TĨTO 3

1Wĩbũkaye abandu bawe, bayolobeke oko batabalĩ, n'ab'ehamũlĩ, n'erikengabo, kandi babye ĩbasĩkĩre erikola obuli mũbĩrĩ owene. 2Kandi sibatsume mundu, sibalwe, bakangaye obwĩra, n'erĩkanganĩa omutima molo oko bandu bosĩ. 3Kusangwa netu twabya bakĩrũ erĩmbere, isitulikenga, ĩtũkatebĩbawa. Twabya bakobe b'esyongumbu n'eby'erĩyĩtsemesya, eby'emĩsĩndo yosĩ, itukasiba omo myatsi mibi, n'eritsura, ĩtũkakwa abandi b'ekĩnĩga, n'erikwama obusu. 4Nĩkwa omugulu obugenge bwa Nyamuhanga Omũlamya wetu, n'olwanzo luwe busana n'abandu byahuluka, 5Nyamuhanga mwatũlamya. Si busana n'emĩbĩrĩ itunganene twakola, nĩkwa busana n'eriganyira liwe, Omũlĩmũ Abũyĩrĩre mĩakatweraya, kandi akatubuta bubya-buhya, n'erituha engebe nyihya-nyihya. 6Nyamuhanga mwatũtũlĩrako ndeke-ndeke Omũlĩmũ Abũyĩrĩre, busana na Yesu Kristo Omũlamya wetu, 7itwatoka eriyirwa mo batunganene busana n'olukogo luwe, n'eribana engebe y'erikota, eyo tũkahĩra kw'amaha. 8Ekĩ nĩ kĩnywa ky'ekwenene. Kandi nyanzĩre ĩwabũga emyatsi eyĩ ndeke-ndeke, neryo ababĩrĩkĩrĩrya Nyamuhanga babye n'omũhwa w'erisiba bakakola emĩbĩrĩ yowene. Emĩbĩrĩ eyĩ ni mibuya kandi ikaleta omugaso oko bandu. 9Nĩkwa usage emyatsi mĩkĩrũ y'obuhaka, n'eriahula amena w'aboso-kulu, n'erinegena, n'erilwa busana n'Emigambo. Emyatsi eyĩ ni ya busa, siyiwite ndũndĩ. 10Omundu oyukaleta obuhaka busana n'erĩkangĩrĩrya lyawe, umukunge esyongendo ĩbĩrĩ, neryo iwamugana. 11Kusangwa ũnasĩ k'omundu ng'oyũ atsandĩre, kandi ebibi biwe bĩkamũsĩnga. 12Ekiro nasyakutumira Artema kutse Tĩkĩko, ulenge kutsibu erĩnyĩhĩkako eNĩkopolĩ, kusangwa nabirisoha erisibayo oko mugulu w'eritsuku. 13Ulenge kutsibu eritsindika embũyĩ ye Zenasĩ na Apolo omo nzira yabo. Ũlebaye sibabule kindu. 14Kandi abandu betu bige erisiba erikola emĩbĩrĩ yowene, n'erĩwatĩkya ahali obwaga, ibabya bandu b'endũndĩ. 15Abandu bosĩ abali haguma nage bakakũkeraya. Ũkeraye abatwanzĩre omw'ĩkĩrĩrya Engulu Yowene. Olukogo lwa Nyamuhanga lubye nenyũ, ĩnywe bosĩ.

will be added

X\