1 Korintotena 10

1Me tebia, mɛɛ gyae ɛ ke tↄↄse kpene keŋ be tuŋ de naanaↄ baŋ bↄↄ sila Mosesi nɛ. Wurubuarɛ moo ↄ debuŋta wuu wↄ, te ↄ yela ba gyoowↄ ɛpo yayam keŋ man lee. 2Wurubuarɛ ka mo ↄ debuŋta keŋ wuu wↄ, na ↄ ke yela be ka gyoo ɛpo yayam keŋ man lee nɛ, nawolo baa nyi be sↄↄ wↄ Wurubuarɛ loŋ baa te ba bese Mosesi silala. 3Be popou dii weenɛɛ ŋan ba lee Wurubuarɛ gyaŋ kaa yala nɛ, 4te be popou nyↄↄ loŋ keŋ Wurubuarɛ be yeli kↄↄ lee boe keŋ man nɛ. Mena boe kenaŋ yɛna Kristo gbagba, ŋon na ↄ kpuɛ na wↄ ba keta man nɛ. 5Mↄna be man balaŋ burum nombia ta gyoo Wurubuarɛ sia ya, mena dↄↄ ba yekeewↄ leki depampaa dinaa keŋ man. 6Be nombia kɛŋa pou yɛɛ kpene keŋ dɛɛ kɛɛ na dɛɛ kasee, na dↄↄ yɛɛ nombiakumɛɛ ŋgba baŋ nɛ ya. 7Ɛ na som bɛɛneŋ ŋgba mena keŋ be man baale be yɛɛ nɛ ya. Wurubuarɛ nombia aŋmaraseŋ see yakowↄ nyiaa, "Balaŋ baŋ tisiwↄ kyakee na bee dii na bɛɛ nyↄↄ, te ba korowↄ bɛɛ yɛɛ nombia nkaraŋkaraŋ." 8Mena dↄↄ ɛ na yɛɛ kafoŋ ŋgba mena keŋ bↄↄ yɛɛ kafoŋ nombia, te be man balaŋ kakpoŋse saobatooro (23,000) ba yem wee dokoloŋ nɛ ya. 9Tekaboena nyi dɛɛ teese Wurubuarɛ nↄↄman, ŋgba mena keŋ be man baale be yɛɛ te ↄ be yeli doma be kaa koe wↄ nɛ ya. 10Tekaboena nyi dɛɛ toroŋ ŋgba mena keŋ be man baale ba toroŋ, te Wurubuarɛ be yeli ↄ kpilale ŋon ↄ na koe balaŋ nɛ be kaa koe wↄ nɛ ya. 11Mena nombia kɛŋa pou kↄŋae be dↄↄ na balaŋ ka mo kasee kolo. Te be ŋmarase ŋa bo see na baa mo faree daa, nawolo nyi de kyaa debaŋ keŋ tɛɛle kei ne gyu kↄ ↄto nɛ man. 12Mena dↄↄ nyaŋ walaŋ ŋon ne yɛɛ neŋ nyi n seŋɛɛ keŋkeŋ nɛ, kɛɛ n wose nideli keŋ nyi n ba lee yala ya. 13Kekɛɛsekɛɛ daale te kↄŋa ta ɛ dↄↄ, keŋ nyi ke dinↄↄ te kↄŋa ta ŋolo dↄↄ see ya. Mↄna Wurubuarɛ ne di ↄ nombia dↄↄ, mena dↄↄ ↄ be gyae waa yela kekɛɛsekɛɛ keŋ kela ŋon nɛ kekↄŋ ɛ dↄↄ ya. Te akpaa nyi kekɛɛsekɛɛ de kↄŋ ɛ dↄↄ na, waa wola ŋon gbɛɛ keŋ ɛ ka mo seŋ keŋkeŋ na ɛ ke tale di ke dↄↄ. 14Mena dↄↄ me gyoona kpaakpaa, ɛ lese ɛ wose lee bɛɛneŋ ↄsom man. 15Mee kolosi baa fa ɛmɛɛ nyansatena. Ɛmɛɛ gbagba ɛ gyoo me nombia ŋan man na ɛ ke kɛɛ kpene keŋ mɛɛ yako nɛ. 16Debaŋ keŋ dee di de Gbeŋgyoo weenɛɛ ŋan ↄ kpa dee di na dɛɛ mo tↄↄse e nɛ, leenↄↄ keŋ dɛɛ sola Wurubuarɛ wosefɛɛreŋ gyakaa ke dↄↄ pɛte dɛɛ nyↄↄ lee ke man nɛ, nawolo baa nyi daa na Kristo te yɛɛ dokoloŋ lee ↄ fatabo keŋ dↄↄ. Mena mↄ te bodobodo keŋ dɛɛ kpɛlɛɛ fa dↄŋa nɛ, nawolo baa nyi daa na Kristo te yɛɛ dokoloŋ lee ↄ wosenaane man. 17Bodobodo dokoloŋ te dɛɛ mo kpala fa dↄŋa, mena dↄↄ daa balaŋ burum baŋ pou ta bese walaŋ dokoloŋ. Nawolo nyi bodobodo dokoloŋ kenaŋ te de popou diiwↄ. 18Ɛ mo kɛɛ Iseraetena. Balaŋ baŋ bee di weenɛɛ ŋan bↄↄ mo deesi fa Wurubuarɛ nɛ, baŋ na Wurubuarɛ na bese na walaŋ dokoloŋ. 19Mena dↄↄ sena yaa me nombia kɛŋa na wolo baa? Bane yɛɛ kolo ke, yaa weenɛɛ ŋan bɛɛ mo deesi fa bane nɛ yɛna kolo? 20Koa, kpene keŋ mɛɛ wolo yɛna nyiaa, weenɛɛ ŋan bane somra na mo deesi fa banɛɛ nɛ, te yɛɛ nyi Wurubuarɛ te bɛɛ mo deesi fa ya. Feliŋkumɛɛ te bee deesi fa, mena dↄↄ mↄↄ ne gyae nyi ɛmɛɛ na feliŋkumɛɛ ke yɛɛ dokoloŋ ya. 21Ɛ be gyae ɛ ke tale mo de Gbeŋgyoo Kristo leenↄↄ nyↄↄ, na ɛ ka bese mo feliŋkumɛɛ mↄ leenↄↄ nyↄↄ ya. Te be gyae ke de nyi ɛ ke di de Gbeŋgyoo Kristo nyefale man, na ɛ ka bese ke di feliŋkumɛɛ mↄ nyefale man ya. 22Dɛɛ gyae baa nyi de Gbeŋgyoo Wurubuarɛ ka gyeŋ baŋ? Yaa dɛɛ kɛɛ da wose baa nyi de dana doŋ kela e? 23"Gbɛɛ doo nyi dɛɛ yɛɛ kpene kamasɛ" mↄna na ŋe popou danaana tↄnↄↄ ya. "Gbɛɛ doo nyi dɛɛ yɛɛ kpene kamasɛ" mↄna na ŋe popou ne gyae la ke yela dɛɛ bee ya. 24Ŋolo na gyae ŋon gbagba wui deeli ya, mↄna waa gyae ↄ tebia wui deeli bo. 25Naane kamasɛ keŋ bɛɛ yↄↄ kebu man nɛ ɛ ke tale lɛɛ di, mↄna na bↄↄse naane keŋ dalee na ke yela ŋolo konↄↄ man nombia ke yↄkↄse e ya. 26Nawolo nyi Wurubuarɛ nombia aŋmaraseŋ see ne yako nyiaa "Tɛɛle kei na kpene kamasɛ keŋ doo ke man nɛ pou, yɛɛ de Gbeŋgyoo Wurubuarɛ wui." 27Akpaa walaŋ ŋon ↄ te yɛɛ Kristo baale e ya de baake ŋon nyi ɛ kaa di, te ke yɛɛ keŋ ɛ ke di na, ɛ gyu ke di mↄna ɛ na bↄↄse weenɛɛ ŋan dalee na ŋolo konↄↄ man nombia ke yↄkↄse e ya. 28Mↄna akpaa ŋolo de yako ŋon nyi, "Weenɛɛ kɛŋa yɛɛ bane dɛɛ weenɛɛ ŋa na," lee walaŋ ŋon ↄ be yako ŋon nɛ, na balaŋ akaŋ baŋ konↄↄ man nombia dↄↄ ɛ na di ŋa ya. 29Na ɛmɛɛ gbagba konↄↄ man nombia dↄↄ ya, mↄna walaŋ ŋon ↄ be yako ŋon nɛ konↄↄ man nombia dↄↄ. Nawolo nyi ŋolo konↄↄ man nombia be gyae ke tale tↄ maŋ gbɛɛ, nyi me na yɛɛ kpene keŋ me dana gbɛɛ nyi maa yɛɛ nɛ ya. 30Mↄna akpaa me fane fa Wurubuarɛ karaŋ te me di weenɛɛ kɛŋa na, woŋ dↄↄ te ŋolo waa bu maŋ fↄↄ lee weenɛɛ kɛŋa kedi dↄↄ? 31Mena dↄↄ kpene kamasɛ keŋ ɛ ne dii yaa ɛ ne nyↄↄ, yaa kpene kamasɛ keŋ ɛ ne yɛɛ na, ɛ yɛɛ ŋe popou mo lese Wurubuarɛ yele. 32Ɛ na yeli ɛ nombia ayɛɛsa ke tↄ Gyuda baale, yaa Giriki baale yaa Kristo walaŋ kamasɛ gbɛɛ ya. 33Mena mↄ te mɛɛ yɛɛ kakyeŋ maa yɛɛ kpene kamasɛ, na ka gyoo walaŋ kamasɛ sia lee gbɛɛ kamasɛ man. Nawolo nyi mↄↄ ne gyae maŋ gbagba me deeli ya, mↄna balaŋ pou deeli te mɛɛ gyae, na de Gbeŋgyoo Yesu Kristo ke nyiŋ lɛɛ ba nyee.

will be added

X\