ABANYA ROMA 7

1Sĩmwasĩ, balĩkyetu, ngabũga oko basĩ Emigambo, ngoko Emigambo iwite ehamũlĩ oko mundu omugulu gosĩ akineho kwehĩ? 2Kusangwa omũkalĩ oyũhĩkĩbwe abohĩre ũkw'ĩba wuwe omugulu gosĩ akineho; nĩkwa ĩba wuwe amahola, iniamaboholwa oko mugambo owamuboha ũkw'ĩba wuwe. 3Neryo ĩba wuwe amabya akineho, omũkalĩ oyo amĩkala n'ogundi mulume, asyahulwa mo mũsĩngĩrĩ; nĩkwa ĩba wuwe amahola, nĩ mwĩranda omo migambo. Sĩ mũsĩngĩrĩ amahĩkĩbwa n'ogundi mulume. 4Ko liri ritya busana nenyũ, balĩkyetu, mwabirihola oko Migambo busana n'omubiri wa Kristo owahola, imwatoka eriherukira oko gundi, oyo walũbũkĩbawa oko baholĩ, imwatoka erireta endũndĩ busana na Nyamuhanga. 5Kusangwa omugulu twabya n'amalengekanĩa w'omubiri, esyongumbu nyibi sy'omubiri esyahuluka busana n'Emigambo, mosyakola omo bĩtsũko byetu erituletera oluholo. 6Nĩkwa lino twabiriboholwa oko Migambo, kusangwa twabirihola oko myatsi eyabya ikatuboha. Neryo tukakola omo nzira nyihya-nyihya y'Omũlĩmũ, butsira eya kera y'Amasako. 7Neryo tũbũge tũtĩkĩ kwehĩ? Tuti Emigambo ni bibi kwehĩ? Iyihi n'ahake! Emigambo yo yaleka inaminya ebibi ngoko biri. Kusangwa sinaminya erirumwa nga nĩkĩ, kumbe Migambo ĩtabũga iti, Subye ukarumawa. 8Nĩkwa ebibi mobyabana omwanya omo bihano, mobyakola-kola omo mutima wage emĩsĩndo yosĩ y'erirumwa; kusangwa ahate Migambo, ebibi biri ng'ekindu kĩholĩre. 9Nage nabyaho nyite oko Migambo; nĩkwa omugulu ekihano kyahĩka ebibi mobyasuba, nage monahola. 10N'ekihano ekyahĩrawa busana n'erireta engebe, mokyanyiretera oluholo. 11Kusangwa ebibi mobyabana omwanya busana n'ebihano, mobyandeba, kandi mobyanyĩta busana n'ebihano. 12Neryo Emigambo ĩbũyĩrĩre, kandi ekihano kĩbũyĩrĩre, kitunganene, kandi ni kibuya. 13Neryo ekindu kibuya mokyanyiretera oluholo kwehĩ? Iyihi n'ahake. Nĩkwa ni bibi ebyaletalo, ibikakola omo nzira y'ekindu kibuya erĩnyĩta, ibyatoka eriminyikala kwenene ng'ebibi. Neryo busana n'ebihano, ebibi bikabanika mo nabi kutsibu. 14Kusangwa tũnasĩ ngoko Emigambo nĩ y'ekĩrĩmũ; nĩkwa ĩngye indi w'omubiri, nabĩrĩgũlĩbwa ng'omukobe w'ebibi. 15Ĩngye sindiminya ebyo ngakola; kandi sindikola ebyo nyanzĩre erikola, nĩkwa ngakola ebyo ngakwa obusu. 16Neryo namabya ngakola ebyo ndanzĩre erĩkola, ngalĩga Emigambo kw'iri mibuya. 17Neryo kandi oyukakola omwatsi oyũ sĩ ĩngye, nĩkwa ni bibi ebĩkere omwisi wage. 18Kusangwa nyĩnasĩ ngoko hate kibuya ekĩkere omwisi wage, omwisi w'omubiri wage; kusangwa nyĩnanzĩre omo mutima wage erikola ekibuya, nĩkwa sinditoka erikolakyo. 19Sindikola ekibuya ekyo nyanzĩre erikola, nĩkwa ekibi ekyo ndanzĩre kyo ngakola. 20Nĩkwa namakola ekyo ndanzĩre, oyukakola sĩ ĩngye, nĩkwa ni bibi ebĩkere omwisi wage. 21Neryo ngabana omugambo oyũ omwisi wage. Omugulu nganza erikola ekibuya, ekibi ekiri omwisi w'omutima wage kikagana. 22Ngalĩga n'obutseme, omugambo wa Nyamuhanga omwisi w'omutima wage. 23Nĩkwa ngabana ogundi mugambo owakakola omo mubiri wage owakalwa n'omugambo w'obũlengekanĩa bwage, kandi ngayirawa mo mundu w'omũlĩkĩ w'omugambo w'ebibi ebĩkere omo bĩtsũko byage. 24Ĩngye indi mundu w'obũlĩge! Nindi wasyanyibohola oko mubiri oyũ w'oluholo kwehĩ? 25Wasĩngya uku Nyamuhanga busana n'Omukama wetu Yesu Kristo. Neryo ĩngye omo bũlengekanĩa ngakola emigambo ya Nyamuhanga, nĩkwa omo mubiri ngakolera emigambo y'ebibi.

will be added

X\