1 Korintotena 11

1Ɛ kasee me dinↄↄ ŋgba mena keŋ maŋ mↄ ne kasee Kristo dinↄↄ nɛ. 2Mɛɛ kɛlɛɛ ŋon ŋgba mena keŋ ɛ ne tↄↄse maŋ ɛ nombia pou man, te ɛ dana me nombia ŋan mↄↄ wola ŋon man nideli nɛ. 3Mↄna mɛɛ gyae ɛ ka gyeŋ nyi baale kamasɛ nyee yɛna Kristo, te alo mↄ nyee yɛna ↄ baale te Kristo mↄ nyee yɛna Wurubuarɛ. 4Mena dↄↄ baale kamasɛ ŋon ↄ ne fane yaa ↄ ne kolosi Wurubuarɛ nombia balaŋ man, te ↄ mo kolo wu ↄ nyee na ↄ ta do ↄ nyee desɛŋ. 5Mena mↄ te alo kamasɛ ŋon ↄ ne fane yaa ↄ ne kolosi Wurubuarɛ nombia balaŋ man, te ↄ ta mo kolo wu ↄ nyee ya na ↄ ta do ↄ nyee desɛŋ. Na yɛɛ yaa ŋgba ↄ gbee ↄ nyee baa nɛ. 6Nyi akpaa alo bɛɛ gyae nyi waa mo kolo wu ↄ nyee ya na, kenaŋ na kaboena nyi waa tisi ↄ nyee. Te akpaa desɛŋ dana alo ŋon nyi waa tisi ↄ nyee yaa ↄ be tale gbee ↄ nyee ya nɛ, kenaŋ na kaboena nyi waa mo kolo wu ↄ nyee. 7Tekaboena nyi baale waa mo kolo wu ↄ nyee ya, nawolo nyi Wurubuarɛ yɛɛ baale bo ŋon gbagba dinↄↄ man na waa mo lese ŋon Wurubuarɛ gyoorobiiri wola. Mↄna alo dↄↄ ↄ na lese baale gyoorobiiri bo wola. 8Nawolo nyi na baale te Wurubuarɛ lesewↄ lee alo man ya, mↄna alo te ↄ lesewↄ lee baale man. 9Na alo dↄↄ te Wurubuarɛ yɛɛ baale ya, mↄna baale dↄↄ te Wurubuarɛ yɛɛ alo. 10Nombia kɛŋa na Wurubuarɛ kpilala baŋ mↄ dↄↄ nɛ, kaboena nyi alo waa mo kolo wu ↄ nyee na ka wola nyi ↄ doe ↄ baale tɛɛ. 11De Gbeŋgyoo Yesu siaman na alo be kyaa ↄ wose dↄↄ ya, te baale mↄ be kyaa ↄ wose dↄↄ ya. Be popou kyaa bo fa dↄŋa. 12Nawolo nyi ŋgba mena keŋ alo ba lee baale man nɛ, mena mↄ te alo na lolana baale. Te kpene kamasɛ mↄ na lee bo Wurubuarɛ gyaŋ. 13Ɛmɛɛ gbagba ɛ gyoo nombia kɛŋa man kɛɛ. Dei nyi alo waa fane fa Wurubuarɛ keŋ nyi ↄ na mo kolo wu ↄ nyee yee? 14Daa gbagba de nombia ayɛɛsa bɛɛ wola daa nyi akpaa baale de tina ↄ nyeenyↄↄse yela te da gyoo kusuu na, ke yɛɛ desɛŋ ke yee? 15Mↄna akpaa alo dana nyeenyↄↄse burum na, ne yeli ↄ ne yɛɛ kyeo. Nawolo nyi Wurubuarɛ faa e nyeenyↄↄse dↄↄloŋ bo nyi ŋe dee wu ↄ nyee. 16Akpaa ŋolo ne gyae waa lɛɛ nombia kɛŋa aŋmaareŋ na, daa na Kristotena akaŋ baŋ pou nombia ayɛɛsa bɛɛ wolo nyi dɛɛ lɛɛ nombia kɛŋa aŋmaareŋ ya. 17Nɛnɛɛ lee nombia ŋan mɛɛ gyae maa kolosi fa ŋon debokeiman nɛ dↄↄ, mↄↄ ne kɛlɛɛ ŋon ya. Nawolo nyi ɛ gyaŋee ɛ ka som na, bɛɛ mo kolo kpaakpaa kↄŋ ya. Na bese wↄlɛɛ abↄↄ bo kpu. 18Nombii gyaŋgbate yɛna nyi, mee nyii nyi ɛmɛɛ Kristotena dikpii keŋ de gyaŋee na ɛ ne kpase kpookpoo, te mɛɛ lɛɛ nombia kɛŋa ŋaale di. 19Nawolo nyi kaboena nyi kekpase kpookpoo kei dɛɛ kↄŋ ɛ man, na ke nyiŋ lese baŋ be gbɛɛneŋ tenɛɛ Wurubuarɛ siaman nɛ wola. 20Ɛ kyaa gyaŋee ɛ ke di na, te yɛɛ de Gbeŋgyoo weenɛɛ te ɛ ne dii ya. 21Nawolo nyi ɛ gyaŋee ɛ ke di nɛ, walaŋ kamasɛ ne di ↄ wui weenɛɛ bo keŋ ɛ bɛɛ kyaa daa dↄŋa ya. Tanam na ko baale, te baale mↄ ne dii baa dɛɛse. 22Ɛ ne yako baa nyi ɛmɛɛ gbagba be dana akpaŋalaŋse ŋan man ɛ ke di na ɛ ke nyↄↄ yee? Yaa ɛ ne gyae ɛ ke fulu Kristotena dikpii keŋ, na ɛ ka do balaŋ baŋ bↄↄ dana kolo ya nɛ desɛŋ? Woŋ nombia yaa ɛ ne gyae maa yako ŋon baa? Ɛ ne gyae nyi maa kɛlɛɛ ŋon? Koa, kɛŋa man dↄↄ mↄↄ gyae maa kɛlɛɛ ŋon ya. 23Nawolo nyi kpene keŋ mↄↄ kasee lee de Gbeŋgyoo Yesu gyaŋ nɛ, keŋ yaa maŋ mↄ moowↄ mɛɛ wola ŋon nɛ. Nelim keŋ baa lese de Gbeŋgyoo Yesu fa nɛ ↄ moo bodobodo, 24te ↄ kefane fa Wurubuarɛ karaŋ taŋ nɛ ↄ kɛrɛɛ ke te ↄ yakowↄ nyiaa, "Kei yɛna ma wosenaane keŋ Wurubuarɛ ba mo fa ŋon nɛ. Ɛ kyaa yɛɛ kei na ɛ ka mo tↄↄse maŋ." 25Mena mↄ te be ke di weenɛɛ ŋan taŋ nɛ, ↄ moo leenↄↄ na soloŋ keŋ te ↄ yakowↄ nyiaa, "Kei yɛna me fatabo keŋ Wurubuarɛ ba mo yɛɛ nↄↄkebakesee wↄle. Ɛ kyaa yɛɛ kei debaŋ kamasɛ keŋ ɛ ke nyↄↄ ke nɛ, na ɛ ka mo tↄↄse maŋ." 26Kei nawolo nyi debaŋ kamasɛ keŋ ɛ ke di bodobodo kei na ɛ ke nyↄↄ lee leenↄↄ kei man na, ɛ ne di de Gbeŋgyoo yeŋ keŋ adansɛɛ baa kelii wee keŋ waa bese kↄŋ. 27Mena dↄↄ walaŋ kamasɛ ŋon ↄ ta mo gbɛɛ kpaakpaa di bodobodo kei, na waa nyↄↄ lee de Gbeŋgyoo leenↄↄ kei man ya nɛ, na ↄtenate te yɛɛ dukum baa. Nawolo nyi ↄ te bu de Gbeŋgyoo wosenaane na ↄ fatabo keŋ ya. 28Mena dↄↄ kaboena nyi walaŋ kamasɛ waa gyoo ↄ wose man nideli, pɛna waa di bodobodo kei na waa nyↄↄ lee de Gbeŋgyoo leenↄↄ kei man. 29Nawolo nyi walaŋ kamasɛ ŋon ↄ dii te ↄ nyↄↄ, te ↄ te lɛɛ do nyi de Gbeŋgyoo Yesu wosenaane na ↄ fatabo kenaŋ ya nɛ, na ↄtenate falaa ↄ wose baa. 30Lee mena dↄↄ te ɛ man balaŋ burum baale wose yↄkↄsewↄ, te baale mↄ gyoo kaweese te baale mↄ yekeewↄ nɛ. 31Mↄna nyi akpaa da gyoo da wose man nideli pɛte de di de Gbeŋgyoo weenɛɛ ŋan na, Wurubuarɛ be gyae waa bu daa fↄↄ ya. 32Akpaa de Gbeŋgyoo de bu daa fↄↄ na ↄ ne wↄŋ da deŋele bo, na bↄↄ nyiŋ wↄlɛɛ daa kpu na tɛɛle kei dↄↄ balaŋ akaŋ baŋ ya. 33Mena dↄↄ me tebia, akpaa ɛ kↄŋ kaa gyaŋee ɛ ke di na ɛ kyaa daa dↄŋa. 34Mↄna akpaa nyi tanam na ko ŋolo na waa di lee ↄ dɛɛ pɛna waa kↄŋ, na ɛ kↄŋ kaa gyaŋee na bↄↄ nyiŋ bu ŋolo fↄↄ ya. Nyi akpaa me kↄŋ na, maa kaa wola ŋon nombia akaŋ ŋan man kpu.

will be added

X\