de Gbeŋgyoo Yesu doŋ dↄↄ nɛ be gyae ke yɛɛ yakaa ya.

will be added

X\