1 Me tebia, mↄↄ ne gyae ɛ ke kyaa keŋ nyi ɛ ba gyeŋ kolo lee Wurubuarɛ feliŋ abↄↄ anefaŋ ŋan wose man ya. 2 Ɛ gyeŋ nyi debaŋ keŋ ɛ doo wiase man keŋ ɛ te lɛɛ ta Wurubuarɛ di ya nɛ, ɛ yela ba beo ŋon gyu bɛɛneŋ gyaŋ. Bɛɛneŋ kɛwↄ mↄ bɛɛ fa nyeedoŋ ya. 3 Mena dↄↄ mɛɛ gyae ɛ ka gyeŋ nyi walaŋ ŋon Wurubuarɛ feliŋ doo ↄ man nɛ, ↄ be gyae waa tale yako mmusuo nombia gyakaa Yesu dↄↄ ya. Te ŋolo mↄ be kyaa waa tale yako nyi Yesu yɛna ↄ Gbeŋgyoo, keŋ nyi Wurubuarɛ feliŋ be doo ↄtenate man ya. 4 Wurubuarɛ feliŋ ŋon abↄↄ anefaŋ kyaa kpookpoo, mↄna ŋe popou lee Wurubuarɛ feliŋ dokoloŋ ŋonaŋ gyaŋ. 5 Wurubuarɛ ↄsom tomse kpookpoo kyaa, mↄna de Gbeŋgyoo dokoloŋ ŋonaŋ yaa dɛɛ yɛɛ fa. 6 Tomse kpookpoo mↄ kyaa, mↄna Wurubuarɛ dokoloŋ ŋonaŋ ne faa na ↄ balaŋ doŋ te bɛɛ mo yɛɛ ŋe popou. 7 Wurubuarɛ feliŋ ŋon ne faa na Kristo walaŋ kamasɛ doŋ daale dinↄↄ, na waa mo yɛɛ tom Kristotena dikpii keŋ man na ke de fa be popou. 8 Wurubuarɛ feliŋ ŋonaŋ ne fa ŋolo nyansa keŋ waa mo kolosi nombia, te ↄ ne fa ŋolo mↄ nombia kagyeŋ. 9 Mena Wurubuarɛ feliŋ dokoloŋ ŋonaŋ ne yele la ŋolo Wurubuarɛ kelɛɛdi ne yɛɛ doŋ, te ↄ ne fa ŋolo mↄ doŋ keŋ waa mo kyↄ kaweese. 10 Wurubuarɛ feliŋ ŋonaŋ ne faa na ŋolo doŋ keŋ waa mo yɛɛ gyakoloŋ nombia, te ↄ ne fa ŋolo mↄ doŋ keŋ waa mo kolosi Wurubuarɛ nombia. Ŋon ne yele la ŋolo ne tale gyeŋ nyi nombii daale lee Wurubuarɛ gyaŋ yaa ke ta lee Wurubuarɛ gyaŋ ya. Ŋon ne faa na ŋolo deise kpookpoo kekolosi, te ŋon ke ne faa na ŋolo mↄ deise kpookpoo man kalese. 11 Mena abↄↄ kɛŋa pou yɛɛ Wurubuarɛ feliŋ dokoloŋ ŋonaŋ tom ke, te ↄ ne fa walaŋ kamasɛ lee ŋon feliŋ ŋonaŋ gbagba kegyaebii man. 12 Deniwalaŋ wose yɛɛ dokoloŋ, mↄna ke dana yenaase kpookpoo burum. Doo nyi ke dana yenaase kpookpoo burum koraŋ nɛ, ŋe popou ne bom la yɛɛ deniwalaŋ wosenaane dokoloŋ. Mena ke te Kristo mↄ doo. 13 Daa Kristotena pou na Gyudatena na Girikitena na gbeŋa na baŋ be kyaa ba wose dↄↄ nɛ pou, Wurubuarɛ feliŋ dokoloŋ ŋonaŋ te ba moowↄ sↄ de popou Wurubuarɛ loŋ. Ŋon moona daa bom te de popou bese Kristo wosenaane dokoloŋ keŋ. Keŋte de nyiŋa feliŋ dokoloŋ ŋonaŋ, te ↄ ne yɛɛ tom de popou man. 14 Na yenaŋ dokoloŋ ne yɛɛ na deniwalaŋ wose keŋ pou ya, mↄna yenaase kpookpoo ŋan pou bom la yɛɛ wosenaane dokoloŋ. 15 Akpaa nae de yako nyi, "Ma te yɛɛ nyiŋmaa ya mena dↄↄ mↄↄ kpuɛ wosenaane keŋ man ya na," kei gyae ke tale lese nae keŋ lee wosenaane kenaŋ man? 16 Te akpaa deŋele de yako nyi, "Na maŋ yɛna sibii ya mena dↄↄ mↄↄ kpuɛ wosenaane keŋ man ya na," keŋ nawolo baa nyi kↄↄ kpuɛ wosenaane keŋ man yee? Kei gyae ke tale lese deŋele kenaŋ lee wosenaane man? 17 Nyi akpaa wosenaane keŋ pou deŋ yɛɛ sibii ke na, sena te wosenaane keŋ gyae ke yɛɛ na ke nyii kolo? Te akpaa wosenaane keŋ pou deŋ yɛɛ deŋele ke na, sena te wosenaane keŋ gyae ke yɛɛ na ke wↄŋ nyii? 18 Mↄ n kɛɛ na, Wurubuarɛ moo wosenaane kpookpoo ŋan pou bo bom yɛɛ wosenaane dokoloŋ, lee ŋon gbagba kegyaebii man. 19 Nyi wosenaane yenaase kpookpoo ŋan pou deŋ yɛɛ wosenaane yenaŋ dokoloŋ na, nafↄ ke gyae ke yɛɛ gyakoloŋ. 20 Mↄna ŋgba mena keŋ ke doo nɛ, wosenaane yenaase ŋan pou boe mↄna wosenaane keŋ pou yɛɛ dokoloŋ. 21 Sibii be gyae ke tale yako nyiŋmaa nyi, "N be dana tↄnↄↄ fa maŋ ya," te nyee mↄ be gyae ke tale yako nae nyi, "N be dana tↄnↄↄ fa maŋ ya." 22 Mↄna wosenaane yenaase ŋan dɛɛ kɛɛ nyi ŋe taŋ doŋ ya nɛ, nyi ŋↄↄ doo wosenaane man ya nɛ nafↄ wosenaane be gyae ke tale yɛɛ kolo ya. 23 Te wosenaane yenaŋ keŋ de bee bu ke ya nɛ, keŋ gba te dɛɛ ko da wose na ke. Wosenaane yenaŋ keŋ daa ne kɛɛ nyi ke bee hia nideli ya nɛ, keŋ gba te dɛɛ kɛɛ ke dↄↄ nideli. 24 Da wosenaane yenaase ŋan dɛɛ kɛɛ nyi ŋe dana kyeo nɛ, be doo nyi dɛɛ kɛɛ ŋe dↄↄ mena ya. Mↄna Wurubuarɛ ta mo wosenaane yenaase ŋan pou towaa, te ↄ moo obuo fa ŋan nafↄ ŋↄↄ taŋ obuo ya nɛ. 25 Ↄ yɛɛ ke mena na kekpase be nyiŋ doo wosenaane yenaase kpookpoo ŋan man ya, mↄna wosenaane yenaŋ kamasɛ dɛɛ kɛɛ ke dↄↄ dↄↄ nideli. 26 Akpaa de kↄŋ nyi wosenaane yenaŋ daale ne naa diyem na, akaŋ ŋan pou mↄ ne naa diyem kpu na ke. Mↄna akpaa de kↄŋ nyi wosenaane yenaŋ daale de nyiŋ yele na, ne yɛɛ yenaase akaŋ ŋan mↄ pou gyoŋ. 27 Nɛnɛɛ ɛ popou bom la yɛɛ Kristo wosenaane keŋ, te ɛ man walaŋ kamasɛ yɛɛ ↄ yenaŋ daale ke. 28 Kristotena dikpii keŋ man nɛ, Wurubuarɛ ta see dibiase ŋaale. Gyaŋgba nyibaŋ yɛna Kristo kpilala baŋ. Baŋ be gyakaa balate yɛna Wurubuarɛ akpeŋkpeŋgyↄↄra, te baŋ be gyakaa batoorote yɛna baŋ bɛɛ wola Wurubuarɛ nombia ŋan nɛ. Baale mↄ yɛna baŋ bɛɛ yɛɛ gyakoloŋ nombia, te baale mↄ yɛna baŋ bɛɛ kyↄ kaweese, te baale mↄ yɛna baŋ bɛɛ kyↄ be tebia. Baale mↄ yɛna siamantena baŋ bɛɛ kɛɛ nyi nombia ŋan pou bɛɛ yɛɛ nɛ ne gyu nideli. Te akaŋ baŋ yɛna baŋ bee kolosi deise kpookpoo nɛ. 29 N kɛɛ na, na be popou yɛna Kristo kpilala ya. Na be popou yɛna Wurubuarɛ akpeŋkpeŋgyↄↄra ya. Na be popou yɛna wolala ya. Na be popou ne yɛɛ na gyakoloŋ nombia ya. 30 Na be popou ne kyↄↄna kaweese ya. Na be popou ne kolosina deise kpookpoo ya. Na be popou mↄ na lesena deise kpookpoo man ya. 31 Mↄna ɛ yela ɛ sia keyase Wurubuarɛ abↄↄ anefaŋ dinaana ŋan ŋa kela kɛŋa nɛ dↄↄ. Nɛnɛɛ maa wola ŋon nombia kpaakpaa ŋan ŋa kela kɛŋa nɛ pou.
