ABANYA ROMA 9

1Ekyo ngabũga ni kwenene; indi wa Kristo, sindibiha. Obunya-mutima bwage, obukasondolawa n'Omũlĩmũ Abũyĩrĩre bũkatũlago nibya ko ndebiha. 2Ngwite obũlĩge bunene n'eriagalwa omo mutima wage busana n'abagala betu oko mubiri. 3Kwenene nanganza eritakirwa, n'erigabulwa uku Kristo busana n'abagala betu oko mubiri! 4Ibo nĩ Baĩsraelĩ, abo Nyamuhanga ayira mo bagala buwe n'erisangira nabo olukengerwa luwe. Kandi mwalagana nabo, n'erihabo Emigambo. Kandi bawite erĩramya ly'eHekalũ, bawite nibya esyondagane sya Nyamuhanga. 5Ni bana b'abotata-kulu betu Abrahamũ, Ĩsaka, na Yakobo. Na Kristo oko mubiri ni w'ekihanda kyabo. Iye ni Nyamuhanga ali endata oko bosĩ, apipawe kera na kera. Amina. 6Sĩkyangabũgwa kiti, ekĩnywa kya Nyamuhanga kyamatalukana. Kusangwa abosĩ abakabutawa omo kihanda kya Ĩsraelĩ sĩ Baĩsraelĩ kwenene. 7Kandi ab'olubuto lwa Abrahamũ abosĩ sibehulawa mo bana buwe. Nĩkwa Nyamuhanga mwabwira Abrahamũ ati, Abana ba Ĩsaka bo basyahulwa mo lubuto lwawe. 8Ekĩ kĩkakangaya ngoko abana bakabutawa omo mubiri si bana ba Nyamuhanga, nĩkwa abana b'endagane, bo bakaganzawa mo lubuto lw'ekwenene. 9Kusangwa ekĩnywa ky'endagane ya Nyamuhanga kiti, oko mugulu owatolere nasyasa, neryo Sara asyabana omugala. 10Butsira ekĩ kisa, nĩkwa Rebeka mwaheka obukule bw'abahasa, uku Ĩsaka ye tata-kulu wetu. 11Nĩkwa abahasa bate babutwa, isibebakola kibuya kutse kibi, 12Nyamuhanga mwabwira Rebeka ati, Omukulu asyakolera omulere; Nyamuhanga mwahanganĩa erisonda liwe ngoko ayisoga, mwatabirikira omulere busana n'emĩbĩrĩ yiwe, nĩkwa kusangwa mwayi soga erimubirikira. 13Ngoko kĩsakĩre kiti: Nabirianza Yakobo, nĩkwa nabĩrĩkwa Esaũ y'obusu. 14Neryo tũbũgekĩ kwehĩ? Tuti Nyamuhanga siali kw'erĩbanza kwehĩ? Iyihi n'ahake! 15Kusangwa mwabwira Musa ati, Kandi, nasyamũkwĩra obũlĩge oyo nasyakwĩra obũlĩge. 16Neryo si busana n'erisonda ly'omundu kutse erikola liwe, nĩkwa ni busana n'eriganyira lya Nyamuhanga. 17Kusangwa Amasako akabwira Farao ati, Nabĩrĩkũhĩra oko ngoma busana n'omwatsi oyũ, inatoka erĩkangya obũtokĩ bwage ewawe, kandi erĩna lyage lĩtũlaganĩbawe omo kihugo kyosĩ. 18Neryo Nyamuhanga akaganyira oyo anzĩre eriganyira, Kandi akakalaya oyo anzĩre erĩkalya. 19Neryo wasyambwira uti, Busana nakĩ Nyamuhanga akinabana erĩlolo kwehĩ? Kusangwa nindi yo wangalwa n'erisonda liwe kwehĩ? 20Nĩkwa uwendi kwehĩ, uti ũkakũbĩsanaya Nyamuhanga y'obuhaka kwehĩ? Kw'ekikabumbawa kĩkanabũga n'omũbũmbĩ kiti, Busana nakĩ ukanyibumba utya kwehĩ? 21Omũbũmbĩ siawite ehamũlĩ oko libumba erikola ngoko anzĩre kwehĩ? Kutse eribumba enyungu busana n'omũbĩrĩ mubuya, kutse omũbĩrĩ mutya-mutya kwehĩ? 22Nyamuhanga abya anzĩre erĩkangya erihitana liwe, n'erĩmĩnyĩsya obũtokĩ buwe. Neryo mwayibombeka kutsibu mwayitsingirira busana n'abo angahitanako, ababya bakandĩsyaherĩbwa. 23N'akandi abya anzĩre erĩmĩnyĩsya olukengerwa lunene luwe busana n'abo angaganyira, abo ahĩra kera erisangira olukengerwa luwe. 24Kusangwa nĩ ĩtwe abirikira, butsira omo katĩkatĩ k'Abayũda basa, nĩkwa omo katĩkatĩ k'Ebihanda nibya. 25Ngoko abũga omo kitabu kya Hosea ati, Abatabya bandu bage, nasyahulabo mo bandu bage. N'oyo wabya aponĩrwe, nasyamwahula mo mwanze wage. 26N'abo babwirawa ambu, Simuli bandu bage, Abo basyahulwa mo bagala ba Nyamuhanga oyuliho. 27Kandi Ĩsaya akabirikira busana na Ĩsraelĩ ati, Nomo eriganza ly'abandu ba Ĩsraelĩ lyangabya ng'emisege y'omo ngetsi, abake bo basyalamĩbwa. 28Kusangwa Omukama asyabũga lũba omwatsi wuwe busana n'ekihugo. 29Kandi ngoko Ĩsaya abũga erĩmbere ati, Kumbe Omukama w'Amaka Gosĩ atatũsĩgĩra olubuto, Kumbe twabiribya ng'eSodomo, itwabirisosa ng'eGomora. 30Neryo tũbũgekĩ kwehĩ? Ab'ebihanda abatekwama eritunganene, mobatũngananĩbwa na Nyamuhanga omo kitunganene ekikabanika busana n'erĩkĩrĩrya. 31Nĩkwa Ĩsraelĩ ibakakwama omugambo w'erĩtũnganamabo, mobabula omugambo oyo. 32Busana nakĩ kwehĩ? Kusangwa mobatakwamakyo omo nzira y'erĩkĩrĩrya, nĩkwa omw'ikola emĩbĩrĩ. Mobatwĩkala okw'ĩbwe erĩkatwĩkalaya abandu. 33Ngoko kĩsakĩre kiti, Lebaya, ngahĩra eSĩonĩ y'erĩbwe erĩkatwĩkalaya abandu, N'erĩbwe erikaleterabo erĩtwĩkala. N'oyũkamwĩkĩrĩraya sĩendĩsyakwa esĩsonĩ.

will be added

X\