Ibrani 9

1I lalu dandina Pue Ala au napahawe Musa i to Yahudi hangkoya, ara ada penomba, hai ara wori sou penombaanda au rababehi tauna. 2Sou penombaanda iti, rahanga Bambaru Penombaa. I lalu sou iti, ara rombua lincu. Lincu au nguru-nguruna rahanga Lincu Malelaha. I lalu lincu iti, ara paidaa hulo, meja paidaa roti, hai roti au rapopenomba i Pue Ala. 3I olona lincu au rombua ara hantau bana au mewali rindi ntanga. I lalu rindi ntanga iti, ara lincu karombuana au rahanga Lincu au Meliu Kamalelahana. 4I lincu iti, ara meja pointua dupa au rababehi hangko i bulawa, hai ara wori hambua peti au rahanga Peti Podandi. Humalele peti iti ralapisi hai bulawa, maroa i raoana hai i laluna. I lalu peti iti, ara kawali bulawa au raihii paande au rahanga manna, ara laina Haruni au motumbe, hai ara wori rombua watu au rapoukii hawa hampulo au hangko i Pue Ala. 5I wongko peti iti, ara rombua watutauna au nodo malaeka lenggena, au rahanga kerub. Kapinda kerub teona mobobongi petukona peti, hai hangko i kerub iti, tongawa peawana Pue Ala. Petuko iti rahanga Petuko Pohompo Dosa. Agayana ope-ope iti barapi peisa tatuntu hai taparesa inde. 6Nodomi karaatorona Bambaru Penombaa hangkoya. Alo-alona tadulako menomba mesua i lincu au nguru-nguruna mampopolumao bagonda. 7Agayana au peisa mesua i lincu karombuana, batena pea Tadulako Menomba Mahile. Hai ia bara peisa mesua morombela. Hangangaa mesua hambela pea i lalu hampare, hai ane mesua, hangangaa moanti wahe. Wahe iti, iami wahe binata au nahuhu i Pue Ala, pahuruna salana haduduana hai salanda tauna bosa au bara raoaka. 8Kana i ada penomba iti, Inao Malelaha mopaguruke node: ane ara mani lincu au nguru-nguruna, manusia bara mani rapaliu mesua i lalu Lincu au Meliu Kamalelahana bona mohungkuki Pue Ala. 9Ope-ope iti mewali ngkora pandiri irikita au tuwo ide-ide. Lempona: bara peisa tapamalelaha lalunta i peitana Pue Ala i pohuhunta binata hai popenomba ntanina Iria. 10Lawi ada iti mokanai pea watanta, nodo ada hai palia i paande hai paenu, hai bahangkia pakana ada periu agama. Pue Ala mowei ada iti i taunaNa bona rapeulai tanganda mampegia dandiNa au wou. 11Agayana ide-ide, hawemi Kerisitu mewali Tadulako Menomba Mahile au moanti katuwo maroa au tahumba ide-ide. Ia mesua i lalu Bambaru Penombaa i suruga au meliu kamaroana hai au meliu kamalelahana hangko i Bambaru Penombaa au naaro Musa hangkoya. Lawi sou penombaa au napesuangi Kerisitu, bara rababehi tauna; lempona bara hangko i dunia ide. 12I tempoNa mesua i lalu Bambaru Penombaa, Ia liliu lao i lalu Lincu au Meliu Kamalelahana molindo Pue Ala. Hai wahe au Naanti mesua, bara wahe towau balilo ba wahe ana japi, agayana waheNari haduduaNa. PesuaNa iti, hambela pea, hai barapi paraluu rahuleki, lawi anti waheNa au Naanti, Ia mohuru dosanta duuna kamahae-haea. 13Moula Aturana Musa, ane arahe tauna au masala moula atura agama, towau balilo ba japi balilo hangangaa rasambale, hai wahena rahimpeaahe. Hai nodo wori, hambaa ana japi hangangaa rahuwe duuna mewali awu, hai awuna hangangaa rahawukaahe. Mewali, ane wahe hai awu iti peisa rapake mobahoi tauna au masala moula atura agama au mokanai pea watanta, 14pelumbunami wahena Kerisitu! Anti kuasana Inao Malelaha au tuwo duuna kamahae-haea, Kerisitu mohuhu wataNa haduduaNa i Pue Ala bona rapapate nodo popenomba au bara ara kamakurana. WaheNa iti mobahoi lalunta hangko i hinangkana babehianta au moantike i kapate, bona peisake menomba i Pue Ala au tuwo. 15Anti popenombaNa au bara ara kamakuraNa, Kerisitu mewali topetanga-tangai au mopahawe dandi wou au mopahintuwu manusia hai Pue Ala. Iti Nababehi bona ope-ope tauna au nakakio Pue Ala molambi pewati au bara mokahopoa moula apa au nadandiahe Pue Ala i anaNa. Lawi i tempona mani ara dandi au nguru-nguruna au napahawe Musa, manusia moliungi Aturana Pue Ala. Ido hai Kerisitu mate mohompo peliunginda iti. 16Ane pandirina ara hadua tosae au mampeinao mokira-kira anu-anuna i anana, ia hangangaa mobabehi mpuu sura peawili au mopakanoto pokirana anu-anuna. Agayana sura peawili iti bara mani peisa rapake ane bara mani manoto kapatena topeawili. 17Lawi ihina sura peawili iti bara peisa rapopobundu ane tuwo mani topeawili. Ane matemi topeawili, hangko peisari rapopobundu. 18Nodo wori, hangangaa ara kapate au mopakaroho dandina Pue Ala au napahawe nabi Musa. Kapate iti rapatongawa i wahena binata au raanti. Node tuntukana: 19Karoona Musa mopahawe hinangkana parenta au ara i lalu Aturana Pue Ala i ope-ope to Yahudi, naalami wahe ana japi hai wahe towau balilo nagalo hai owai. Roo indo, naala worimi hehi hisop au raboke hai wulu dimba au malei, naeme i lalu wahe, hai nahimpeka i Sura Aturana Pue Ala hai i tauna bosa. 20Tangana Musa mobabehi iti, nauli: "Idemi wahe au mopakaroho dandina Pue Ala irikamu, hai hangangaa nipeulai dandiNa iti." 21Nodo wori, Musa mohimpeka wahe i Bambaru Penombaa hai i hinangkana parewa au rapake menomba i Pue Ala. 22Katouana moula Aturana Musa, paka-pakana hangangaa rabahoi hai wahe. Ane bara ara wahe hangko i kapate, bara teampungi dosanta. 23Ane Bambaru Penombaa au i dunia ide hai anu-anu au ara i laluna, ope-ope iti mewali nodo pandiri irikita kana apa au ara i suruga. Bambaru au i dunia ide hangangaa rabahoi hai wahe binata au rapopenomba i Pue Ala. Agayana ane sou penombaa au i suruga, hangangaa ara popenomba au meliu kamaroana. 24Lawi sou penombaa au napesuangi Kerisitu, bara sou au rababehi tauna. Sou penombaa iti iami suruga. Hai Kerisitu mesua mpuu i suruga. Ide-ide, arami i lindona Pue Ala mamperuruike. 25Ane Tadulako Menomba Mahile agama Yahudi, pare-parena mesua i lalu Lincu au Meliu Kamalelahana moanti wahe binata, bara wahena haduduana. Agayana Kerisitu, bara bosa belana mohuhu wataNa i Pue Ala. 26Lawi ane rapana nodo, kebosa belana Ia hangangaa mantodiha kapari duuna mate mepongka hangko i pewaliana dunia hangkoya. Mewali, ide-ide i tempo kahopoa dunia, Ia mai hambela pea i dunia bona moumpahi dosa manusia i pohuhuNa wataNa rapapate. 27Moula tunggaiana Pue Ala, hambela manusia hangangaa mate, hai roo indo hangangaa rabotusi kara-karanda. 28Nodo wori, hambela pea Kerisitu mohuhu wataNa i Pue Ala bona mohalea dosanda tauna bosa. Hai hambela tempo, Ia ina mai i karombelana i dunia ide. Ane mai mbuli, barapi ina mohalea dosanta. I tempo iti, Ia ina moanti katuwo maroa i tauna au mampegia kahaweNa.

will be added

X\