TĨTO 2

1Nĩkwa uwe, ũbũge emyatsi eyitolere erĩkangĩrĩrya eritunganene. 2Ubwire abasyakulu uti sĩbakũnde, babye b'amenge, bayĩtegaye; babye abakalĩre omw'ĩkĩrĩrya, n'omo lwanzo, n'omw'ĩyĩyĩnĩa. 3Kandi mubwire abakekulu, nabo nibya babye n'emibere eyikakenga Nyamuhanga, sibabye bakatonga abandu, kandi sibabye bakakũnda obwabũ, babye ĩbakakangĩrĩraya emyatsi mibuya. 4Kandi bakangĩrĩraye abakalĩ balere erianza abĩba wabo, banze abana babo, 5bayĩtegaye, babye bakayihigula oko bibi. Babye bakakola omũbĩrĩ w'eka, babye bagenge, bakenge abĩba wabo, neryo ekĩnywa kya Nyamuhanga sikitsumawe. 6Kandi mulemba-lembe abalwana nibya, bayĩtegaye. 7Nawe ubye kĩmĩnyĩsyo ky'emikolere mibuya, ũkangĩrĩraye eby'amenge, awate ko matebo. 8Ũbũge ebĩnywa bitunganene, ebite kw'ekyangakungwa. Neryo enzĩgũ yawe iyahemuka, isiawite omwatsi mubi w'erĩbũga busana netu. 9Mubwire abagombe, bowe abakama babo omo myatsi yosĩ, n'erĩtsemesyabo, kandi sibakube buhaka. 10Kandi sĩbĩbe, nĩkwa bayĩkangaye ng'abandu babuya abateregula, batoke erĩowanĩa erĩkangĩrĩrya lya Nyamuhanga Omũlamya wetu omo byosĩ bakakola. 11Kusangwa Nyamuhanga abĩrĩmĩnyĩkalya olukogo luwe, olukaleta erilama, busana n'abandu bosĩ. 12Olukogo olo lukatutegeka luti, tugane emikolere eyitekenga Nyamuhanga, n'esyongumbu sy'ekihugo, luti, tũyĩtegaye, n'erikwama ekitunganene, n'erikenga Nyamuhanga omo mikolere yetu oko mugulu ono, 13itukalindirira n'amaha g'omũyĩsa ekiro ky'obutseme, kandi tukalindirira erihuluka ly'olukengerwa lwa Nyamuhanga wetu mukulu, n'Omũlamya wetu, Yesu Kristo. 14Kristo mwayiha busana netu erĩtũtongolya oko bibi byosĩ, n'erĩerya abandu busana naye ĩyowene-wene, abali n'omũhwa w'erikola emĩbĩrĩ yowene. 15Ũbũge emyatsi eyĩ, kandi ũsĩkaye n'erikunga abandu n'ehamũlĩ yosĩ. Suleke mundu akakupona.

will be added

X\