1 Korintotena 1

1Tↄne kei lee maŋ Pↄↄl ŋon Wurubuarɛ be baake lee ↄ kegyaebii man nyi me kaa yɛɛ ↄ kpilale nɛ, na de dↄↄ Sositene gyaŋ. 2Dɛɛ ŋmarase ke dee yelee ɛmɛɛ Kristotena dikpii keŋ ɛ kyaa Korinto donↄↄ man, na baŋ pou be kyaa yenaŋ kamasɛ te bɛɛ som de Gbeŋgyoo Yesu Kristo ŋon ↄ yɛɛ daa na wↄ pou Gbeŋgyoo e nɛ. Wurubuarɛ te tɛɛ Kristo Yesu dↄↄ baake ŋon te ↄ gberaa ayimɛɛ lee ɛ wose man te ↄ desina ŋon see fa ↄ wose. 3De kya Wurubuarɛ na de Gbeŋgyoo Yesu Kristo baa mo be bɛrɛɛ boele ŋon, na baa fa ŋon wosefɛɛreŋ. 4Debaŋ kamasɛ keŋ mɛɛ fane na, mɛɛ fa Wurubuarɛ karaŋ lee mena keŋ ↄ be tɛɛ de Gbeŋgyoo Kristo Yesu dↄↄ mo ↄ bɛrɛɛ boele ŋon nɛ dↄↄ. 5Lee mena keŋ ɛmɛɛ na Kristo be yɛɛ nↄↄdokoloŋ dↄↄ, Wurubuarɛ te hiraa ŋon gbɛɛ kamasɛ man. Ↄ te yeli ɛ ta gyeŋ kekolosi te ɛ nyiŋa nyansa mↄ kpu. 6Nawolo nyi Kristo nombia ŋan dee kolosi te ɛ be nyii nɛ, ta gyoo ɛ man nideli. 7Mena dↄↄ debaŋ kei keŋ ɛ kyaa ɛ ne daa de Gbeŋgyoo Yesu kabese kↄŋ na sibiiyam nɛ, Wurubuarɛ feliŋ kolo anefaŋ daale be kyaa keŋ ɛ te nyiŋa ta ya. 8Ŋon gbagba waa yela ɛ ka seŋ keŋkeŋ kelii ↄto, keŋ nyi nombiikum kamasɛ be gyae ke doo ɛ man ya kelii wee keŋ de Gbeŋgyoo Yesu Kristo waa bese kↄŋ. 9Wurubuarɛ ŋon ↄ bɛɛ lee ↄ nombia wↄle ya nɛ baake na ŋon nyi ɛ kaa yɛɛ nↄↄdokoloŋ na ↄ bu Yesu Kristo ŋon ↄ yɛɛ de Gbeŋgyoo e nɛ. 10Me tebia Kristotena, me ta mo de Gbeŋgyoo Yesu Kristo yele mee doo ŋon teree nyiaa, ɛ popou ɛ yako nombii sɛɛ dↄŋa na kekpase be kↄŋ ɛ man ya. Ɛ yɛɛ nↄↄdokoloŋ lee ɛ nyeeman nombia na ɛ kekolosi pou man. 11Me tebia, balaŋ baale ta lee Koloe dekpaŋalaŋ man kaa yako maŋ nyi kale doo ya nsana. 12Nombii keŋ doo yɛna nyi ɛ be dana nↄↄdokoloŋ ya. Nawolo nyi ɛ man baale kpa, "Be silana Pↄↄl bo," te baale mↄ kpa, "Be silana Apolo bo," te baale mↄ kpa, "Be silana Pita bo." Mena mↄ te baale mↄ kpa, "Kristo te be silana." 13Mɛɛ bↄↄse ŋon baa nyiaa, dɛɛ tale kpase Kristo? Pↄↄl te be gyↄↄwↄ sakaa ↄpaŋdaŋ dↄↄ fa ŋon? Yaa maŋ Pↄↄl yele maŋ te be sↄↄ ŋon Wurubuarɛ loŋ? 14Mɛɛ do Wurubuarɛ nↄↄ nyi lee Krispuse na Gayose wↄle na, ma te sↄ ŋolo Wurubuarɛ loŋ ya. 15Lee mena dↄↄ ŋolo be tale yako nyi, be sↄↄ e Wurubuarɛ loŋ bo lee ma yele man ya. 16Mɛɛ tↄↄse mↄ nyi me sↄↄ Setefanase na ↄ dekpaŋalaŋmantena Wurubuarɛ loŋ. Lee kɛwↄ wↄle na, mↄↄ ne tↄↄse nyi me sↄↄ ŋolo Wurubuarɛ loŋ bela ya. 17Nawolo nyi Kristo te kpila maŋ nyi me kaa sↄ balaŋ Wurubuarɛ loŋ ya. Mↄna ↄ kpila maŋ bo nyi me kaa kolosi ↄ nombia kpaakpaa ŋan. Me ta mo denibalaŋ nyansa kolosi nombia kpaakpaa ŋenaŋ ya. Nyi meŋ moo denibalaŋ nyansa kolosi nombia kpaakpaa ŋenaŋ nɛ, nafↄ Kristo yeŋ keŋ ↄ ba yem ↄpaŋdaŋ dↄↄ nɛ wose man nombia be gyae ke yɛɛ nↄↄdoŋ ya. 18Kristo ↄpaŋdaŋ dↄↄ yeŋ keŋ nombia yɛɛ diyiŋ nombia ŋa fa balaŋ baŋ bɛɛ yoo Wurubuarɛ gbɛɛ man nɛ, mↄna daa baŋ Wurubuarɛ ne lɛɛ da nyee nɛ dↄↄ ŋe yɛɛ Wurubuarɛ doŋ ke fa daa. 19Nawolo nyi Wurubuarɛ nombia aŋmaraseŋ see ŋan ne yako nyiaa, "Maa yela nyansatena baŋ nyansa ke yɛɛ yakaa, na maa yela baŋ be sia be kare nɛ, mↄ sia kekara keŋ ke yɛɛ yakaa." 20Nyi akpaa nnɛ te doo na, kenaŋ na tɛɛle kei dↄↄ nyansatena na tↄne gyeŋara na nombia gyeŋara baŋ daseŋae yɛna aleŋ Wurubuarɛ siaman? Wurubuarɛ ta lese wola nyi tɛɛle kei dↄↄ nyansa yɛɛ diyiŋ nombia ŋa ↄ siaman. 21Nawolo nyi Wurubuarɛ nyansa man na, ↄ yɛɛ ke nyi balaŋ be gyae baa tale mo baŋ gbagba be nyansa gyeŋ e ya. Mena dↄↄ ke yɛɛ Wurubuarɛ kegyaebii nyi waa ta na nombia kpaakpaa ŋan dee kolosi te balaŋ kpa ŋe yɛɛ diyiŋ nombia ŋa nɛ dↄↄ lɛɛ balaŋ baŋ baa lɛɛ ŋa di nɛ nyee. 22Gyudatena ne gyae gyakoloŋ nombia bo baa naa, te Girikitena mↄ ne gyae nyansa nombia bo baa nyii. 23Mↄna daa ne kolosi Kristo ŋon bↄↄ gyↄ e sakaa ↄpaŋdaŋ dↄↄ nɛ wose man nombia bo. Mena nombia ŋenaŋ yɛɛ baŋ nombia ŋa fa Gyudatena, te ŋe yɛɛ diyiŋ nombia ŋa fa balaŋ baŋ ba te yɛɛ Gyudatenawↄ ya nɛ. 24Te balaŋ baŋ pou Wurubuarɛ be baake nɛ dↄↄ, be yɛɛ Gyudatenawↄ o, yaa ba te yɛɛ Gyudatenawↄ ya nɛ, Kristo yɛna Wurubuarɛ doŋ na ↄ nyansa fa wↄ. 25Nawolo nyi Wurubuarɛ nyansa keŋ deniwalaŋ bee bu ke ya nɛ, keŋ kela na deniwalaŋ nyansa, te ↄ doŋ keŋ deniwalaŋ bee bu ke ya nɛ, keŋ kela na deniwalaŋ doŋ. 26Me tebia, ɛ tↄↄse mena keŋ ɛ doo pɛte Wurubuarɛ be baake ŋon nɛ. Nawolo nyi debaŋ kenaŋ na, na ɛ popou yɛna siakaralatena balaŋ siaman ya, te na ɛ popou mↄ yɛna balaŋ dinaana balaŋ siaman ya, te na ɛ popou mↄ yɛna gyoorobia ya. 27Mↄna balaŋ baŋ tɛɛle kei dↄↄ balaŋ ne kɛɛ wↄ nyi be yɛɛ ayiŋtenawↄ nɛ, baŋ te Wurubuarɛ lesewↄ te ↄ moo wↄ do siakaralatena desɛŋ. Mena mↄ te balaŋ baŋ tɛɛle kei dↄↄ balaŋ ne kɛɛ wↄ nyi bↄↄ dana doŋ ya nɛ, baŋ te Wurubuarɛ lesewↄ te ↄ moo wↄ do baŋ be dana doŋ nɛ desɛŋ. 28Balaŋ baŋ tɛɛle kei dↄↄ balaŋ ne kɛɛ wↄ nyi ba tekaboena ya, yaa bↄↄ taŋ tↄnↄↄ ya, te bↄↄ ne kala wↄ mↄ do kolo man ya nɛ, baŋ te Wurubuarɛ lesewↄ. Ↄ te yɛɛ mena yela balaŋ baŋ tɛɛle kei dↄↄ balaŋ ne bu wↄ nyi baŋ yɛna balaŋ nɛ, te yɛɛ yakaa. 29Ↄ yɛɛwↄ mena na ka wola nyi, ŋolo be tale gyina ↄ wose adido Wurubuarɛ siaman ya. 30Nawolo nyi ŋon Wurubuarɛ yele la te daa na Kristo Yesu yɛɛ dokoloŋ. Te de nyansa pou lee ŋon Kristo gyaŋ. Ŋon yele la te de gbɛɛneŋ teneewↄ Wurubuarɛ siaman, te da bese balaŋ baŋ ↄ be tↄ da nyeeman kom te ↄ gberaa da ayimɛɛ pou lee da wose man. 31Mena dↄↄ ŋgba mena keŋ Wurubuarɛ nombia aŋmaraseŋ see ne yako nɛ nyiaa, "Nyaŋ walaŋ ŋon nyaŋ ke gyↄ n konↄↄ lee kolo dↄↄ na, kaboena nyi nya gyↄ n konↄↄ lee kpene keŋ Wurubuarɛ be yɛɛ fa neŋ nɛ dↄↄ."

will be added

X\