ABANYA ROMA 8

1Neryo sihali eritswerwa oko bawatene na Kristo Yesu. 2Kusangwa omugambo w'Omũlĩmũ oyukatuha engebe busana n'erimatikana na Kristo Yesu, abirinyibohola oko mugambo w'ebibi n'ow'oluholo. 3Kusangwa ekyo Migambo yataluka erikola, busana n'obolo bw'obũlengekanĩa bw'omubiri, Nyamuhanga mwatokakyo. Nyamuhanga mwatuma Omugala wuwe omo kĩsosekanĩo ky'omubiri w'ebibi, kandi busana n'eririha ebibi. Neryo mwatswera ebibi by'obũlengekanĩa bw'omubiri. 4Nyamuhanga mwakola atya, ebilayiro by'Emigambo bibererere omwisi wetu, ĩtwe tukalendera omo mibere y'Omũlĩmũ, butsira omo mibere y'omubiri. 5Kusangwa abo bakakwama omubiri bakaganĩraya emyatsi y'omubiri. Nĩkwa abakakwama Omũlĩmũ bakaganĩraya emyatsi y'Omũlĩmũ. 6Kusangwa obũlengekanĩa obukakwama omubiri bukaleta oluholo; nĩkwa obũlengekanĩa obukakwama Omũlĩmũ bukaleta engebe n'obuholo. 7Kusangwa omundu oyukakwama obũlangekanĩa bw'omubiri nĩ nzĩgũ uku Nyamuhanga. Sialĩowa Emigambo ya Nyamuhanga, kandi sialitoka erĩowayo. 8Kandi abandu abakakwama obũlengekanĩa bw'omubiri sibetoka erĩtsemesya Nyamuhanga. 9Nĩkwa simwekwama obũlengekanĩa bw'omubiri, nĩkwa obw'Omũlĩmũ, Omũlĩmũ wa Nyamuhanga amabya ĩkere omwisi wenyũ. Oyutawite Omũlĩmũ wa Kristo si mundu wuwe. 10Nĩkwa Kristo amabya ali omwisi wenyũ, nomo mubiri wenyũ aholĩre busana n'ebibi, nĩkwa ekĩrĩmũ kiwite engebe kusangwa kyabĩrĩtũngananĩbwa na Nyamuhanga. 11Omũlĩmũ wa Nyamuhanga oyo walũbũkaya Yesu oko baholĩ, amabya ĩkere omwisi wenyũ, neryo oyo walũbũkaya Yesu oko baholĩ asyaha engebe oko mibiri yenyũ eyikahola, busana n'Omũlĩmũ wuwe oyo wĩkere omwisi wenyũ. 12Neryo busana n'omwatsi oyũ, balĩkyetu, siritolere ũkw'ĩnywe erikwama obũlengekanĩa bw'omubiri. 13Kusangwa mwamakwama obũlengekanĩa bw'omubiri mwasyahola; nĩkwa omo maka w'Omũlĩmũ mwamĩta emikolere y'omubiri, mwasyabyaho. 14Kusangwa abosĩ abakasondolawa n'Omũlĩmũ wa Nyamuhanga bo bagala ba Nyamuhanga. 15Kusangwa Omũlĩmũ ogo Nyamuhanga abaha, sialibayira mo bakobe, sialireka mukubaha kandi. Nĩkwa Omũlĩmũ akabayira mo bagala ba Nyamuhanga; kandi omo bũtokĩ bw'Omũlĩmũ tukabirikira tuti, Tata! Tata! 16Omũlĩmũ oyũ wa Nyamuhanga akatũlago haguma n'ekĩrĩmũ kyetu ko tuli bana ba Nyamuhanga. 17Twamabya tuli bana, tuli balĩ b'omwandu n'ebindu ebyo Nyamuhanga akatubikira omo bwami buwe. Kandi twasyasangira omwandu haguma na Kristo; kusangwa twamagalwa haguma na Kristo, twasyasangira olukengerwa luwe. 18Ngaganza amalĩge wa sesene nga si kindu busana n'olukengerwa olo tũkandĩsyabĩsũlĩrwa. 19Kusangwa ebihangikwa byosĩ bikalindirira n'olukando lunene erĩbĩsũlĩrwa ly'abagala ba Nyamuhanga. 20Kusangwa ebihangikwa mobyatswerwa eribya buyira, butsira omw'isonda lyabo, nĩkwa kusangwa Nyamuhanga mwatswerabyo atya. Nĩkwa habya amaha, 21kusangwa ebihangikwa ebĩ byasyaboholwa omo bukobe bw'emyatsi y'erihonda, eriingira omo bwĩranda n'olukengerwa lw'abana ba Nyamuhanga. 22Kusangwa tũnasĩ erĩhĩka lino ebihangikwa byosĩ bĩkasĩmba n'erikunda haguma. 23Kandi butsira ebihangikwa bisa, netu nibya, tuwite Omũlĩmũ mo bĩgũma by'erĩmbere byolũsũnzo lwa Nyamuhanga, tũkasĩmba omo mitima yetu, tukalindirira Nyamuhanga erituyira mo bagala, n'erĩtongolya emibiri yetu. 24Kusangwa twalamĩbawa omo maha, nĩkwa omundu siali n'amaha busana n'ekyo abirilangira, kusangwa amalangira kindu, siangaswakwa amaha wakyo. 25Nĩkwa twamahĩra amaha oko ekyo tutelolako, tukayitsingirira n'eririndirirakyo. 26Kandi nibya Omũlĩmũ akatũwatĩkaya omo bolo bwetu. Kusangwa sĩtwasĩ erisaba ngoko litutolere, nĩkwa Omũlĩmũ ĩyowene akatusabira, akatwimira omw'ĩsĩmba erite ryangabũwa. 27Neryo Nyamuhanga oyukalangira emitima y'abandu anasĩ obũlengekanĩa bw'Omũlĩmũ, kusangwa Omũlĩmũ akasabira abandu ba Nyamuhanga ng'erisonda lya Nyamuhanga ngoko liri. 28Tũnasĩ ngoko Nyamuhanga akaleka emyatsi yosĩ ĩyowana busana n'abakamwanza, kandi busana n'abo abirikira ng'erĩyĩsũnza liwe. 29Kusangwa abo ayisoga erĩmbere, mwasombolabo kera basose Mugala wuwe, neryo Omugala iniatoka eribya akambere omo bagala babo bangi. 30N'abo ayisoga kera mwabirikirabo. N'abo abirikira mwayirabo mo batunganene, n'abo ayira mo batunganene, ba n'abo aha erisangira omo lukengerwa luwe. 31Neryo tũbũgekĩ busana n'emyatsi eyĩ kwehĩ? Nyamuhanga amabya ali oko luhande lwetu, nindi yo wangaswalwa netu kwehĩ? 32Nyamuhanga mwatabalya Omugala wuwe-wuwe, nĩkwa mwamusiga busana n'ĩtwe bosĩ! Oyo watuha Omugala wuwe, siendisyatuha ebindu byosĩ busana naye kwehĩ? 33Nindi wasyahandĩkĩrĩrya abayisogawa na Nyamuhanga kwehĩ? Nyamuhanga yukahulabo mo batunganene. 34Nindi yo wasyahĩra kubo kw'omusango kwehĩ? Kristo Yesu yoyo wahola, kandi mwalũbũka, na lino ĩkere oko luhande lw'amali lwa Nyamuhanga, kandi yo yukatwimira embere sya Nyamuhanga. 35Nindi wasyatugabula oko lwanzo lwa Kristo kwehĩ? Nĩ bũlĩge, kutse amagaliĩ, kutse erĩendererya, kutse enzala, kutse eribula eky'eriambala, kutse obwĩko, kutse omũyalĩ kwehĩ? 36Ngoko kĩsakĩre kiti, Busana nawe tũkĩtawa omo musibo gosĩ. Tukaganzawa ng'esyombũlĩ sy'erikerwa. 37Nĩkwa omo myatsi yosĩ eyĩ tũkakĩnda ndeke busana n'oyo watwanza! 38- 39Kusangwa nyĩnasĩ ndeke ngoko hate kindu ekyangatoka eritugabula oko lwanzo lwa Nyamuhanga oluli omwisi wa Kristo Omukama wetu. Sihali kindu, sihali oluholo, kutse engebe, sihali abamalaĩka, kutse abatabalĩ b'omo kyanya, sihali emyatsi ya sesene, kutse emyatsi eyikandisyasa, sihali eby'amaka, kutse eky'endata, kutse eky'eyĩkwa, sihali n'ekindi ekyahangikawa, ekyangatoka eritugabula oko lwanzo olo lwa Nyamuhanga, oluli omwisi wa Kristo Yesu Omukama wetu.

will be added

X\