Markus 14

1Rongalo rai ina hawe Alo Posusa Pasa hai Posusa Roti au Bara Raragii. I tempo iti, kapala-kapala tadulako menomba hai guru agama tanganda mohaoki rara mohaka ngkandii Yesu bona rapapate. 2Rauli: "Agayana inee hampai tahaka i tempo alo mahile, bona dati ara pohiho i olonda tauna bosa." 3I tempona Yesu maida i boea Betania, laomi i souna hadua tauna au rahanga Simo, au hangkoya ketangga. TangaNa maande inditi, hawemi hadua towawine moanti hambua botolo buke lana wongi au masuli mpuu holona, au rababehi hangko i uaka kau au mawongi. Towawine iti mopengkami botolo iti nabumbuha lana iti i waana Yesu tanda pebilana. 4Arahe bahangkia tauna inditi au rumpu moita apa au nababehi towawine iti. Mololitamohe, rauli hadua hai hadua: "Moapari pane lana au masuli iti ratende mbero pea? 5Ane rapana lana wongi iti rapobalu, holona labi talu atuna doi pera. Aginami rapobalu bona holona raweihe tauna au meahi-ahi." Ido hai rumpuhe i towawine iti. 6Nauliangaahe Yesu: "Pogiangaa peamide. Moapari hai nipakasusa laluna towawine iti? Apa au nababehi Iriko, maroa. 7Lawi tauna au meahi-ahi, ara mpaliliuhe irikamu. Ane niunde motulungihe, arato katepakami. Agayana Iko, baraNa ara liliu irikamu. 8Towawine iti mobabehi apa au nabuku nababehi. NabumbuhiaNa lana wongi bona mopasilolonga ami wataNgku i karatawuNgku. 9Bona niisa: i humalele dunia, iumba pea Ngkora Marasa rabambari, apa au nababehi towawine iti batena tekabelai, bara naliu inaonda." 10I tempo iti, hadua hangko i topeguruNa au hampulo hai rodua, au rahanga Yudasi Iskariot, lao i kapala-kapala tadulako menomba, mouliangaahe tunggaiana mampobalu Yesu irihira. 11Matanamohe mohadi tunggaiana iti, hai radandia rawei doi. Hangko inditi, Yudasi mohaoki katepaka au maroa mohuhu Yesu irihira bona rahaka. 12I alo pepongkaana Posusa Roti au Bara Raragii i tempona dimba Pasa rasambale, topeguruna Yesu mekune Iria: "Pue, iumba peundeaMu kipasilolonga paande Pasa au ina taande?" 13Mewali natudumi Yesu rodua topeguruNa, Nauliangaahe: "Laomokau i lalu kota. Inditi ina nipohidupaa hadua tobalilo au moanti pantambuana au moihi owai. Peulamide iria. 14Ane mesuakau i lalu sou, niuliangaa ampu sou iti: 'Nauli Guru: iumba paandeaKu Posusa Pasa hihimbela hai topeguruNgku?' 15Ampu sou iti ina motudungiaakau hambua lincu mahile au i wongko. Lincu iti tepasilolonga amimi, handami parewana. Inditi ina nipasilolongaake paande Pasa." 16Lao mpuumohe topeguruNa au rodua iti mesua i lalu kota. Kahawenda inditi, ope-ope mewali nodo au nauliangaahe Yesu, hai mopasilolongamohe paande Pasa. 17Kaindina, hawemi Yesu hihimbela hai topeguruNa au hampulo hai rodua i lincu au rapasilolongami inona. 18Tanganda mohuda, nauli Yesu: "Tou mpuu lolitaNgku ide: hadua hangko irikamu au maande sambela hai ikita ide-ide, ina mampobaluNa i iwaliNgku." 19Karahadina topeguruNa lolitaNa, mapari lalunda, hai mekunemohe hadua-hadua i Yesu, rauli: "Bara pae iko au Nutunggai Pue?" 20Nahanai Yesu: "Au mampobaluNa, iami hadua hangko irikamu au hampulo hai rodua ide au moeme sambela roti hai Iko i hambua tabo. 21Tou mpuu, Iko Ana Manusia batena mateNa nodo au tepakanoto i lalu Sura Malelaha. Agayana rumihi kamarugina tauna au mampobaluNa. Aginami tauna iti, ineemi rapoanaka." 22Tanganda maande, naalami Yesu roti hai mekakae i Pue Ala. Roo indo, Nabise-bisemi roti iti hai Nakira-kiraahe, Nauli: "Nialami, hai niande. Idemi wataNgku." 23Roo indo, Naala worimi hambua paenua anggoro, mekakae i Pue Ala, hai Nahuhuahe. Ope-opemohe maenu hangko i paenua anggoro iti. 24I tempo iti, Yesu mouliangaahe: "Idemi waheNgku au tebumbuha i kapateNgku bona mohuru salanda tauna bosa. WaheNgku ide mopakaroho dandina Pue Ala au mopahintuwu Pue Ala hai manusia. 25Bona niisa: mepongka ide-ide, barapi Kuenu anggoro duuna maenuna anggoro au wou hihimbela hai ikamu i lalu poparentana UmaNgku" 26Roo indo, monanihe hampaka nani petoya. Karoonda monani, padumohe hangko i kota lao i Bulu Saitun. 27Hangko inditi Yesu mouliangaahe topeguruNa: "Ikamu ope-ope ina mopalehiNa, lawi ara teuki i lalu Ngkorana Pue Ala node: 'Ina Kupapate toporewu iti, alanda dimbana mahawu.' 28Agayana i katuwoNgku hule, ina moiyoruNa lao i tampo Galilea, hai Kupegiakau indolou." 29Nauli Peturu: "Kehapiri ope-ope tauna mopalehiKo Pue, agayana iko bara!" 30Nauli Yesu: "Tou mpuu au Kuuliangaako: hangko damani motuturua manu i karombelana deade kaindi, talumi belana ina nusapuakaNa." 31Agayana hambela mani napakaroho Peturu lolitana, nauli: "Kehapirina mate hihimbela hai Oyo, bara mpuu ina kusapuaka kakuisaMu!" Nodo wori pololitanda topeguruNa au ntanina. 32Roo indo, hawemohe i bonde au rahanga Getsemani. Inditi Yesu mouliangaahe topeguruNa: "Ikamu, mohudamokau inde. Iko, laoNa hampai mekakae." 33Agayana Peturu, Yakobu hai Yohane Nawawahamohe lao Iria. I tempo iti, mapari Nahadi hai moradami laluNa. 34Nauliangaahe: "Mapari mpuu laluNgku, nodoNa ina mate Kuhadi. Indemokau hampai hai mainga-ingamokau. Ineekau leta!" 35Roo indo, lao karao haodi, molingkudu motumpa mekakae. I lalu pekakaeNa, merapi bona ane peisa bara molambi kapari iti, 36Nauli: "UmaNgku! Bara ara au bara Nubuku Nubabehi. Nupakaraoa wongkoya kapari au ina morumpaNa ide. Agayana bara peundeaKu au Kuula, peundeaMuri Uma." 37Roo indo, lao mbulimi i topeguruNa au talu, Nahumbahe tanganda leta. Nauli i Peturu: "Simo! Ba letakau pae? Mogalori hajaa pea bara nibuku mojaga-jaga? 38Mainga-ingamokau hai mekakaemokau, bona datikau narumpa pekelo. I lalumi niunde mpuu mobabehi au manoto, agayana bara nibuku lawi watami batena malede." 39Hangko inditi, lao mbulimi mekakae. PekakaeNa iti himbela hai pekakaeNa au nguru-nguruna. 40Roo indo, mesule mbulimi mampombelambia topeguruNa, hai leta mbulihe anti kamaleluenda. Barahe moisa apa au hangangaa rauli Iria. 41Lao mbulimi Yesu mekakae i kataluna belana, hai roo indo, mai mbulimi i topeguruNa, Nauliangaahe: "Maturu hai leta manikau pae? Handami! Hawemi tempona Iko Ana Manusia rapobalu hai rahuhu i tauna au kadake. 42Mearomokau! Laomoke! Peita, oloumi mai tauna au mampobaluNa." 43Tangana mani Yesu mololita, hawemi Yudasi, hadua hangko i topeguruNa au hampulo hai rodua, hihimbela hai bosa tauna au moanti piho hai pewombe. Tauna iti rapohawaahe kapala-kapala tadulako menomba, guru agama hai totosaenda to Yahudi bona laohe mohaka Yesu. 44Yudasi mouliangaa amimohe tanda bona raisa kaumbana Yesu, nauli: "Hema au kuangki, iami Yesu. Hakami, nianti, hai nikampai ntepuu." 45Mewali, kahawenda inditi, laomi Yudasi mampohidupaa Yesu, nauli: "Guru!" hai naangki moula adanda to Yahudi. 46Roo indo, Yesu rahakami hai rahilu. 47Hangko inditi, hadua tauna au meangka hungku i Yesu mowuka pihona mobata hawina Tadulako Menomba Mahile, kana talingana pane maingihi. 48Nauli Yesu i tauna au mohaka: "Ba tauna kadakeNa dide, pane maiNa Nihaka moantikau piho hai pewombe? 49Alo-alona araNa hihimbela hai ikamu i Souna Pue Ala mepaturo. Moapa hai baraNa nihaka i tempo iti? Agayana ope-ope ide hangangaa mewali, bona tepabukeimi apa au teuki i lalu Sura Malelaha." 50Roo indo, melangkamohe ope-ope topeguruNa mopalehi Yesu. 51I tempo iti, ara wori hadua anantomoane au meula i Yesu au motabungi watana hai komo au bula. Arahe au mohaka, 52ido hai nawosuimi komona, hai melangka mengkabela. 53Hangko inditi, Yesu raantimi lao i souna Tadulako Menomba Mahile. Inditi, moteruhumohe ope-ope kapala-kapala tadulako menomba, guru agama hai totosaenda to Yahudi au ntanina. 54Peturu meula ngkarao pea duuna hawe i tabangaa souna Tadulako Menomba Mahile. Inditi, ia mohuda mamindu hihimbela hai topekampai. 55I tempo iti, kapala-kapala tadulako menomba hai ope-ope tadulako agama mohaokimohe sabi au mosalai Yesu, bona rahuku mate. Agayana bara ralambi salaNa. 56Bosa mpuu sabi au mosalai, agayana tongawami dongkonda pea lawi bara himbela lolitanda. 57Ara bahangkia au meangka hai au mosabiki dongko, rauli: 58"Tauna ide, kihadi manguli node: 'Ina kugero Souna Pue Ala au naaro manusia, hai i lalu talu alona ina kuaro hule au ntanina, au bara nababehi taye manusia.' " 59Agayana i posabinda iti, bara wori himbela lolitanda. 60Meangkami Tadulako Menomba Mahile i lindonda ope-ope tadulako mouliangaa Yesu: "Barahe pae Nuhanai au mosalaiKo iti?" 61Agayana Yesu bara mehana, nauri hampaka lolita. Hambela mani Tadulako Menomba Mahile mekune Iria: "Ba Oyo mpuu Datu Topehompo, Anana Pue Ala au hintoto ratoya?" 62Nahanai Yesu: "Io, Ikomi, hai ina niitaNa, Iko Ana Manusia, mohuda tanda i koanana Pue Ala au makuasa, hai ina niita woriNa mendaulu mai hangko i suruga i wongko gawu." 63Kanahadina Tadulako Menomba Mahile apa au nauli Yesu, ia mohepami baduna anti karumpuna, nauli: "Barapi mobundu ara sabi! 64Nihadi mpuumi lolitaNa mopakoi Pue Ala. Noumbami pobotusimi?" Himbelami pobotusinda ope-ope, rauli: "Masala mpuu! Hangangaa rahuku mate!" 65Hangko inditi, arahe au motinuduhi, ara worihe au mampopowadi-wadi: ratabungi lindoNa, rawombe, hai rauliangaa: "Ee nabi! Uli ba hema au mohapaKo!" Topokampai mohapa wori Yesu. 66I tempona mani Peturu i tabangaa, maimi hadua towawine au mobago i souna Tadulako Menomba Mahile. 67Kanaitana Peturu mamindu, ia liliu mouliangaa: "Bara pae oyo wori hadua rangana Yesu to Nasare olou?" 68Agayana nasapuaka Peturu, nauli: "Bara kuisa apa au nuuli!" Hangko inditi melimbami lao hungku i babaka. Motuturuami manu. 69Towawine iti moita mbulimi Peturu, hai nauli i tauna au ara inditi: "Ia ide au hihimbela hai Yesu." 70Agayana nasapuaka mbulimi Peturu. Bara mahae hangko indo, tauna au meangka inditi mouliangaa wori: "Oyo mpuu rangaNa! Lawi oyo to Galilea woriko." 71Mosumpami Peturu, nauli: "Mate-mate raina! Bara mpuu kuisa tauna au niuli iti!" 72I tempo iti, motuturuami manu i karombelana. Nakatuinaomi Peturu lolitana Yesu au mouliangaa: "Hangko damani motuturua manu i karombelana, talumi belana ina nusapuakaNa." Ido hai rumihi mpuu poteriana Peturu.

will be added

X\